അന്താരാഷ്ട്ര ഷട്ടിൽ മാമാങ്കത്തിന് തൃക്കരിപ്പൂർ വേദിയാകുന്നു!

കാസർകോട്: (KasargodVartha) ഉത്തര കേരളത്തിലെ ബാഡ്മിന്റൺ പ്രേമികളുടെ ചിരകാല സ്വപ്നം പൂവണിയാൻ ഇനി രണ്ടു നാൾ മാത്രം. തൃക്കരിപ്പൂരിലെ ഫായിക്ക ഇൻഡോർ അക്കാദമിയിൽ ഓഗസ്റ്റ് 9, 10 തീയതികളിൽ ആദ്യ അന്താരാഷ്ട്ര ബാഡ്മിന്റൺ ടൂർണമെന്റിന് വേദി ഒരുങ്ങുന്നു.

ലോക ബാഡ്മിന്റൺ രംഗത്തെ പ്രമുഖ ശക്തികളായ ഇന്തോനേഷ്യ, മലേഷ്യ, ഇന്ത്യ എന്നീ രാജ്യങ്ങളിൽ നിന്നുള്ള എട്ടു ടീമുകളാണ് ടൂർണമെന്റിൽ പങ്കെടുക്കുന്നത്. രണ്ടു ഗ്രൂപ്പുകളായി തിരിഞ്ഞ് മത്സരിക്കുന്ന ഡബിൾസ് ടൂർണമെന്റിലെ വിജയികൾക്ക് ഫായിക്ക ഇൻഡോർ അക്കാദമി സ്പോൺസർ ചെയ്യുന്ന രണ്ട് ലക്ഷം രൂപ സമ്മാനമായി ലഭിക്കും. ആദ്യ ദിവസം വൈകുന്നേരം മൂന്ന് മണിക്ക് ലീഗ് റൗണ്ട് മത്സരങ്ങൾ നടക്കും. സെമിഫൈനലും ഫൈനൽ മത്സരവും അടുത്ത ദിവസമാണ് നടക്കുക.

2017 മുതൽ 2024 വരെ നിരവധി കിരീടങ്ങൾ നേടിയ ലോക ഒന്നാം നമ്പർ താരങ്ങളായിരുന്ന ഗിഡിയോണിന്റെയും സുകാമാല്യയുടെയും നാട്ടിൽനിന്നുള്ള യുവതാരങ്ങളായ 20-കാരൻ ഹംസയും ബഗാസുമാണ് ടൂർണമെന്റിലെ പ്രധാന ശ്രദ്ധാകേന്ദ്രം. 

എതിരാളികൾക്കുമേൽ ഇടതടവില്ലാതെ ആക്രമണം നടത്തിയും അവിസ്മരണീയമായ പ്രതിരോധമുഹൂർത്തങ്ങൾ സമ്മാനിച്ചും കളിക്കളത്തിൽ തീ പടർത്താൻ കഴിവുള്ളവരാണവർ. ലോക റാങ്കിംഗിൽ രണ്ടും മൂന്നും സ്ഥാനങ്ങൾ അലങ്കരിക്കുന്ന മലേഷ്യൻ താരങ്ങളും എതിരാളികൾക്ക് കടുത്ത വെല്ലുവിളി ഉയർത്തും.

ഏകദേശം 73 വർഷത്തെ ചരിത്രത്തിൽ ആദ്യമായി പത്തുവർഷം ചാമ്പ്യന്മാരായ ഇന്തോനേഷ്യയെ തകർത്ത് തോമസ് കപ്പ് ഇന്ത്യയിലെത്തിച്ച ചിരാഗിന്റെയും സ്വാത്തിക്കിന്റെയും നാട്ടിൽനിന്നുള്ള ഇന്ത്യൻ താരങ്ങൾ വിദേശ താരങ്ങൾക്കുമേൽ ആധിപത്യം നേടി കിരീടം നേടാൻ കഴിവുള്ളവരാണ്. ഇക്കഴിഞ്ഞ പൂനെ നാഷണൽ ചാമ്പ്യന്മാരായ അരുൺ ജോർജും ശിവശങ്കറും കേരളത്തെ പ്രതിനിധീകരിച്ച് ടൂർണമെന്റിൽ പങ്കെടുക്കും.

അതിമനോഹരമായ ഫായിക്ക ഇൻഡോർ അക്കാദമിയുടെ മധ്യഭാഗത്ത് കൃത്രിമ വെളിച്ചത്തിന്റെ സഹായത്തോടെ ഒരുക്കിയ ഷട്ടിൽ കോർട്ടിൽ ഫോർ ഹാൻഡ് ജമ്പ് സ്മാഷ്, ഡ്രോപ്പ് ഷോട്ട്, മിന്നൽപ്പിണർ കണക്കെ പായുന്ന ബാക്ക് ഹാൻഡ് ഷോട്ടുകൾ എന്നിവ കണ്ട് ആവേശംകൊള്ളാൻ അവസാനവട്ട ഒരുക്കത്തിലാണ് സംഘാടകരായ ഫായിക്കൻസും ഷട്ടിൽ പ്രേമികളും.

വാർത്താസമ്മേളനത്തിൽ ടി.എം. അമീർ ഹാജി, അബ്ദുല്ല കെ.പി, ടി.എം. അബ്ദുൽ സലാം, കെ. മുഹമ്മദ് ശരീഫ്, സജിത്ത് പലേരി എന്നിവർ പങ്കെടുത്തു.

തൃക്കരിപ്പൂരിലെ ഈ അന്താരാഷ്ട്ര ടൂർണമെന്റിനെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Trikkaripur to host its first international badminton tournament.

#Badminton, #Trikkaripur, #InternationalTournament, #Kerala, #Sports, #BadmintonKerala