ഷിറിയ പുഴയിൽ ആവേശം നിറച്ച് ദേശീയ ആംഗ്ലിങ് ചാമ്പ്യൻഷിപ്പ്; ആദ്യ മൂന്ന് സ്ഥാനവും കാസർകോട്ടുകാർക്ക്, കൗസർ അഹ്‌മദ് ജേതാവ്

കാസർകോട്: (KasargodVartha) ജില്ലയിൽ ആദ്യമായി സംഘടിപ്പിച്ച ദേശീയ ആംഗ്ലിങ് ചാമ്പ്യൻഷിപ്പിൽ ആദ്യ മൂന്ന് സ്ഥാനങ്ങളും സ്വന്തമാക്കി കാസർകോട് ജില്ലയിലെ മത്സ്യബന്ധന പ്രേമികൾ. ആരിക്കാടിയിലെ ഷിറിയ പുഴയിൽ ഞായറാഴ്ച നടന്ന മത്സരത്തിൽ കേരളം, കർണാടക, തമിഴ്നാട് എന്നീ മൂന്ന് സംസ്ഥാനങ്ങളിൽ നിന്നായി 71 പേരാണ് പങ്കെടുത്തത്.

മൊഗ്രാൽ സ്വദേശി കൗസർ അഹ്‌മദ് 920 ഗ്രാം തൂക്കമുള്ള റെഡ് സ്നാപ്പർ മത്സ്യം പിടിച്ച് ഒന്നാം സ്ഥാനം നേടി. നിസാർ എം. 245 ഗ്രാം മത്സ്യം പിടിച്ച് രണ്ടാം സ്ഥാനവും, അഫ്സൽ എസ്. 145 ഗ്രാം മത്സ്യം പിടിച്ച് മൂന്നാം സ്ഥാനവും കരസ്ഥമാക്കി. ആദ്യമായി പങ്കെടുക്കുന്ന ആംഗ്ലിങ് ചാമ്പ്യൻഷിപ്പിൽ തന്നെ ജേതാവാകാൻ കഴിഞ്ഞതിൽ സന്തോഷമുണ്ടെന്ന് കൗസർ അഹ്‌മദ് പ്രതികരിച്ചു.

ഒന്നാം സ്ഥാനത്തിന് 40,000 രൂപയും, രണ്ടാം സ്ഥാനത്തിന് 30,000 രൂപയും, മൂന്നാം സ്ഥാനത്തിന് 20,000 രൂപയുമാണ് സമ്മാനത്തുക. നാല് മണിക്കൂർ നീണ്ട മത്സരം ഉച്ചയോടെയാണ് പൂർത്തിയായത്. തുടർന്ന് കർണാടക സംസ്ഥാന മിനിമം വേതന ഉപദേശക ബോർഡ് ചെയർമാൻ ടി.എം. ഷാഹിദ് തെക്കിൽ വിജയികൾക്ക് സമ്മാനങ്ങൾ വിതരണം ചെയ്തു.

വിനോദസഞ്ചാര സാധ്യതകളും പദ്ധതികളും

കാസർകോടിൻ്റെ പുഴകളെയും ജലാശയങ്ങളെയും വിനോദസഞ്ചാര ഭൂപടത്തിൽ ശ്രദ്ധേയമാക്കാനും, പ്രാദേശിക തലത്തിൽ ആംഗ്ലിങ് ടൂറിസത്തിന് പുതിയ സാധ്യതകൾ കണ്ടെത്താനും ചാമ്പ്യൻഷിപ്പിലൂടെ ലക്ഷ്യമിടുകയായിരുന്നു. കാസർകോട് എം.പി. രാജ്മോഹൻ ഉണ്ണിത്താൻ ചാമ്പ്യൻഷിപ്പ് ഉദ്ഘാടനം ചെയ്തു. 

മഞ്ചേശ്വരം എം.എൽ.എ. എ.കെ.എം. അഷ്റഫ് ചടങ്ങിൽ സംബന്ധിച്ചു. നദികളുടെ വിനോദസഞ്ചാര സാധ്യതകൾ പ്രയോജനപ്പെടുത്തുകയെന്ന ലക്ഷ്യത്തോടെയാണ് ചാമ്പ്യൻഷിപ്പ് സംഘടിപ്പിച്ചതെന്ന് അദ്ദേഹം വ്യക്തമാക്കിയിരുന്നു.

കണ്ണൂരിൽ നടന്ന ദേശീയ ആംഗ്ലിങ് മത്സരത്തിൽ വിജയിച്ചിരുന്ന ആരിക്കാടി സ്വദേശി റഫീഖ് ഖാദർ ഞായറാഴ്ച നടന്ന മത്സരത്തിലും പങ്കെടുത്തു. ജില്ലയിൽ ഇത്തരമൊരു ദേശീയതല മത്സരം സംഘടിപ്പിച്ചതിൽ സന്തോഷമുണ്ടെന്നും, മത്സരം മികച്ച രീതിയിൽ തന്നെ സംഘടിപ്പിച്ചുവെന്നും അദ്ദേഹം അഭിപ്രായപ്പെട്ടു.

അടുത്ത വർഷങ്ങളിലും ഈ മത്സരം സംഘടിപ്പിച്ച് ഇതിനെ വിപുലമായ വാർഷിക പരിപാടിയാക്കുന്നതിനുള്ള ആലോചനയുണ്ടെന്ന് ജില്ലാ ടൂറിസം പ്രമോഷൻ കൗൺസിൽ സെക്രട്ടറി ജിജേഷ് കുമാർ പറഞ്ഞു. ബേക്കൽ ബീച്ച് ഫെസ്റ്റിവൽ പോലെ കാസർകോട്ട് നടത്താവുന്ന പ്രധാന വിനോദസഞ്ചാര പരിപാടിയായി ആംഗ്ലിങ് ചാമ്പ്യൻഷിപ്പിനെ വളർത്തിയെടുക്കാൻ ശ്രമിക്കുമെന്നും അദ്ദേഹം വ്യക്തമാക്കി.

കുറ്റമറ്റ സംഘാടനം

ഷിറിയ പുഴയിലെ വിവിധ ഭാഗങ്ങളിലായാണ് മത്സരാർഥികൾക്ക് ചൂണ്ടയിടുന്നതിനുള്ള ഇടങ്ങൾ ഒരുക്കിയത്. ബോട്ടുകളിലും റോഡ്, റെയിൽവേ പാലങ്ങളുടെ തൂണുകൾക്ക് സമീപമുള്ള ഭാഗങ്ങളിലുമാണ് മത്സരാർഥികൾ ചൂണ്ടയിട്ട് മീൻ പിടിച്ചത്. മത്സരം ആരംഭിക്കുന്നതിന് മുൻപ് നടത്തിയ നറുക്കെടുപ്പിലൂടെയാണ് ഓരോ മത്സരാർഥിക്കും ചൂണ്ടയിടുന്ന സ്ഥലം അനുവദിച്ചത്.

ജില്ലാ ടൂറിസം പ്രമോഷൻ കൗൺസിൽ കാസർകോട് ബ്ലോക്ക് പഞ്ചായത്ത്, സംസ്ഥാന-കേന്ദ്ര ടൂറിസം വകുപ്പുകൾ എന്നിവ സംയുക്തമായാണ് ചാമ്പ്യൻഷിപ്പ് സംഘടിപ്പിച്ചത്. കാസർകോട് ബ്ലോക്ക് പഞ്ചായത്ത്, കുമ്പള ഗ്രാമപഞ്ചായത്ത് എന്നിവയുടെ നേതൃത്വത്തിൽ മത്സരത്തിനാവശ്യമായ ക്രമീകരണങ്ങൾ ഒരുക്കി.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Mogral native Kausar Ahmed won the first prize at Kasaragod's first National Angling Championship held in the Shiriya River, Arikady. The event, organized by DTPC and Tourism Departments, aims to boost local tourism.

#KasargodVartha #KasaragodTourism #NationalAnglingChampionship #ShiriyaRiver #KeralaTourism #MalayalamNews #FishingCompetition #DTPCKasaragod #SportsTourism #AparnaNews