മംഗളൂരു -ബംഗളൂരു റൂട്ടിൽ കൂടുതൽ വന്ദേ ഭാരത് സർവീസുകൾ അനുവദിക്കണം: റെയിൽവേ മന്ത്രിക്ക് കത്തയച്ച് ദിനേശ് ഗുണ്ടുറാവു

മംഗളൂരു: (KasargodVartha) മംഗളൂരിനും ബംഗളൂരിനും ഇടയിൽ ദൈനംദിന കണക്റ്റിവിറ്റി മെച്ചപ്പെടുത്തുന്നതിനായി കൂടുതൽ വന്ദേ ഭാരത് ട്രെയിൻ സർവീസുകൾ ആരംഭിക്കണമെന്ന് ആവശ്യപ്പെട്ട് ദക്ഷിണ കന്നട ജില്ല ചുമതലയുള്ള മന്ത്രി ദിനേശ് ഗുണ്ടുറാവു കേന്ദ്ര റെയിൽവേ മന്ത്രി അശ്വിനി വൈഷ്ണവിന് കത്തെഴുതി. 

സംസ്ഥാനത്തുടനീളം സന്തുലിത വളർച്ച ഉറപ്പാക്കുന്നതിനും തൊഴിലവസരങ്ങൾ സൃഷ്ടിക്കുന്നതിനുമായി രണ്ടാം നിര നഗരങ്ങളെ ആധുനിക തൊഴിൽ, വ്യവസായ കേന്ദ്രങ്ങളാക്കി വികസിപ്പിക്കുന്നതിലാണ് കർണാടക സർക്കാർ ഇപ്പോൾ ശ്രദ്ധ കേന്ദ്രീകരിക്കുന്നതെന്ന് മന്ത്രി കത്തിൽ ചൂണ്ടിക്കാട്ടി.

വികസന സാധ്യതകൾ വിദ്യാഭ്യാസം, വാണിജ്യം, സംസ്കാരം എന്നീ മേഖലകളിലെ വലിയ സാധ്യതകൾ കണക്കിലെടുത്ത് ബംഗളൂരിന് ശക്തമായ ബദലായി ഉയർന്നുവരാൻ മംഗ്ളൂരിന് കഴിയുമെന്ന് മന്ത്രി കത്തിൽ അവകാശപ്പെട്ടു. 

എന്നാൽ വേഗത്തിലുള്ള ഗതാഗത ബന്ധങ്ങളുടെ അപര്യാപ്തത നഗരത്തിന്റെ വളർച്ചയെ നിലവിൽ പരിമിതപ്പെടുത്തിയിരിക്കുകയാണ്. വന്ദേ ഭാരത് പോലുള്ള സർവീസുകൾ മംഗളൂരിന്റെ വികസനത്തിന് വേഗത കൂട്ടുമെന്നും അദ്ദേഹം പറഞ്ഞു.

ദിവസേനയുള്ള വേഗത്തിലുള്ള യാത്രാ സൗകര്യങ്ങൾ ഇല്ലാത്തതിനാൽ പ്രൊഫഷണലുകളും ബിസിനസുകാരും ഹ്രസ്വകാല ജോലികൾക്കായി പോലും രാത്രി യാത്ര ചെയ്യാൻ നിർബന്ധിതരാകുകയാണ്. ഇത് ഇവരുടെ ഉൽപ്പാദനപരമായ സമയം നഷ്ടപ്പെടുത്തുന്നു. രണ്ട് നഗരങ്ങൾക്കിടയിൽ പതിവായി യാത്ര ചെയ്യുന്ന ദക്ഷിണ കന്നടയിലെ ജനങ്ങളോടുള്ള അനീതിയാണിതെന്നും മന്ത്രി കത്തിൽ അഭിപ്രായപ്പെട്ടു.

നിർദ്ദേശിച്ച സമയം യാത്രാക്ലേശം പരിഹരിക്കുന്നതിനായി മംഗളൂരിൽ നിന്ന് ബംഗളൂരിലേക്ക് രാവിലെ നാല്, 10, വൈകിട്ട് ആറ് എന്നീ സമയങ്ങളിൽ വന്ദേ ഭാരത് ട്രെയിനുകൾ ആരംഭിക്കണമെന്ന് മന്ത്രി ആവശ്യപ്പെട്ടു. 

എല്ലാ പ്രവൃത്തി ദിവസങ്ങളിലും അതേ ദിവസം തന്നെ മടക്ക സർവീസുകൾ നടത്തണമെന്നും ദിനേശ് ഗുണ്ടുറാവു അഭ്യർത്ഥിച്ചു. ഇത്തരം സേവനങ്ങൾ ജോലി ചെയ്യുന്ന പ്രൊഫഷണലുകൾക്കും ബിസിനസ്സ് സമൂഹങ്ങൾക്കും ഗണ്യമായി പ്രയോജനം ചെയ്യുമെന്നും അദ്ദേഹം വ്യക്തമാക്കി.

തീരദേശ കർണാടകയിലെ സാമ്പത്തിക പ്രവർത്തനങ്ങൾക്ക് വലിയ ഉത്തേജനമാകുന്നതിനൊപ്പം ആരോഗ്യ സംരക്ഷണം, ബാങ്കിംഗ്, വാണിജ്യം, വ്യവസായം എന്നീ മേഖലകളിലെ കൈമാറ്റങ്ങൾക്കും അതിവേഗ റെയിൽ കണക്റ്റിവിറ്റി സഹായകരമാകും. 

രണ്ട് നഗരങ്ങളും പരസ്പര പൂരകമാകുന്നതിനാൽ മികച്ച കണക്റ്റിവിറ്റി ഇന്ത്യയുടെ മറ്റ് ഭാഗങ്ങളിൽ നിന്നും വിദേശത്തു നിന്നുമുള്ള സഞ്ചാരികളെ കൂടുതൽ മംഗളൂരിലേക്ക് ആകർഷിക്കുമെന്നും മന്ത്രി കൂട്ടിച്ചേർത്തു.

ഈ വിവരം എല്ലാവരിലേക്കും എത്തിക്കാൻ ഷെയർ ചെയ്യൂ. കമന്റ് ചെയ്യുക. 

Article Summary: Karnataka Minister Dinesh Gundu Rao requests Railway Minister for additional Vande Bharat trains on the Mangaluru-Bengaluru route to boost regional growth.

#VandeBharat #Mangaluru #Bengaluru #IndianRailways #DineshGunduRao #KarnatakaNews