ഇൻഡിഗോ പ്രതിസന്ധി രൂക്ഷം; യാത്രക്കാർക്കായി പ്രത്യേക ട്രെയിനുകൾ പ്രഖ്യാപിച്ച് റെയിൽവേ

ന്യൂഡെല്‍ഹി: (Kasargodvartha) ഇൻഡിഗോ വിമാന സർവീസ് പ്രതിസന്ധി രൂക്ഷമായ പശ്ചാത്തലത്തിൽ, യാത്രക്കാരുടെ ദുരിതം ലഘൂകരിക്കുന്നതിനായി പ്രത്യേക ട്രെയിനുകൾ പ്രഖ്യാപിച്ച് ഇന്ത്യൻ റെയിൽവേ രംഗത്തെത്തി. ശനിയാഴ്ചയും (06.12.2025) ഞായറാഴ്ച.യും (07.12.2025)  ഉൾപ്പെടെ പ്രത്യേക ട്രെയിൻ സർവീസ് നടത്താനാണ് റെയിൽവേ തീരുമാനിച്ചിരിക്കുന്നത്. പ്രധാനമായും ദീർഘദൂര റൂട്ടുകളിലാണ് സ്പെഷ്യൽ ട്രെയിനുകൾ സർവീസ് നടത്തുക. ഡിസംബർ 13 വരെയായി 30 സ്പെഷ്യൽ ട്രെയിനുകൾ ഒരുക്കാനാണ് റെയിൽവേ ആലോചിക്കുന്നത്. ഇത് കൂടാതെ 37 ട്രെയിനുകളിലായി 116 അധിക കോച്ചുകളും വിന്യസിച്ചിട്ടുണ്ട്.

പ്രതിഷേധവും അന്വേഷണവും

ഇൻഡിഗോയുടെ നിരവധി വിമാനങ്ങൾ റദ്ദാക്കുകയും വൈകുകയും ചെയ്തതോടെ പ്രതിസന്ധിയിലായ യാത്രക്കാർ കടുത്ത പ്രതിഷേധത്തിലാണ്. കണക്ഷൻ ഫ്ലൈറ്റുകൾ നഷ്ടമാകുമോ എന്ന ആശങ്കയും യാത്രക്കാർക്കുണ്ട്. ഇതിനിടെ, വിഷയത്തിൽ വ്യോമയാന മന്ത്രാലയത്തിൻ്റെ അന്വേഷണം ഇൻഡിഗോ കമ്പനിയുടെ കൃത്യവിലോപത്തിലേക്കാണ് ഉന്നമിടുന്നത്. കഴിഞ്ഞ മാസം നൽകിയ ഡിജിസിഎ നിർദ്ദേശം ഇൻഡിഗോ നടപ്പാക്കാത്തത് ഗുരുതരമായ വീഴ്ചയാണെന്നാണ് റിപ്പോർട്ടുകൾ.

പ്രതിസന്ധി സംബന്ധിച്ച് ഒരു മുന്നറിയിപ്പും വ്യോമയാന മന്ത്രാലയത്തിന് ഇൻഡിഗോ നൽകിയില്ല എന്നും വിവരമുണ്ട്. അതേസമയം, എയർഇന്ത്യയടക്കം മറ്റ് വിമാനക്കമ്പനികൾ ഡിജിസിഎ നിർദ്ദേശം പാലിച്ചിട്ടുണ്ട്.

തിരുവനന്തപുരത്തെ യാത്രാ തടസ്സം

ഇൻഡിഗോയുടെ പ്രതിസന്ധി കേരളത്തിലെ യാത്രികരെയും കാര്യമായി ബാധിച്ചു. തിരുവനന്തപുരം വിമാനത്താവളത്തിൽ നിന്ന് പുറപ്പെടേണ്ട അഞ്ച് ഇൻഡിഗോ വിമാനങ്ങൾ റദ്ദാക്കിയിട്ടുണ്ട്. ആകെ ഒമ്പത് ആഭ്യന്തര സർവീസുകളാണ് തടസ്സപ്പെട്ടത്. രാത്രി പുറപ്പെടേണ്ട ഷാർജ വിമാനവും വൈകിമാത്രമേ സർവീസ് നടത്തൂ എന്നും അധികൃതർ അറിയിച്ചു.

റെയിൽവേയുടെ ഈ നടപടിയെക്കുറിച്ച് നിങ്ങളുടെ അഭിപ്രായം കമൻ്റ് ചെയ്യുക. വാര്‍ത്ത ഷെയർ ചെയ്യുക.

Article Summary: Indian Railways announces special trains until December 13 due to Indigo flight crisis.

#IndigoCrisis #IndianRailways #SpecialTrains #AviationMinistry #KeralaFlights #TravelAlert