കാസർകോട്ട് അതിതീവ്ര മഴയ്ക്ക് ശമനം; വെള്ളം ഇറങ്ങുന്നു, തീരത്ത് കടലാക്രമണ സാധ്യത

കാസര്‍കോട്: (KasargodVartha) ഒരാഴ്ചയായി തുടര്‍ന്ന അതിതീവ്ര മഴയ്ക്ക് ശമനമായി. ശനിയാഴ്ച ഉച്ചയോടെ മഴയുടെ ശക്തി കുറഞ്ഞ് തെളിഞ്ഞ കാലാവസ്ഥ അനുഭവപ്പെട്ടുതുടങ്ങി.

പ്രളയസമാനമായ സാഹചര്യത്തില്‍ ഉയര്‍ന്ന ജലനിരപ്പ് താഴ്ന്നുതുടങ്ങിയെങ്കിലും, ഉപ്പള, മധൂര്‍, കാഞ്ഞങ്ങാട്, നീലേശ്വരം കാര്യങ്കോട് തുടങ്ങിയ വെള്ളപ്പൊക്കബാധിത പ്രദേശങ്ങളില്‍ ജലനിരപ്പ് ഇപ്പോഴും ആശങ്കാജനകമായി തുടരുകയാണ്. വെള്ളം പൂര്‍ണ്ണമായി ഇറങ്ങാന്‍ ഏകദേശം രണ്ട് ദിവസമെടുക്കുമെന്നാണ് കണക്കാക്കുന്നത്. ശനിയാഴ്ച ജില്ലയില്‍ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്.

അതിനിടെ, കാസര്‍കോട് ജില്ലയുടെ തീരപ്രദേശങ്ങളില്‍ ഉയര്‍ന്ന തിരമാലകള്‍ക്ക് സാധ്യതയുണ്ടെന്ന മുന്നറിയിപ്പ് തീരദേശവാസികളില്‍ ആശങ്ക സൃഷ്ടിച്ചിട്ടുണ്ട്. ദേശീയ സമുദ്രസ്ഥിതിപഠന ഗവേഷണ കേന്ദ്രം (INCOIS) നല്‍കിയ മുന്നറിയിപ്പ് പ്രകാരം, ശനിയാഴ്ച 3.9 മീറ്റര്‍ വരെ ഉയരത്തില്‍ തിരമാലകള്‍ക്കും കടലാക്രമണത്തിനും സാധ്യതയുണ്ട്.

കാസര്‍കോട് കുഞ്ചത്തൂര്‍ മുതല്‍ കോട്ടക്കുന്ന് വരെയുള്ള തീരപ്രദേശങ്ങളില്‍ ഉയര്‍ന്ന തിരമാലകളും കടലാക്രമണവും ഉണ്ടാകുമെന്നാണ് മുന്നറിയിപ്പ്. ഈ പ്രദേശങ്ങളിലെ മത്സ്യത്തൊഴിലാളികളും തീരദേശവാസികളും അതീവ ജാഗ്രത പാലിക്കണമെന്ന് ജില്ലാ ഭരണകൂടം നിര്‍ദേശം നല്‍കിയിട്ടുണ്ട്.

ജാഗ്രതാ നിര്‍ദേശങ്ങള്‍:

● കടല്‍ക്ഷോഭം രൂക്ഷമാകാന്‍ സാധ്യതയുള്ളതിനാല്‍, അപകട മേഖലകളില്‍ നിന്ന് അധികൃതരുടെ നിര്‍ദേശാനുസരണം മാറി താമസിക്കുക.
● മത്സ്യബന്ധന യാനങ്ങള്‍ (ബോട്ട്, വള്ളം മുതലായവ) ഹാര്‍ബറില്‍ സുരക്ഷിതമായി കെട്ടിയിടുക. വള്ളങ്ങള്‍ തമ്മില്‍ സുരക്ഷിത അകലം പാലിക്കുന്നത് കൂട്ടിയിടിച്ചുള്ള അപകട സാധ്യത ഒഴിവാക്കും.
● മത്സ്യബന്ധന ഉപകരണങ്ങളുടെ സുരക്ഷ ഉറപ്പാക്കണം.
● ബീച്ചിലേക്കുള്ള യാത്രകളും കടലില്‍ ഇറങ്ങിയുള്ള വിനോദങ്ങളും പൂര്‍ണ്ണമായും ഒഴിവാക്കുക.

കാസർകോട് ജില്ലയിലെ മഴക്കെടുതിയും കടലാക്രമണ സാധ്യതയും നിങ്ങൾ എങ്ങനെ വിലയിരുത്തുന്നു? അഭിപ്രായങ്ങൾ പങ്കുവെക്കുക.

Article Summary: Heavy rains subside in Kasaragod, but high tide warning issued for coastal areas.

#KasaragodRains #KeralaFloods #HighTideWarning #CoastalSecurity #MonsoonKerala #DisasterAlert