Swachhta Pakhwada | സ്വച്ഛത പഖ്‌വാദ കാംപയിൻ: വിദ്യാർഥികളും അധികൃതരും ഒരുമിച്ചു; കാസർകോട് റെയിൽവേ സ്റ്റേഷൻ ശുചീകരിച്ചു

കാസർകോട്: (www.kasargodvartha.com) കേന്ദ്ര സർകാരിൻറെ 'സ്വച്ഛത പഖ്‌വാദ' (Swachhata Pakhwada) പരിപാടികളുടെ ഭാഗമായി കാസർകോട് റെയിൽവേ സ്റ്റേഷൻ ശുചീകരിച്ചു. റെയിൽവേ അധികൃതരുടെയും കാസർകോട് മുനിസിപാലിറ്റിയുടെയും, മഡോണ സ്കൂൾ വിദ്യാർഥികൾ, കാസർകോട് ഗവ. കോളജ് എൻഎസ്എസ് യൂനിറ്റ്, മാലിക് ദിനാർ കോളജ് ഓഫ് നഴ്സിംഗ് എൻഎസ്എസ് യൂനിറ്റ് എന്നിവരുടെയും സംയുക്താഭിമുഖ്യത്തിലാണ് പരിപാടി സംഘടിപ്പിച്ചത്.
  
പൊതുയിടങ്ങൾ ശുചിയായിരിക്കേണ്ടതിൽ സമൂഹത്തിലെ ഓരോ വ്യക്തിയുടെയും പങ്ക് വ്യക്തമാക്കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. രണ്ടുദിവസമായി നടന്ന പരിപാടികളിൽ ആദ്യ ദിനം മഡോണ സ്കൂൾ വിദ്യാർഥികളും അധ്യാപകരും പങ്കെടുത്തു.
  
കെ സ്റ്റഡീസ് ഡയറക്ടർ നാസർ ചെർക്കളം ഉദ്ഘാടനം ചെയ്തു. സ്റ്റേഷൻ മാസ്റ്റർമാരായ റൂബിൻ, പ്രശാന്തൻ പികെ, പ്രോഗ്രാം ഓഫീസറായ ഡോ. ആശാലത സികെ, മൻശാദ്, ആർപിഫ് എസ്ഐ കതിരേശൻ, ബിനോയ്‌, ജിആർപി എസ്ഐ മോഹൻ, ട്രെയിൻ ടികറ്റ് എക്സാമിനർ സജിത്, ഹെൽത് ഇൻസ്‌പെക്ടർ അഞ്ജന എന്നിവർ സംസാരിച്ചു. ശുചീകരണ പ്രവർത്തനങ്ങൾക്ക് ശേഷം വിദ്യാർഥികൾ വിവിധ കലാപരിപാടികൾ അവതരിപ്പിച്ചു.