എന്‍ വൈ എല്‍ നേതാവ് മര്‍ദനമേറ്റ പരിക്കുകളോടെ ആശുപത്രിയില്‍

കാസര്‍കോട്: (www.kasargodvartha.com 31.03.2019) എന്‍ വൈ എല്‍ പഞ്ചായത്ത് ജനറല്‍ സെക്രട്ടറിയെ മര്‍ദനമേറ്റ പരിക്കുകളോടെ ആശുപത്രിയില്‍ പ്രവേശിപ്പിച്ചു. എരിയാലിലെ അബ്ദുല്‍ ഖാദറിന്റെ മകന്‍ നൗഷാദ് ബള്ളീറിനെ (34) യാണ് ചെങ്കള ഇ കെ നായനാര്‍ ആശുപത്രിയില്‍ പ്രവേശിപ്പിച്ചത്. ഞായറാഴ്ച ഉച്ചയ്ക്ക് രണ്ടു മണിയോടെയാണ് സംഭവം.

നാട്ടിലെ ഒരു കല്യാണത്തില്‍ പങ്കെടുത്ത് സുഹൃത്തിനൊപ്പം മടങ്ങുകയായിരുന്ന തന്നെ ഒരു സംഘം തടഞ്ഞുനിര്‍ത്തി ഇരുമ്പുവടി കൊണ്ട് മര്‍ദിക്കുകയായിരുന്നുവെന്ന് നൗഷാദ് പരാതിപ്പെട്ടു. കുറച്ചു ദിവസം മുമ്പ് സ്വകാര്യ വ്യക്തിയുടെ പറമ്പിലേക്ക് പഞ്ചായത്ത് തുക ഉപയോഗിച്ച് റോഡുണ്ടാക്കിയത് ചോദ്യം ചെയ്തതിന്റെ വിരോധത്തിലാണ് അക്രമമെന്നും നൗഷാദ് കാസര്‍കോട് വാര്‍ത്തയോട് പറഞ്ഞു.

ഈ സംഭവം വീഡിയോ സഹിതം സോഷ്യല്‍ മീഡിയയിലൂടെ പ്രചരിപ്പിക്കുകയും കലക്ടര്‍ ഇടപെട്ട് റിപോര്‍ട്ട് ആവശ്യപ്പെടുകയും ചെയ്തിരുന്നു. ഇതിന്റെ വൈരാഗ്യത്തില്‍ സംഘടിച്ചെത്തിയ സംഘം അക്രമം നടത്തുകയായിരുന്നുവെന്നും നൗഷാദ് പറയുന്നു.

വിവരമറിഞ്ഞ് ടൗണ്‍ എസ് ഐയുടെ നേതൃത്വത്തിലുള്ള പോലീസ് സംഘം സ്ഥലത്തെത്തി കൂടിനിന്നവരെ വിരട്ടിയോടിച്ചു. സംഘര്‍ഷ സാധ്യത കണക്കിലെടുത്ത് എരിയാലില്‍ പോലീസിനെ വിന്യസിച്ചിട്ടുണ്ട്.