Court Cases | ആധുനിക സാങ്കേതിക വിദ്യയുടെ സാധ്യതകൾ ഉപയോഗിച്ച് കോടതികളിൽ കേസുകൾ വേഗത്തിൽ തീർപ്പാക്കാൻ കഴിയണമെന്ന് മുഖ്യമന്ത്രി പിണറായി വിജയൻ

കാഞ്ഞങ്ങാട്: (KasargodVartha) ആധുനിക സാങ്കേതിക വിദ്യകളുടെ സാധ്യതകൾ ഉപയോഗിച്ച് കേസുകൾ വേഗത്തിൽ തീർപ്പാക്കാൻ കഴിയണമെന്ന് മുഖ്യമന്ത്രി പിണറായി വിജയൻ. ഹൊസ്ദുർഗ് കോടതിയുടെ പ്ലാറ്റിനം ജൂബിലിയുടെ സമാപന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. നീതി വൈകുന്നത് നീതി നിഷേധത്തിന് തുല്യമാണെന്ന് മുഖ്യമന്ത്രി അഭിപ്രായപ്പെട്ടു. കോടതികളിൽ അഞ്ച് കോടിയിലധികം കേസുകൾ തീർപ്പാക്കാതെ കെട്ടിക്കിടക്കുകയാണെന്നും അദ്ദേഹം കൂട്ടിച്ചേർത്തു. 

സുപ്രീം കോടതി ചീഫ് ജസ്റ്റിസുമാർ പോലും കേസുകൾ തീർപ്പാക്കുന്നതിലെ കാലതാമസത്തെക്കുറിച്ച് പലതവണ പരാമർശിച്ചിട്ടുണ്ട്. കോടതികൾ മാത്രം വിചാരിച്ചാൽ കേസ് വേഗം തീർപ്പാക്കാൻ സാധിക്കില്ല. കേസിൽ വാദിക്കുന്നവരുടെയും പ്രതികളുടെയും അഭിഭാഷകർ കേസ് മാറ്റിവയ്ക്കാൻ ആവശ്യപ്പെടുന്നത് സാധാരണമാണ്. ഇത് നീണ്ടുപോകാൻ കാരണമാകുന്നു. ന്യായാധിപന്മാരുടെ കുറവും ഒരു വലിയ പ്രശ്നമാണ്. ഈ സാഹചര്യത്തിൽ ആധുനിക സാങ്കേതിക വിദ്യയുടെ സാധ്യതകൾ ഉപയോഗിച്ച് കേസ് വേഗത്തിൽ തീർപ്പാക്കാൻ കഴിയണമെന്നും മുഖ്യമന്ത്രി കൂട്ടിച്ചേർത്തു

ജുഡീഷ്യറിയെ ശക്തിപ്പെടുത്തുകയെന്ന കാഴ്ചപ്പാടോടെയാണ് സംസ്ഥാന സർക്കാർ പ്രവർത്തിക്കുന്നത്. അതിന്റെ ഭാഗമായി അടുത്തിടെ 105 കോടതികൾ സ്ഥാപിച്ചു. 24 മണിക്കൂറും പ്രവർത്തിക്കുന്ന പേപ്പർ രഹിത ഡിജിറ്റൽ കോടതി കൊല്ലത്ത് സ്ഥാപിച്ചു. കൂടുതൽ തസ്തികകൾ സൃഷ്ടിച്ചിട്ടുണ്ടെന്നും മുഖ്യമന്ത്രി പിണറായി വിജയൻ പറഞ്ഞു.

രാജ്മോഹൻ ഉണ്ണിത്താൻ എം പി സുവനീർ പ്രകാശനം ചെയ്‌തു.  ഹൊസ്‌ദുർഗ് ബാറിൽ 50 വർഷം പൂർത്തിയാക്കുകയും പ്രാക്‌ടിസ് തുടരുകയും ചെയ്യുന്ന സീനിയർ അഭിഭാഷകരായ യു ബി മുഹമ്മദ്, സി കെ ശ്രീധരൻ, എം സി ജോസ്, പി അപ്പുക്കുട്ടൻ, മാത്യൂസ് തെരുവപ്പുഴ, എ വി ജയചന്ദ്രൻ എന്നിവരെ ആദരിച്ചു. ഒരു വർഷം നീണ്ട ആഘോഷത്തിനാണ് ഇപ്പോൾ സമാപനമായത്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Chief Minister Pinarayi Vijayan emphasized the need for using modern technology to speed up case disposal in courts to prevent delays in justice.

#PinarayiVijayan, #ModernTechnology, #CourtCases, #Justice, #KeralaNews, #SpeedyJustice