കാസർകോട് റെയിൽവേ സ്റ്റേഷനിൽ നിന്നും കൊല്ലൂർ മൂകാംബിക ക്ഷേത്രത്തിലേക്ക് കെഎസ്ആർടിസി എസി ബസ് സർവീസ് ആരംഭിക്കണമെന്ന് കല്ലട്ര മാഹിൻ ഹാജി എംഎൽഎ

കാസർകോട്: (KasargodVartha) തീർഥാടകർക്കും വിദ്യാർഥികൾക്കും ആശ്വാസമേകാൻ കാസർകോട് റെയിൽവേ സ്റ്റേഷനിൽ നിന്നും മംഗളൂരു, ഉഡുപ്പി വഴി പ്രശസ്ത തീർഥാടന കേന്ദ്രമായ കൊല്ലൂർ മൂകാംബിക ക്ഷേത്രത്തിലേക്ക് കർണാടക കെഎസ്ആർടിസി എസി ബസ് സർവീസ് ആരംഭിക്കണമെന്ന് ആവശ്യപ്പെട്ട് കല്ലട്ര മാഹിൻ ഹാജി എംഎൽഎ ജില്ലാ കളക്ടർ മുഖേന നിവേദനം നൽകി. തിരുവനന്തപുരം - കാസർകോട് വന്ദേ ഭാരത് എക്സ്പ്രസ്സ് ട്രെയിനുകളിലെ യാത്രക്കാർക്ക് ഏറെ പ്രയോജനപ്പെടുന്ന രീതിയിലാണ് ഈ സർവീസ് വിഭാവനം ചെയ്തിരിക്കുന്നത്.

വന്ദേ ഭാരത് യാത്രക്കാർക്ക് പ്രയോജനം 

നിലവിൽ രണ്ട് ജോടി വന്ദേ ഭാരത് ട്രെയിനുകളാണ് കാസർകോട് സർവീസ് നടത്തുന്നത്. ഇതിൽ ഉച്ചയ്ക്ക് 1:20-ന് എത്തേണ്ട ട്രെയിൻ ഭൂരിഭാഗം ദിവസങ്ങളിലും ഒരു മണിയോടെ കാസർകോട് എത്താറുണ്ട്. ഈ സമയത്ത് ഇറങ്ങുന്ന യാത്രക്കാർക്ക് മംഗളൂരു, സുരത്കൽ, ഉഡുപ്പി, മണിപ്പാൽ തുടങ്ങിയ മെഡിക്കൽ-വിദ്യാഭ്യാസ ഹബ്ബുകളിലേക്കും കൊല്ലൂർ ക്ഷേത്രത്തിലേക്കും സുഗമമായി യാത്ര ചെയ്യാൻ പുതിയ എസി ബസ് സർവീസ് സഹായിക്കും.

നിർദേശിച്ച സമയക്രമം 

രാവിലെ 08:45-ന് കൊല്ലൂരിൽ നിന്ന് പുറപ്പെട്ട് ഉച്ചയ്ക്ക് 01:00-ന് കാസർകോട് റെയിൽവേ സ്റ്റേഷനിൽ എത്തിച്ചേരുന്ന രീതിയിലാണ് സമയക്രമം നിർദേശിച്ചിരിക്കുന്നത്. തുടർന്ന് ഉച്ചയ്ക്ക് 01:30-ന് കാസർകോട് നിന്നും തിരിച്ച് വൈകുന്നേരം 05:45-ന് കൊല്ലൂരിൽ എത്തിച്ചേരും. ഈ സമയക്രമം വഴി വന്ദേ ഭാരത് ട്രെയിനിൽ വരുന്ന ഭക്തർക്ക് കൊല്ലൂരിലെ വൈകുന്നേരത്തെ ദീപാരാധനയിലും ശീവേലിയിലും പങ്കെടുക്കാനും, അടുത്ത ദിവസം രാവിലെ നിർമാല്യ ദർശനം കഴിഞ്ഞ് മടങ്ങാനും സാധിക്കും. കൂടാതെ ഉച്ചയ്ക്ക് 2:30-ന് കാസർകോട് നിന്ന് തിരിക്കുന്ന വന്ദേ ഭാരത് ട്രെയിനിലേക്ക് പോകുന്ന യാത്രക്കാർക്കും ഈ ബസ് ഏറെ സഹായകരമാകും.

കർണാടക സർക്കാരിന്റെ സഹകരണം അനിവാര്യം 

കൊല്ലൂരിൽ ബസിന് നൈറ്റ് ഹാൾട്ട് സൗകര്യമില്ലെങ്കിൽ, രാവിലെ 6:00-ന് മംഗളൂരു ഡിപ്പോയിൽ നിന്ന് സർവീസ് ആരംഭിച്ച് മുകളിൽ പറഞ്ഞ സമയക്രമം പാലിച്ച് വൈകീട്ട് 6:45 ന് കൊല്ലൂരിൽ നിന്ന് മടങ്ങി മംഗളൂരിൽ ഹാൾട്ട് ചെയ്യാവുന്നതാണ്. ഇങ്ങനെ വന്നാൽ രാത്രി 10:35-ന് മംഗളൂരു ജങ്ഷനിൽ നിന്നുള്ള മംഗള എക്സ്പ്രസ്സ്, 11:45-ന് മംഗളൂരു സെൻട്രലിൽ നിന്നുള്ള വെസ്റ്റ് കോസ്റ്റ് എക്സ്പ്രസ്സ് എന്നീ ട്രെയിനുകളിൽ മലയാളികൾക്ക് നാട്ടിലേക്ക് മടങ്ങാൻ സാധിക്കും. കേരള എസ്ആർടിസിക്ക് നിലവിൽ എസി ബസുകൾ ലഭ്യമല്ലാത്തതിനാലാണ് കർണാടക ആർടിസിയോട് ഈ ആവശ്യം ഉന്നയിച്ചിരിക്കുന്നത്.

ഐആർസിടിസിയുമായി സഹകരിക്കണം 

നിലവിൽ മംഗളൂരു-കാസർകോട് റൂട്ടിൽ സർവീസ് നടത്തുന്ന പ്രീമിയം 'രാജഹംസ' ബസുകളിൽ ഒരെണ്ണം പ്രാരംഭ ഘട്ടത്തിൽ എസി ബസാക്കി മാറ്റി സർവീസ് ആരംഭിക്കാവുന്നതാണ്. ട്രെയിൻ ടിക്കറ്റുകൾക്കൊപ്പം ബസ് ടിക്കറ്റും ബുക്ക് ചെയ്യാൻ സാധിക്കുന്ന രീതിയിൽ ഐആർസിടിസിയുമായി കർണാടക എസ്ആർടിസി സഹകരിക്കണമെന്ന നിർദേശവും എംഎൽഎ മുന്നോട്ടുവെച്ചിട്ടുണ്ട്. യാത്രക്കാർ മംഗളൂരു ഡിവിഷണൽ കൺട്രോളറെ സമീപിച്ചപ്പോൾ ജില്ലാ കളക്ടർ മുഖേന അപേക്ഷ സമർപ്പിക്കാൻ നിർദേശിച്ചതിനാലാണ് എംഎൽഎ കളക്ടർക്ക് നേരിട്ട് നിവേദനം നൽകിയത്.

Updated

Article Summary: Kallatra Mahin Haji MLA has submitted a petition to the Kasaragod District Collector, urging the introduction of a Karnataka KSRTC AC bus service from Kasaragod Railway Station to Kollur Mookambika Temple. The proposed service aims to benefit Vande Bharat Express passengers, students, and pilgrims travelling to Mangaluru, Udupi, and Kollur.

#KasaragodNews #KollurMookambika #KSRTC #VandeBharatExpress #KallatraMahinHaji #KeralaNews #Mangaluru #Udupi