Drone Training | അസാപ്പിൽ ഡ്രോണ്‍ പരിശീലനം നേടി ലൈസൻസ് സ്വന്തമാക്കാം; മികച്ച തൊഴില്‍ അവസരങ്ങൾ

കാസർകോട്: (KasargodVartha) ആധുനിക സാങ്കേതികവിദ്യയുടെ മുന്നേറ്റത്തിൽ ഡ്രോണുകൾക്ക് വർദ്ധിച്ചുവരുന്ന പ്രാധാന്യം കണക്കിലെടുത്ത്, അസാപ് കേരളയുടെ നേതൃത്വത്തിൽ നൽകുന്ന ഡ്രോൺ പൈലറ്റ് പരിശീലനം ശ്രദ്ധേയമാകുന്നു. പ്രാക്ടിക്കൽ പരിശീലനത്തിന് അതീവ പ്രാധാന്യം നൽകുന്ന ഈ കോഴ്സിന്റെ പരിശീലന ദൈർഘ്യം 112 മണിക്കൂറാണ്. 

25 കിലോഗ്രാം വരെ ഭാരശേഷിയുള്ള ഡ്രോൺ പറത്താൻ അനുവദിക്കുന്ന ലൈസൻസ് ഈ കോഴ്സിലൂടെ നേടാനാകും. ഡി.ജി.സി.എ (DGCA) യുടെ അംഗീകാരമുള്ള റിമോട്ട് പൈലറ്റ് ലൈസൻസ് ലഭിക്കുന്ന ഈ കോഴ്സിലൂടെ, പത്ത് വർഷം കാലാവധിയുള്ള ലൈസൻസാണ് വിദ്യാർത്ഥികൾക്ക് ലഭിക്കുക. 3ഡി മാപ്പിംഗ്, യു.എ.വി സർവ്വേ, യു.എ.വി അസംബ്ലി ആൻഡ് പ്രോഗ്രാമിംഗ്, ഏരിയൽ ഫോട്ടോഗ്രാഫി തുടങ്ങിയ ആധുനിക സാങ്കേതികവിദ്യകളിലും കോഴ്സ് പരിശീലനം നൽകുന്നു.

കോഴ്സ് വിജയകരമായി പൂർത്തിയാക്കുന്ന വിദ്യാർത്ഥികൾക്ക് ഡി.ജി.സി.എ ലൈസൻസ് - സ്മോൾ കാറ്റഗറി പൈലറ്റ് സർട്ടിഫിക്കറ്റ്, 3ഡി മാപ്പിംഗ് ആൻഡ് സർവ്വേ മൊഡ്യൂൾ കംപ്ലീഷൻ സർട്ടിഫിക്കറ്റ്, ഏരിയൽ സിനിമാട്ടോഗ്രഫി മൊഡ്യൂൾ കംപ്ലീഷൻ സർട്ടിഫിക്കറ്റ് എന്നിങ്ങനെ വിവിധ സർട്ടിഫിക്കറ്റുകൾ ലഭിക്കും. ഇത് വിദ്യാർത്ഥികളുടെ തൊഴിൽ സാധ്യത വർദ്ധിപ്പിക്കും. 

എക്സിക്യൂട്ടീവ് പ്രോഗ്രാം ഇൻ സ്മോൾ കാറ്റഗറി ഡ്രോൺ പൈലറ്റ് ട്രെയിനിങ് പൂർത്തിയാക്കുന്നവർക്ക് ഡ്രോൺ പൈലറ്റ്, ഡ്രോൺ സർവേയർ, അഗ്രിക്കൾച്ചർ ഡ്രോൺ സ്പെഷ്യലിസ്റ്റ്, ഫ്രീലാൻസ് ഡ്രോൺ സർവീസ് പ്രൊവൈഡർ തുടങ്ങിയ വിവിധ തൊഴിൽ മേഖലകളിൽ മികച്ച അവസരങ്ങൾ ലഭ്യമാണ്.
താല്പര്യമുള്ളവർക്ക് അസാപ് കേരളയുടെ വെബ്സൈറ്റ് സന്ദർശിക്കുകയോ അസാപ് കേന്ദ്രവുമായി ബന്ധപ്പെടുകയോ ചെയ്യാവുന്നതാണ്.

കാസർകോട് ജില്ലാ പട്ടിക വർഗ വികസന ഓഫീസിന്റെ 2024-2025 വർഷത്തെ കോർപ്പസ് ഫണ്ട് ഉപയോഗിച്ച് ഉന്നത വിദ്യാഭ്യാസ വകുപ്പിന് കീഴിലെ അസാപ് കേരള വഴി നടത്തിയ എക്സിക്യൂട്ടീവ് പ്രോഗ്രാം ഇൻ സ്മോൾ കാറ്റഗറി ഡ്രോൺ പൈലറ്റ് ട്രെയിനിങ് വിജയകരമായി പൂർത്തിയാക്കിയ വിദ്യാർത്ഥികൾക്ക് ഡിസംബർ 24ന് രാവിലെ 11.30ന് ജില്ലാ കലക്ടർ കെ ഇമ്പശേഖർ സര്‍ട്ടിഫിക്കറ്റുകൾ വിതരണം ചെയ്യും. കലക്ടറുടെ ചേമ്പറിലാണ് ചടങ്ങുകൾ നടക്കുക.
#DroneTraining #DGCAcertification #ASAPPKerala #DronePilot #JobOpportunities #Technology