റെയിൽവേയ്ക്ക് മുന്നിൽ സമഗ്ര നിർദ്ദേശം; മലബാറിൻ്റെ യാത്രാദുരിതത്തിന് അറുതി വരുത്താൻ മെമു സർവീസ് ആവശ്യം ശക്തമാകുന്നു

നിസാർ പെറുവാട്

കാസർകോട്: (KasargodVartha) വടക്കൻ കേരളത്തിലെയും ദക്ഷിണ കന്നടയിലെയും പതിനായിരക്കണക്കിന് യാത്രക്കാരുടെ ദീർഘകാല യാത്രാദുരിതത്തിന് അറുതി വരുത്താൻ, കണ്ണൂർ-മംഗളൂരു റൂട്ടിൽ പുതിയ മെമു (മെയിൻലൈൻ ഇലക്ട്രിക് മൾട്ടിപ്പിൾ യൂണിറ്റ്) ട്രെയിൻ സർവീസ് ആരംഭിക്കണമെന്ന ശക്തമായ നിർദ്ദേശം കാസർകോട് റെയിൽവെ പാസർജേർസ് അസോസിയേഷൻ റെയിൽവേ അധികൃതർക്ക് സമർപ്പിച്ചു. നിലവിൽ ഇന്ത്യയുടെ പശ്ചിമതീരത്തെ  റെയിൽ പാതകളിൽ കണ്ണൂരിനും മംഗലാപുരത്തിനും  ഇടയിൽ മാത്രമാണ് ഒരു മെമു സർവീസ് പോലും ഇല്ലാത്തത് മലബാറിനോട് പ്രത്യേകിച്ച് കാസർകോട് ജില്ലയോട് ഇന്ത്യൻ റെയിൽവേ കാണിക്കുന്ന കടുത്ത അവഗണനയാണിത് സൂചിപ്പിക്കുന്നത്. 

ദക്ഷിണ റെയിൽവേയുടെ തിരുവനന്തപുരം ഡിവിഷനിൽ  പത്തിലധികം മെമു സർവീസുകളുണ്ടായിരിക്കുമ്പോൾ, പാലക്കാട് ഡിവിഷനിൽ വരുന്ന മലബാർ മേഖലയിൽ കേവലം ഒരു മെമു ട്രെയിൻ മാത്രമാണ് ഓടുന്നത്. അതും കണ്ണൂരിന് വടക്ക് തീരെ ഇല്ല.

കേവലം ഒരു പാസഞ്ചർ ട്രെയിൻ മാത്രമാണ് കണ്ണൂർ മുതൽ മംഗലാപുരം വരെ  21 സ്റ്റേഷനുകൾ ഉള്ള  ഈ മേഖലയിൽ ഉള്ളത്.

യാത്രാക്ലേശം ഒരു യാഥാർത്ഥ്യം

ഇപ്പൊൾ ഈ ഭാഗത്ത് ഓടുന്ന  പാസഞ്ചർ ട്രെയിനുകളിൽ അടക്കം ഓടുന്ന എല്ലാ വണ്ടികളിലും  രാവിലെയും വൈകുന്നേരവും അനുഭവപ്പെടുന്ന അമിതമായ തിരക്ക് വിദ്യാർത്ഥികളെയും ഉദ്യോഗസ്ഥരെയും  സാധാരണ യാത്രക്കാരെയും ഒരുപോലെ ദുരിതത്തിലാക്കുകയാണ്. ട്രെയിനിനുള്ളിൽ നിന്ന് പുറത്തേക്ക് തള്ളി യാത്ര ചെയ്യുന്നവരുടെ ചിത്രങ്ങൾ തന്നെ ഈ യാത്രാദുരിതത്തിന്റെ നേർസാക്ഷ്യമാണ്. ഈ ദയനീയ സാഹചര്യത്തിന് ഒരു ശാശ്വത പരിഹാരം എന്ന നിലയിലാണ് പുതിയ മെമു റേക്കിനായുള്ള ആവശ്യം ശക്തമായി ഉയർന്നിരിക്കുന്നത്.

സമഗ്രമായ നിർദ്ദേശം റെയിൽവേയ്ക്ക് മുന്നിൽ

പുതിയ മെമു സർവീസിനായി വിശദമായ ഒരു സമയക്രമവും പ്രയോജനങ്ങളും വ്യക്തമാക്കുന്ന സമഗ്ര നിർദ്ദേശമാണ് റെയിൽവേയ്ക്ക് സമർപ്പിച്ചിരിക്കുന്നത്. പ്രഭാതം മുതൽ അർദ്ധ രാത്രി വരെ നാല് സർവീസുകളാണ് ഇതിൽ പ്രധാനമായും ഉൾപ്പെടുന്നത്.

പ്രഭാത സർവീസ് (കണ്ണൂർ നിന്ന് മംഗളൂരിലേക്ക്): വൻ തിരക്ക് അനുഭവപ്പെടുന്ന ചെറുവത്തൂർ മംഗലാപുരം പാസഞ്ചറിന് പിറകിലായി രാവിലെ 5:50-ന് കണ്ണൂരിൽ നിന്ന് പുറപ്പെട്ട് 8:45-ന് മംഗളൂരു സെൻട്രലിൽ എത്തുന്ന വിധത്തിൽ. മംഗളൂരു സെൻട്രലിൽ സ്ഥലപരിമിതിയുണ്ടെങ്കിൽ മംഗളൂരു ജങ്ഷൻ വരെ സർവീസ് നീട്ടാനും നിർദ്ദേശമുണ്ട്.
ഉച്ചസമയ സർവീസ് (മംഗളൂരു നിന്ന് കണ്ണൂരിലേക്ക്): രാവിലെ 11:00-ന് മംഗളൂരു ജങ്ഷനിൽ നിന്ന് പുറപ്പെട്ട് 11:30-ന് മംഗളൂരു സെൻട്രലിൽ നിന്ന് യാത്ര തുടരും. ഉച്ചയ്ക്ക് 2:30-ഓടെ ഈ സർവീസ് കണ്ണൂരിൽ എത്തിച്ചേരും.

വൈകുന്നേരത്തെ സർവീസ് (കണ്ണൂർ നിന്ന് മംഗളൂരുവിലേക്ക്): വൈകുന്നേരം 5:30-ന് കണ്ണൂരിൽ നിന്ന് പുറപ്പെടും. നിലവിലുള്ള കണ്ണൂർ-ചെറുവത്തൂർ പാസഞ്ചർ ട്രെയിനിൻ്റെ സമയക്രമവുമായി ഇത് ഒത്തുപോകുന്നതാണ്. രാത്രി 8:30-ഓടെ മംഗളൂരിൽ ഈ സർവീസ് എത്തും.

രാത്രികാല സർവീസ് (മംഗളൂരു നിന്ന് കണ്ണൂരിലേക്ക്): രാത്രി 9:00-ന് മംഗളൂരുവിൽ നിന്ന് പുറപ്പെട്ട് അർദ്ധരാത്രി 12:00-ന് കണ്ണൂരിൽ എത്തിച്ചേരും.

ഒറ്റ റെയ്ക്ക് കൊണ്ടുള്ള ഈ നാലു മെമു സർവീസ് യാഥാർത്ഥ്യമായാൽ നിലവിലുള്ള ട്രെയിൻ ഷെഡ്യൂളുകളിലും യാത്രാസൗകര്യങ്ങളിലും ഗുണപരമായ വലിയ മാറ്റങ്ങൾ വരുത്താൻ സാധിക്കുമെന്നാണ് നിർദ്ദേശം അടിവരയിടുന്നത്.

പരശുറാം എക്സ്പ്രസ്: പരശുറാം എക്സ്പ്രസ് ഇപ്പോൾ വൈകീട്ട് കോഴിക്കോട് ഒരു മണിക്കൂറോളം നിർത്തിയിടുന്നത് ഒഴിവാക്കി, വൈകുന്നേരം 4:30-ന് കോഴിക്കോട് നിന്ന് പുറപ്പെടാൻ സാധിക്കും. ഇത് യാത്രാസമയം ലാഭിക്കുകയും ട്രെയിനിന്റെ കാര്യക്ഷമത വർദ്ധിപ്പിക്കുകയും ചെയ്യും.

രാത്രികാല യാത്രാ പ്രശ്നം: നിലവിൽ വൈകുന്നേരം 6:10-ന് ശേഷം മംഗളൂറിൽ നിന്ന് കണ്ണൂരിലേക്ക് ഒരു സാധാരണ ട്രെയിൻ സർവീസില്ല. പുതിയ മെമു രാത്രി 9:00-ന് മംഗളൂരുവിൽ നിന്ന് പുറപ്പെടുന്നതോടെ ഈ വലിയ യാത്രാപ്രശ്നത്തിന് ശാശ്വത പരിഹാരമാകും.

തിരക്ക് കുറയ്ക്കാൻ: രാവിലെ ചെറുവത്തൂരിൽ നിന്ന് മംഗളൂരിലേക്കുള്ള ട്രെയിനുകളിൽ കനത്ത തിരക്കാണ് അനുഭവപ്പെടുന്നത്. ഈ റൂട്ടിലെ തിരക്ക് വലിയ തോതിൽ കുറയ്ക്കാൻ പുതിയ മെമു സർവീസ് സഹായിക്കും, ഇത് കൂടുതൽ സുരക്ഷിതമായ യാത്ര ഉറപ്പാക്കും.

ഞായറാഴ്ചകളിലെ പ്രവർത്തനം

ഞായറാഴ്ചകളിൽ മെമു റേക്കിന്റെ അറ്റകുറ്റപ്പണികൾക്കായി രാവിലെ 11:30-നുള്ള മംഗളൂരുവിൽ നിന്നുള്ള സർവീസ് റദ്ദാക്കും. ഈ ദിവസം രാത്രി 9:00-നുള്ള കണ്ണൂർ സർവീസ് മാത്രമായിരിക്കും ഓപ്പറേറ്റ് ചെയ്യുക.

മലബാറിൻ്റെ യാത്രാദുരിതം പരിഹരിക്കാനും പ്രാദേശിക സമ്പദ്‌വ്യവസ്ഥയെ ഉത്തേജിപ്പിക്കാനും ഈ മെമു സർവീസ് അത്യന്താപേക്ഷിതമാണ്. റെയിൽവേ അധികൃതർ ഈ സമഗ്ര നിർദ്ദേശം അനുകൂലമായി പരിഗണിച്ച് എത്രയും പെട്ടെന്ന് പുതിയ മെമു സർവീസ് അനുവദിക്കുമെന്ന പ്രതീക്ഷയിലാണ് മലബാറിലെ ജനങ്ങൾ.

മലബാറിലെ യാത്രാക്ലേശം പരിഹരിക്കാൻ ഈ നിർദ്ദേശം എത്രത്തോളം സഹായകമാകുമെന്ന് നിങ്ങളുടെ അഭിപ്രായം പങ്കുവയ്ക്കുക.

Proposal for a new MEMU train service on the Kannur-Mangaluru route.

#MEMU #KeralaRailways #Malabar #TrainService #Kasargod #Railway