സന്തോഷ് ട്രോഫി: അസമിനെതിരെ ഇഞ്ചുറി ടൈമിൽ ഇടിമുഴക്കമായി ദിൽഷാദ്; കാത്തിരുന്ന് കിട്ടിയ ഗോൾ ഉപ്പയ്ക്ക് സമർപ്പിച്ച് മൊഗ്രാലിന്റെ താരം

കാസർകോട്/മൊഗ്രാൽ: (KasargodVartha) ഫുട്ബോളിന്റെ ഈറ്റില്ലമായ മൊഗ്രാലിന് ഇത് അഭിമാന നിമിഷം. 59 വർഷത്തെ നീണ്ട ഇടവേളയ്ക്ക് ശേഷം സന്തോഷ് ട്രോഫിയിൽ കേരളത്തിന്റെ ജഴ്സി അണിഞ്ഞ മൊഗ്രാലിന്റെ സ്വന്തം താരം അബൂബക്കർ ദിൽഷാദ്, നിർണായക ഗോളിലൂടെ നാടിന്റെ യശസ്സുയർത്തി. അസമിലെ ദിബ്രുഗഡ് സിലാർ സ്‌റ്റേഡിയത്തിൽ നടന്ന ക്വാർട്ടർ ഫൈനൽ മത്സരത്തിൽ ആതിഥേയരായ അസമിനെ എതിരില്ലാത്ത മൂന്ന് ഗോളുകൾക്ക് തകർത്ത് കേരളം സെമിയിലേക്ക് കുതിച്ചപ്പോൾ, അവസാന ഗോൾ ദിൽഷാദിന്റെ വകയായിരുന്നു.

പകരക്കാരനായി വന്ന് വിജയമുറപ്പിച്ചു

മത്സരത്തിന്റെ 77-ാം മിനിറ്റിൽ ഒ.എം ആസിഫിന് പകരക്കാരനായിട്ടാണ് അബൂബക്കർ ദിൽഷാദ് കളത്തിലിറങ്ങിയത്. കേരളം 2-0 ന് മുന്നിട്ടുനിൽക്കുമ്പോൾ ഇഞ്ചുറി ടൈമിൽ (92-ാം മിനിറ്റ്) ആയിരുന്നു മൊഗ്രാൽ താരം വല കുലുക്കിയത്. വലതു വിങ്ങിലൂടെ ഇ. സജീഷ് നടത്തിയ മുന്നേറ്റമാണ് ഗോളിൽ കലാശിച്ചത്. വിങ്ങിൽ നിന്നും ബോക്സിലേക്ക് കട്ട് ബാക്ക് ചെയ്തുനൽകിയ പന്ത് കൃത്യമായി പോസ്റ്റിലേക്ക് തട്ടിയിട്ട് അറ്റാക്കിങ് മിഡ്‌ഫീൽഡറായ ദിൽഷാദ് കേരളത്തിന്റെ ലീഡ് മൂന്നായി ഉയർത്തി. ഗോൾ കൂടാതെ മൈതാനം നിറഞ്ഞു കളിക്കാനും ദിൽഷാദിന് സാധിച്ചു. അസം താരങ്ങളുടെ ഹൈബോൾ തന്ത്രങ്ങളെ ശാരീരികമായി നേരിട്ട് പരാജയപ്പെടുത്തുന്നതിൽ ദിൽഷാദ് ഉൾപ്പെടെയുള്ള കേരള താരങ്ങൾ വിജയിച്ചു.

ഗോൾ ഉപ്പയ്ക്ക് സമർപ്പിക്കുന്നു

വിജയത്തിന് ശേഷം നാട്ടുകാർ ഫോണിൽ വിളിച്ചപ്പോഴെല്ലാം വികാരഭരിതനായാണ് ദിൽഷാദ് സംസാരിച്ചത്. 'എന്റെ ഈ ഗോൾ എന്റെ ഉപ്പയ്ക്ക് സമർപ്പിക്കുന്നു,' ഇതായിരുന്നു ദിൽഷാദിന്റെ വാക്കുകൾ. മൊഗ്രാൽ സ്പോർട്‌സ് ക്ലബ് ഫുട്ബോൾ ടീം മാനേജരും മുൻ ജില്ലാ ഫുട്‌ബോൾ ടീം മാനേജരുമായ എം.എൽ അബ്ബാസിന്റെയും അസൂറയുടെയും മകനാണ് ദിൽഷാദ്. തന്റെ ഫുട്ബോൾ കരിയറിലെ വളർച്ചയ്ക്ക് പിന്നിൽ ഉപ്പയുടെ വലിയ തോതിലുള്ള പ്രോത്സാഹനവും സഹായവും ഉണ്ടെന്ന് ദിൽഷാദ് പറഞ്ഞു.

ചരിത്രത്തിലേക്കൊരു ഗോൾ

ഫുട്ബോളിന്റെ ഗ്രാമമായ മൊഗ്രാലിൽ നിന്ന് കേരള ടീമിന് വേണ്ടി സന്തോഷ് ട്രോഫിയിൽ കളിക്കുന്ന രണ്ടാമത്തെ താരമാണ് അബൂബക്കർ ദിൽഷാദ്. 1966-ൽ മദ്രാസിൽ നടന്ന സന്തോഷ് ട്രോഫിയിൽ കേരളത്തിന് വേണ്ടി ജഴ്സി അണിഞ്ഞ പ്രൊഫ. പി.സി.എം കുഞ്ഞിയാണ് ഈ നേട്ടം ആദ്യം കൈവരിച്ചത്. 59 വർഷങ്ങൾക്ക് ശേഷമാണ് ആ ചരിത്രം ദിൽഷാദിലൂടെ ആവർത്തിക്കുന്നത്.

കഠിനാധ്വാനത്തിന്റെ വഴി

കുമ്പള ഗവ. ഹൈസ്കൂളിൽ പത്താം ക്ലാസ് കഴിഞ്ഞ് മൊഗ്രാൽ പുത്തൂർ ഗവ. ഹയർസെക്കൻഡറി സ്‌കൂളിൽ പ്ലസ് ടു വിദ്യാർഥിയായിരിക്കെയാണ് താരം ഫുട്ബോളിലേക്ക് കാര്യമായി ഇറങ്ങിയത്. 16-ാം വയസ്സിൽ കളി തുടങ്ങിയെങ്കിലും 20-ാം വയസ്സിലായിരുന്നു പ്രൊഫഷണൽ തലത്തിലേക്ക് പ്രവേശിച്ചത്. കുമ്പള ഫുട്ബോൾ അക്കാദമിയുടെ പരിശീലനം ഇതിന് സഹായകമായി.

2016-ൽ ജില്ലാ ഫുട്ബോൾ ടീം വൈസ് ക്യാപ്റ്റനായി ജില്ലാ ടീമിൽ ഇടം നേടി. 18-ാം വയസ്സിൽ ഗോവയിൽ സെക്കൻഡ് ഡിവിഷൻ ഫുട്‌ബോളിൽ ഗോവ കൊങ്കിലു യൂണിയനു വേണ്ടിയും 2021-ൽ ഗോകുലം ടീമിനു വേണ്ടിയും ജഴ്‌സി അണിഞ്ഞു. കഴിഞ്ഞ മൂന്ന് വർഷമായി കേരള പ്രീമിയർ ലീഗിൽ റിയൽ മലബാർ എഫ്‌സിക്കു വേണ്ടിയാണ് കളിക്കുന്നത്. 2024-ലെ പ്രീമിയർ ലീഗിൽ ആറ് ഗോളുകൾ നേടി തിളങ്ങി. മുൻപ് സന്തോഷ് ട്രോഫി ക്യാമ്പുകളിൽ പങ്കെടുത്തിരുന്നെങ്കിലും നിർഭാഗ്യം കൊണ്ട് ടീമിൽ ഇടം ലഭിച്ചിരുന്നില്ല. എന്നാൽ ഇത്തവണ മികച്ച ഫോമും ഭാഗ്യവും ഒപ്പം നിന്നതോടെ ദിൽഷാദ് സന്തോഷ് ട്രോഫിയിൽ കേരളത്തിന്റെ ജഴ്സി അണിയുകയും നിർണായക ഗോൾ നേടുകയും ചെയ്തു.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത സുഹൃത്തുകൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Kerala secured a spot in the Santosh Trophy semi-finals with a 3-0 win over Assam. Mogral's Abubacker Dilshad scored the third goal in injury time, marking a historic moment for his village after 59 years. Dilshad dedicated his milestone goal to his father, ML Abbas.

#SantoshTrophy #KeralaFootball #DilshadMogral #KasaragodFootball #AssamVsKerala #IndianFootball #MogralSportsClub #GoalScorer