യൂട്യൂബിന് മലയാളത്തില്‍ 100 ശതമാനത്തിലേറെ വാര്‍ഷിക വളര്‍ച്ച; 10 ലക്ഷത്തിലേറെ സബ്‌സ്‌ക്രൈബേഴ്‌സുള്ള മലയാളം ചാനലുകള്‍ 17 ആയി ഉയര്‍ന്നു, 'കരിക്ക്' ഏറ്റവും കൂടുതല്‍ സബ്‌സ്‌ക്രൈബേഴ്‌സുള്ള മലയാളം കോമഡി ചാനല്‍

കൊച്ചി: (www.kasargodvartha.com 28.07.2019) യൂട്യൂബിന് മലയാളത്തില്‍ 100 ശതമാനത്തിലേറെ വാര്‍ഷിക വളര്‍ച്ചയുണ്ടായതായി യൂട്യൂബ് ഇന്ത്യയുടെ കണ്ടന്റ് പാര്‍ട്ണര്‍ഷിപ്പ് വിഭാഗം ഡയറക്ടര്‍ സത്യ രാഘവന്‍ അറിയിച്ചു. 10 ലക്ഷത്തിലേറെ സബ്‌സ്‌ക്രൈബേഴ്‌സുള്ള മലയാളം ചാനലുകള്‍ 17 ആയി ഉയര്‍ന്നതായും അഞ്ചിനും 10 ലക്ഷത്തിനും ഇടയിലുള്ള 50 ചാനലുകളും ഒരു ലക്ഷത്തിലേറെ വരിക്കാറുള്ള 400 ഓളം ചാനലുകള്‍ ഉണ്ടെന്നും അദ്ദേഹം അറിയിച്ചു.

കഴിഞ്ഞ മൂന്നു വര്‍ഷം കൊണ്ടാണ് ഏറ്റവുമധികം വളര്‍ച്ചയുണ്ടായത്. വിവിധ മാധ്യമ സ്ഥാപനങ്ങളുടെ ചാനലുകള്‍ ഒഴിവാക്കിയാല്‍ കോമഡി വീഡിയോകള്‍ ഒരുക്കുന്ന കരിക്ക് ആണ് ഏറ്റവുമധികം വരിക്കാരുള്ള മലയാളം യൂട്യൂബ് ചാനല്‍. 26 ലക്ഷം വരിക്കാരാണ് കരിക്കിനുള്ളത്. ഇതുകൂടാതെ എം 4 ടെക് (18 ലക്ഷം), എം ടി വ്‌ളോഗ്, വില്ലേജ് ഫുഡ് ചാനല്‍, വീണാസ് കറി വേള്‍ഡ്, സ്‌കിന്നി റെസിപീസ്, ലില്ലീസ് നാച്വറല്‍ ടിപ്‌സ് എന്നിവയാണ് 10 ലക്ഷത്തിലേറെ വരിക്കാരുള്ള മറ്റു ചാനലുകള്‍.