കെ-സ്മാർട്ട് പോർട്ടൽ: ഹൈകോടതി വിധി സെക്രട്ടറിമാർക്ക് ആശ്വാസം

കൊച്ചി: (KasargodVartha) തദ്ദേശസ്ഥാപനങ്ങളിൽ കെ-സ്മാർട്ട് പോർട്ടൽ വഴി അപേക്ഷകളിൽ തീരുമാനമെടുക്കാൻ കാലതാമസം നേരിടുന്നുവെന്ന പരാതിയിൽ, പഞ്ചായത്ത് സെക്രട്ടറിമാരുടെ നിലപാടിന് അംഗീകാരം നൽകി ഹൈകോടതി. 

ഏകജാലക സംവിധാനമായ കെ-സ്മാർട്ട് പോർട്ടലിൽ അപ്‌ലോഡ് ചെയ്യുന്ന തീരുമാനങ്ങൾക്ക് നിയമസാധുതയുണ്ടെന്നും, ഇത് അപേക്ഷകരെ നേരിട്ട് അറിയിക്കേണ്ടതില്ലെന്നും ഹൈക്കോടതി നിരീക്ഷിച്ചു. ഇത് പഞ്ചായത്ത് സെക്രട്ടറിമാരും ഭരണസമിതികളും തമ്മിൽ നിലനിന്നിരുന്ന തർക്കങ്ങൾക്ക് വിരാമമിട്ടു.

കെ-സ്മാർട്ട് പോർട്ടൽ വഴിയുള്ള പരാതികളിൽ തീരുമാനമെടുക്കാൻ കാലതാമസമെടുക്കുന്നുവെന്ന് പഞ്ചായത്ത് ഭരണസമിതികൾ നേരത്തെ നിലപാടെടുത്തിരുന്നു. എന്നാൽ, പരാതികളിലെ സുതാര്യത ഉറപ്പുവരുത്തുന്നതിനായി സെക്രട്ടറിമാർ ഈ നിലപാടിൽ ഉറച്ചുനിന്നത് പല പഞ്ചായത്തുകളിലും ഭരണസമിതിയും സെക്രട്ടറിമാരും തമ്മിൽ അഭിപ്രായ ഭിന്നതകൾക്ക് വഴിവെച്ചിരുന്നു. ഹൈകോടതിയുടെ ഇപ്പോഴത്തെ നിരീക്ഷണം സെക്രട്ടറിമാരുടെ നിലപാടിനുള്ള അംഗീകാരമായി കണക്കാക്കപ്പെടുന്നു.

അപേക്ഷകരുടെ അപേക്ഷകൾ പഞ്ചായത്തുകൾ നിശ്ചിത സമയത്ത് തന്നെ കെ-സ്മാർട്ട് പോർട്ടലിൽ അപ്‌ലോഡ് ചെയ്യാറുണ്ട്. തനിക്ക് ഉത്തരവ് കാണാൻ കഴിഞ്ഞില്ലെന്ന് ചൂണ്ടിക്കാട്ടി ഒരു അപേക്ഷകൻ നൽകിയ ഹർജി തള്ളിക്കൊണ്ടാണ് കഴിഞ്ഞയാഴ്ച ഹൈകോടതി ഈ നിരീക്ഷണം നടത്തിയത്. 

അപ്‌ലോഡ് ചെയ്യുന്ന ഉത്തരവുകൾക്ക് ഐടി ആക്ട് പ്രകാരം നിയമസാധുതയുണ്ടെന്നും, നേരിട്ട് പഞ്ചായത്ത് ഓഫീസിൽനിന്ന് അറിയിച്ചില്ലെന്ന വാദം അപേക്ഷകന് ഉന്നയിക്കാനാകില്ലെന്നും ഹൈകോടതി വ്യക്തമാക്കി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം പങ്കുവെക്കൂ!

Article Summary: High Court backs Panchayat Secretaries on K-Smart Portal decisions.

#KSmartPortal #KeralaHighCourt #PanchayatSecretaries #KeralaLocalSelfGovernment #DigitalGovernance #LegalUpdate