മംഗളൂരിനെ മൈസൂർ ഡിവിഷനിലേക്ക് മാറ്റുമ്പോൾ നഷ്ടം നികത്താൻ കുമ്പള ടെർമിനൽ സ്റ്റേഷനാകുമോ? കാസർകോടിന് പ്രതീക്ഷയേറുന്നു

കുമ്പള: (KasargodVartha) പാലക്കാട് ഡിവിഷൻ്റെ കീഴിലുണ്ടായിരുന്ന ഒരേയൊരു ടെർമിനൽ സ്റ്റേഷനായ മംഗളൂരിനെ മൈസൂർ ഡിവിഷനിലേക്ക് ലയിപ്പിക്കാനുള്ള റെയിൽവേ ബോർഡിൻ്റെ തീരുമാനത്തിന് പിന്നാലെ കുമ്പള റെയിൽവേ സ്റ്റേഷൻ വികസനത്തിന് പ്രതീക്ഷയേറുന്നു. മംഗളൂരിനെ മാറ്റുമ്പോൾ പാലക്കാടിന് ഉണ്ടാകുന്ന നഷ്ടം നികത്താൻ പാലക്കാടിനെ തിരുവനന്തപുരം ഡിവിഷനിലേക്ക് ലയിപ്പിക്കേണ്ടി വരും. 

അങ്ങനെ വന്നാൽ മംഗളൂരിനു പകരം സ്ഥലലഭ്യതയുള്ള കുമ്പള റെയിൽവേ സ്റ്റേഷൻ ടെർമിനൽ സ്റ്റേഷനായി വികസിപ്പിക്കാമെന്ന നിർദേശമാണ് ഇപ്പോൾ ഉയർന്നുവരുന്നത്. 1904-ൽ പ്രവർത്തനമാരംഭിച്ച എൻഎസ്ജി-5 കാറ്റഗറിയിൽപ്പെടുന്ന സ്റ്റേഷനാണിത്.

വികസനത്തിന് 34 ഏക്കർ ഭൂമി

കണ്ണൂർ- കാസർകോട്- മംഗളൂരു റൂട്ടിൽ ഏറ്റവും കൂടുതൽ റെയിൽവേ ഭൂമിയുള്ള സ്റ്റേഷനുകളിലൊന്നാണ് കുമ്പള. കണ്ണൂർ മുതൽ മംഗളൂരു വരെയുള്ള റെയിൽവേ സ്റ്റേഷനുകളിൽ മറ്റൊരിടത്തും സ്ഥലമില്ലാത്തതിനാൽ കുമ്പളയിലെ 34 ഏക്കറോളം വരുന്ന ഭൂമി ഉപയോഗപ്പെടുത്തി വികസനം കൊണ്ടുവരാൻ സാധിക്കുമെന്ന് യാത്രക്കാർ പറയുന്നു. ഇതിനാലാണ് നാട്ടുകാർ സാറ്റലൈറ്റ് സ്റ്റേഷൻ എന്ന ആവശ്യം മുന്നോട്ടുവെക്കുന്നതും. 

ഇത് യാഥാർഥ്യമായാൽ കൂടുതൽ ട്രെയിനുകൾക്ക് ഇവിടെ സ്റ്റോപ്പ് ലഭിക്കുകയും, ട്രെയിനുകൾക്ക് സർവീസ് അവസാനിപ്പിക്കാനുള്ള ഇടമായി കുമ്പള മാറുകയും ചെയ്യും. ജില്ലയുടെ റെയിൽവേ വികസനത്തിന് ഇത് വലിയ മുതൽക്കൂട്ടാകും. നിലവിൽ കുമ്പള സ്റ്റേഷനിൽ നല്ല വരുമാനമുണ്ട്. വിദ്യാർഥികളും രോഗികളും കൂടുതലായി ആശ്രയിക്കുന്ന സ്റ്റേഷൻ എന്ന നിലയിൽ വികസനത്തിന് 'കരുണാർദ്രമായ' പരിഗണന നൽകണമെന്നും ആവശ്യമുയരുന്നു.

കൂടുതൽ സ്റ്റോപ്പുകൾ വേണം

നിലവിൽ രാവിലെയും വൈകുന്നേരവുമുള്ള ചുരുക്കം ചില ട്രെയിനുകൾക്ക് മാത്രമാണ് കുമ്പളയിൽ സ്റ്റോപ്പുള്ളത്. മംഗളൂരു ഭാഗത്തേക്ക് പോകുന്ന മലബാർ എക്സ്പ്രസ് (16629), ഏറനാട് എക്സ്പ്രസ് (16606), ചെന്നൈ എഗ്മൂർ-മംഗളൂരു എക്സ്പ്രസ് (16159), മംഗളൂരു പാസഞ്ചർ എക്സ്പ്രസ് (16611), ചെറുവത്തൂർ-മംഗളൂരു പാസഞ്ചർ (56621) എന്നിവയ്ക്കും, കേരള-തമിഴ്നാട് ഭാഗത്തേക്ക് പോകുന്ന മലബാർ എക്സ്പ്രസ് (16630), ഏറനാട് എക്സ്പ്രസ് (16605), തിരുവനന്തപുരം എക്സ്പ്രസ് (16348), മംഗളൂരു-ചെന്നൈ സെൻട്രൽ എക്സ്പ്രസ് (16160), മംഗളൂരു-കോയമ്പത്തൂർ എക്സ്പ്രസ് (16324), പാലക്കാട് ഫാസ്റ്റ് പാസഞ്ചർ (16610) തുടങ്ങിയ ട്രെയിനുകൾക്കുമാണ് ഇവിടെ സ്റ്റോപ്പുള്ളത്.

പരശുറാം എക്സ്പ്രസ്, ഇൻ്റർസിറ്റി എക്സ്പ്രസ്, മംഗളൂരു-ചെന്നൈ സെൻട്രൽ സൂപ്പർഫാസ്റ്റ് എക്സ്പ്രസ്, മംഗളൂരു-ചെന്നൈ സെൻട്രൽ മെയിൽ എന്നീ ട്രെയിനുകൾക്ക് കൂടി സ്റ്റോപ്പ് അനുവദിക്കണമെന്ന ആവശ്യം വർഷങ്ങളായി റെയിൽവേ മന്ത്രാലയത്തിൻ്റെ പരിഗണനയിലാണ്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Passengers and locals are hopeful that the Kumbala railway station in Kasaragod could be developed as a terminal or satellite station to compensate for the potential shift of the Mangaluru region to the Mysore division, utilizing its 34 acres of available land.

#KasargodVartha #KumbalaRailwayStation #KasaragodNews #SouthernRailway #KeralaNews #MalayalamNews #PalakkadDivision #AparnaNews