Travel | ടോൾ ബൂത്തിലൂടെ കടന്നുപോയില്ലെങ്കിലും ഫാസ്ടാഗിൽ നിന്ന് പണം കുറയുന്നുണ്ടോ? എൻഎച്ച്എഐയുടെ പുതിയ നിയമങ്ങൾ അറിയാം

ന്യൂഡൽഹി: (KasargodVartha) വാഹന ഉടമകൾക്ക് ആശങ്ക നൽകുന്ന ഒരു പ്രശ്നമാണ് ടോൾ ബൂത്തിലൂടെ കടന്നുപോകാതെ തന്നെ ഫാസ്ടാഗ് വാലറ്റിൽ നിന്ന് പണം കുറയുന്നത്. വാഹനം പാർക്കിംഗിൽ കിടക്കുമ്പോഴും, ടോൾ ബൂത്തിലൂടെ കടന്നുപോകാതിരിക്കുമ്പോഴും ഫാസ്ടാഗ് വാലറ്റിൽ നിന്ന് പണം കുറയുന്നതായി സന്ദേശം ലഭിച്ചാൽ എന്ത് ചെയ്യണം എന്നറിയാതെ പലരും ആശയക്കുഴപ്പത്തിലാകുന്നു. ഫാസ്ടാഗ് ശരിയായി റീഡ് ചെയ്യാത്തതും ടോൾ ഓപ്പറേറ്റർമാർ വാഹന നമ്പർ തെറ്റായി രേഖപ്പെടുത്തുന്നതുമാണ് ഇതിന് പ്രധാന കാരണം. ഈ പ്രശ്നത്തിന് പരിഹാരമായി നാഷണൽ ഹൈവേ അതോറിറ്റി ഓഫ് ഇന്ത്യ (എൻഎച്ച്എഐ) പുതിയ നിയമങ്ങൾ കൊണ്ടുവന്നിരിക്കുകയാണ്.

പുതിയ നിയമങ്ങളും പിഴകളും

ഫാസ്ടാഗ് വാലറ്റിൽ നിന്ന് അനാവശ്യമായി പണം കുറയുന്നതിനെതിരെ എൻഎച്ച്എഐ കർശന നടപടികൾ സ്വീകരിച്ചു കഴിഞ്ഞു. ടോൾ ഓപ്പറേറ്റർമാർ വാഹനം നമ്പർ തെറ്റായി രേഖപ്പെടുത്തുന്നതു കൊണ്ടോ, ഫാസ്ടാഗ് ശരിയായി സ്കാൻ ചെയ്യാത്തത് കൊണ്ടോ പണം കുറയുന്നതായി കണ്ടാൽ ടോൾ കളക്ടർമാർക്ക് പിഴ ചുമത്തും. ഇതിനോടകം തന്നെ 250 കേസുകളിൽ ടോൾ കളക്ടർമാർക്ക് പിഴ ചുമത്തിയിട്ടുണ്ട്. ഐഎച്ച്എംസിഎൽ ഒരു ലക്ഷം രൂപ വരെ പിഴ ചുമത്താൻ തുടങ്ങി. ഉയർന്ന പിഴ ചുമത്തിയിട്ടും ഇത്തരം കേസുകൾ പൂർണ്ണമായി ഒഴിവാക്കാൻ സാധിച്ചിട്ടില്ല. പ്രതിമാസം 50 പരാതികൾ ഐഎച്ച്എംസിഎല്ലിന് ലഭിക്കുന്നുണ്ട്. ദേശീയ പാതകളിലെ ടോൾ പ്ലാസകളിൽ 30 കോടിയോളം ഫാസ്ടാഗ് ഉപയോക്താക്കളുണ്ട്.

ഫാസ്ടാഗ് എന്താണ്?

ടോൾ പ്ലാസകളിലെ നീണ്ട ക്യൂ ഒഴിവാക്കാൻ എൻഎച്ച്എഐ എല്ലാ വാഹനങ്ങൾക്കും ഫാസ്ടാഗ് നിർബന്ധമാക്കിയിട്ടുണ്ട്. ഇത് റീചാർജ് ചെയ്യാവുന്ന പ്രീപെയ്ഡ് ടാഗാണ്. റേഡിയോ ഫ്രീക്വൻസി ഐഡന്റിഫിക്കേഷൻ (ആർഎഫ്ഐഡി) സാങ്കേതികവിദ്യ ഉപയോഗിച്ചാണ് ഇത് പ്രവർത്തിക്കുന്നത്. വാഹനത്തിന്റെ വിൻഡ്സ്ക്രീനിൽ ഇത് ഘടിപ്പിക്കുന്നു. ടോൾ പ്ലാസയിലൂടെ കടന്നുപോകുമ്പോൾ ഓട്ടോമാറ്റിക്കായി പണം കുറയുന്നു. ഫാസ്ടാഗ് ആപ്ലിക്കേഷൻ വഴി ഉപയോക്താക്കൾക്ക് ഇത് നിയന്ത്രിക്കാനാകും.

പരാതി നൽകേണ്ട വിധം

ഫാസ്ടാഗ് വാലറ്റിൽ നിന്ന് തെറ്റായി പണം കുറയുന്നതായി കണ്ടാൽ, സോഷ്യൽ മീഡിയയിലൂടെയോ ഐഎച്ച്എംസിഎല്ലിലോ പരാതി നൽകാം. 1033 എന്ന നമ്പറിൽ വിളിക്കുകയോ falsededuction(at)ihmcl(dot)com എന്ന ഇമെയിൽ വിലാസത്തിൽ പരാതി അയക്കുകയോ ചെയ്യാം. ഓരോ പരാതിയും അന്വേഷിച്ച് പരിഹാരം കാണും. തെറ്റായ കിഴിവുകൾ കണ്ടെത്തിയാൽ ഉടൻ പണം തിരികെ നൽകും. ഉത്തരവാദികളായ ടോൾ ഓപ്പറേറ്റർമാർക്ക് ഒരു ലക്ഷം രൂപ പിഴ ചുമത്തും.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുമല്ലോ.

NHAI introduces strict penalties for toll operators who wrongly deduct money from Fastag accounts, addressing issues of incorrect deductions without vehicle passage.

#Fastag, #NHAI, #TollPlaza, #DigitalPayments, #IndiaTravel, #HighwayRules