ലോകം ഇനി പന്തിന് ചുറ്റും കറങ്ങും; വ്യാഴാഴ്ച കിക്കോഫ്; നാടെങ്ങും കളി ആരവത്തിൽ, ഖത്തർ ടീമിൽ മലയാളി സാന്നിധ്യവും; ഉദ്ഘാടന മത്സരത്തിൽ മെക്സിക്കോയും സൗത്ത് ആഫ്രിക്കയും തമ്മിൽ

കാസർകോട്: (KasargodVartha) ലോകകപ്പ് ഫുട്ബോളിനെ വരവേൽക്കാൻ ഫുട്ബോൾ ആരാധകർ പൂർണമായി ഒരുങ്ങിക്കഴിഞ്ഞു. വ്യാഴാഴ്ചയാണ് ലോകകപ്പ് പോരാട്ടങ്ങൾക്ക് കിക്കോഫ് കുറിക്കുന്നത്. മെക്സിക്കോയും സൗത്ത് ആഫ്രിക്കയും തമ്മിലാണ് ഉദ്ഘാടന മത്സരം. കിക്ക്-ഓഫിന് 90 മിനിറ്റ് മുൻപ് മെക്സിക്കോ സിറ്റി സ്റ്റേഡിയത്തിലാണ് വർണാഭമായ ചടങ്ങുകൾ നടക്കുന്നത്.

ഇനിയുള്ള ഒരു മാസക്കാലത്തിലധികം ഫുട്ബോൾ പ്രേമികൾക്ക് ഉറക്കമില്ലാത്ത രാപ്പകലുകളാണ്. കാസർകോട്ട് വിവിധ ഭാഗങ്ങളിൽ വമ്പൻ ടീമുകളുടെ ഫാൻസുകാർ കൂറ്റൻ ഫ്ലെക്സുകളും കട്ടൗട്ടുകളും ഉയർത്തിയിട്ടുണ്ട്. ഇതോടൊപ്പം പ്രാദേശിക ഫുട്ബോൾ ടൂർണമെൻ്റുകളും സജീവമാണ്.

പുലർച്ചെയുള്ള മത്സരങ്ങൾ; സ്ക്രീനുകൾ കുറയും

ഇത്തവണ മത്സരങ്ങൾ അമേരിക്ക, കാനഡ, മെക്സിക്കോ എന്നീ വടക്കേ അമേരിക്കൻ രാജ്യങ്ങളിലാണ് നടക്കുന്നത്. അതുകൊണ്ടുതന്നെ ഇന്ത്യ ഉൾപ്പെടെയുള്ള ഏഷ്യൻ രാജ്യങ്ങളിൽ കൂടുതലും പുലർച്ചെ മുതലാണ് തത്സമയം കളി കാണാൻ സാധിക്കുകയുള്ളൂ.

ഇത് വലിയ സ്ക്രീനിൽ കളി കാണാൻ ആഗ്രഹിക്കുന്ന ഫുട്ബോൾ ആസ്വാദകരെ നേരിയ നിരാശയിലാക്കുന്നുണ്ട്. ഉറക്കമൊഴിഞ്ഞ് ആളുകൾ കളി കാണാൻ എത്തുമോ എന്ന ആശങ്കയുള്ളതിനാൽ പല ക്ലബ്ബുകളും വലിയ സ്ക്രീനുകൾ സ്ഥാപിച്ചിട്ടില്ല. എങ്കിലും ഒട്ടുമിക്ക ക്ലബ്ബുകളിലും കളി കാണാനുള്ള ഇൻഡോർ സൗകര്യങ്ങൾ ഒരുക്കിയിട്ടുണ്ട്.

നാടെങ്ങും ഫ്ലെക്സ് യുദ്ധം

ഇഷ്ടപ്പെട്ട ടീമുകളുടെ ജേഴ്സി അണിഞ്ഞാണ് പ്രാദേശിക ക്ലബ്ബുകൾ ടൂർണമെൻ്റുകൾ സംഘടിപ്പിക്കുന്നത്. ആരാധകർ ഏറെയുള്ള അർജൻ്റീന, ബ്രസീൽ, ഫ്രാൻസ്, പോർച്ചുഗൽ, ഇംഗ്ലണ്ട്, ജർമനി, ഇറാൻ, സൗദി അറേബ്യ, ഖത്തർ, ഇറാഖ് തുടങ്ങിയ ടീമുകളുടെ ഫ്ലെക്സുകളും കട്ടൗട്ടുകളുമാണ് വിവിധയിടങ്ങളിൽ ഉയർന്നിട്ടുള്ളത്. ഓസ്ട്രിയ, മൊറോക്കോ, കൊളംബിയ, ടുണീഷ്യ, ക്രൊയേഷ്യ, സ്പെയിൻ, സൗത്ത് ആഫ്രിക്ക തുടങ്ങിയ രാജ്യങ്ങൾക്കും ജില്ലയിൽ ആരാധകരുണ്ട്.

മലയാളി തിളക്കത്തിൽ ഖത്തർ; വിളംബര ജാഥ ബുധനാഴ്ച

ഈ ലോകകപ്പിൽ ഏറ്റവും ശ്രദ്ധേയമായത് മലയാളി താരം തഹ്‌സിൻ മുഹമ്മദ് ഖത്തർ ടീമിൽ ഇടം പിടിച്ചുവെന്നതാണ്. അതുകൊണ്ടുതന്നെ ഖത്തർ ടീമിന് ഇപ്രാവശ്യം ജില്ലയിൽ ആരാധകർ ഏറെയാണ്. ടൂർണമെൻ്റിന് മുന്നോടിയായി മൊഗ്രാലിൽ ബുധനാഴ്ച ദേശീയവേദിയുടെ ആഭിമുഖ്യത്തിൽ സന്തോഷ് ട്രോഫി താരം എം എൽ ദിൽഷാദിൻ്റെ നേതൃത്വത്തിൽ ലോകകപ്പ് ഫുട്ബോൾ വിളംബര ജാഥ സംഘടിപ്പിക്കും. 

ചടങ്ങിൽ ദിൽഷാദിന് അനുമോദനവും ദേശീയവേദി ഒരുക്കിയിട്ടുണ്ട്. ലോകകപ്പ് ഫുട്ബോൾ രണ്ടാം റൗണ്ട് മത്സരങ്ങളിൽ ദിവസേന പ്രവചന മത്സരവും സമ്മാന വിതരണവും നടത്താനും ദേശീയവേദി തീരുമാനിച്ചിട്ടുണ്ട്.

കൊച്ചുകുട്ടികൾ മുതൽ മുതിർന്ന പൗരന്മാർ വരെ ഓരോ ടീമിനേയും നെഞ്ചേറ്റുന്നു. സ്പോർട്സ് സാധനങ്ങൾ വിൽക്കുന്ന കടകൾക്ക് ഇപ്പോൾ കൊയ്ത്തുത്സവമാണ്. ഫുട്ബോൾ ടീമുകളുടെ ജേഴ്‌സികളും പന്തുകളും ചൂടപ്പം പോലെ വിറ്റഴിയുന്നു. ഫ്ലെക്സ് കടക്കാരും തിരക്കിലാണ്. കോടികൾ മറിയുന്ന ഉത്സവമാണ് ഇന്ന് ലോകകപ്പ് ഫുട്ബോൾ മത്സരം.

വാതുവെപ്പുകാരും ഇപ്പോൾ സജീവമാണ്. അർജൻ്റീന, ബ്രസീൽ, ജർമനി, ഫ്രാൻസ്, പോർച്ചുഗൽ തുടങ്ങിയ ടീമുകൾക്ക് വേണ്ടിയാണ് വാതുവെപ്പ്. തലമുണ്ടനം മുതൽ പാതി മീശ വടി വരെ വാതുവെപ്പ് നീളുന്നു. പ്രവചന മത്സരങ്ങൾക്ക് ക്യാഷ് പ്രൈസുകളാണ് സമ്മാനം.

ലോകകപ്പ് ഫുട്ബോൾ ആവേശം പങ്കുവെക്കുന്ന ഈ വാർത്ത സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. കായിക വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: The Football World Cup kicks off on Thursday in North America, with matches broadcasting early morning in India, sparking immense local excitement including a promotional rally in Mogral and special support for Qatar due to Malayali player Tahsin Mohammed's inclusion.

#WorldCup2026 #FootballWorldCup #QatarTeam #TahsinMohammed #KasaragodNews #Mogral #MalayalamNews #FootballFans #AparnaNews