ഹാക്കിങ്ങിൽ വിരുതൻ; 23കാരൻ ഹാക്കറുടെ ഞെട്ടിക്കുന്ന വിഡിയോകൾ പുറത്ത്; ഫോൺ കാൾ ചോർത്താൻ സമീപിച്ചത് കൂടുതലും കമിതാക്കൾ

പത്തനംതിട്ട: (KasargodVartha) അറസ്റ്റിലായ ഹാക്കറുടെ ഞെട്ടിക്കുന്ന ഹാക്കിങ്ങ് വിഡിയോകൾ പുറത്തുവന്നു. അടൂർ പൊലീസ് സ്റ്റേഷന്‍ പരിധിയിലെ ജോയൽ വി ജോസ് (23) ആണ് കഴിഞ്ഞ ദിവസം പൊലീസിൻ്റെ പിടിയിലായത്. ഫോൺ കാൾ രേഖകളും മറ്റ് ലൊക്കേഷൻ വിവരങ്ങളും ചോർത്തി നൽകുന്നത് സംബന്ധിച്ച നിർണായകമായ വിഡിയോകളാണ് ഇപ്പോൾ പുറത്തുവന്നിട്ടുള്ളതെന്നാണ് അന്വേഷണ സംഘം വ്യക്തമാക്കുന്നത്.

ഏത് രാജ്യത്തുള്ള ആളുകളുടെ വിവരങ്ങളും നിഷ്പ്രയാസം ചോർത്തി നൽകാൻ ഇയാൾക്ക് കഴിഞ്ഞിരുന്നതായി പൊലീസ് പറയുന്നു. വിഡിയോ കോൾ ചെയ്യുന്ന ആളുടെ കൃത്യസ്ഥലവും മുറിയുടെ ചിത്രം വരെ ഹാക്ക് ചെയ്‌തെടുക്കാൻ ജോയലിന് സാധിക്കുമായിരുന്നു. ഹാക്കിങ്ങിലൂടെ സാമ്പത്തിക നേട്ടമുണ്ടാക്കാൻ ഇയാൾ സോഷ്യൽ മീഡിയ വഴി പരസ്യവും ചെയ്തിരുന്നതായി പൊലീസ് കൂട്ടിച്ചേർത്തു.

ഹൈദരാബാദിലുള്ള സ്വകാര്യ ഡിറ്റക്ടീവ് ഏജൻസിയുടെ ഏജൻ്റായിട്ടാണ് ജോയൽ പ്രവർത്തിച്ചിരുന്നത്. ഫോൺവിളി രേഖകൾ ചോർത്തുന്നതിനായി ഇയാളെ കൂടുതലും സമീപിച്ചിരുന്നത് കമിതാക്കളായിരുന്നു. ഒരു ഫോൺ നമ്പർ നൽകിയാൽ ഫോൺവിളി രേഖകളെല്ലാം ചോർത്തി നൽകും. ലൊക്കേഷനും രഹസ്യ പാസ് വേർഡുകളും കണ്ടെത്തുന്നതിലും ഇയാൾ വിരുതനായിരുന്നുവെന്ന് പൊലീസ് അറിയിച്ചു.

ഹാക്കിങ് മേഖലയിൽ വിരുതനായ ജോയലിൻ്റെ വിദ്യകൾ കേരള പൊലീസിനെ പോലും ഞെട്ടിക്കുന്ന വിധത്തിലുള്ളതായിരുന്നുവെന്നാണ് വിവരം. കേന്ദ്ര ഏജൻസികളാണ് ഇയാളെ വലയിലാക്കിയതെന്നാണ് പൊലീസ് പറയുന്നത്. തുടർന്ന് പത്തനംതിട്ട പൊലീസിൽ വിവരം എത്തുകയും എസ്പി നേരിട്ട് നടത്തിയ അന്വേഷണത്തിൽ ജോയലിനെ പിടികൂടുകയുമായിരുന്നു.
 

നിങ്ങളുടെ അഭിപ്രായത്തിൽ, ഹാക്കിംഗ് തടയാൻ എന്ത് ചെയ്യണം? പങ്കുവെക്കുക.

Article Summary: 23-year-old hacker arrested in Pathanamthitta for stealing phone data, mostly for lovers.

#HackerArrest #Pathanamthitta #CyberCrime #PhoneHacking #KeralaPolice #JoelVJose