പള്ളിക്കുളം: നീന്തൽ പ്രിയരുടെ ഇഷ്ട കേന്ദ്രം; പ്രഭാത വ്യായാമം തുടരുന്നു

മൊഗ്രാൽ: (KasargodVartha) പ്രശസ്ത നീന്തൽ പരിശീലകൻ എം.എസ്. മുഹമ്മദ് കുഞ്ഞിയുടെ നീന്തൽ പരിശീലനം ഈ വർഷം ഉണ്ടായിരിക്കില്ല. മാമ്പഴം പറിക്കുന്നതിനിടെ മരച്ചില്ല ഒടിഞ്ഞുവീണ് ഗുരുതരമായി പരിക്കേറ്റ എം.എസ്. മുഹമ്മദ് കുഞ്ഞി കഴിഞ്ഞ ഏതാനും മാസങ്ങളായി ചികിത്സയിലായിരുന്നു. 

ഇപ്പോൾ ആരോഗ്യം വീണ്ടെടുത്ത് വരുന്നതിനിടയിലും, ഈ വർഷം നീന്തൽ പരിശീലനം നടത്തേണ്ടെന്ന് അദ്ദേഹം തീരുമാനിക്കുകയായിരുന്നു. കഴിഞ്ഞ മൂന്നര പതിറ്റാണ്ടായി നീന്തൽ പരിശീലനത്തിന്റെ പ്രധാന കേന്ദ്രമായി അറിയപ്പെടുന്ന മൊഗ്രാലിലെ കണ്ടത്തിൽ പള്ളിക്കുളത്തിൽ രാവിലെയും വൈകുന്നേരങ്ങളിലും കുളിക്കാനെത്തുന്നവരുടെ എണ്ണം ഏറെയാണ്. 

മൊഗ്രാലിലെ പ്രഭാത വ്യായാമ കൂട്ടായ്മയായ 'മെക് 7' അംഗങ്ങൾ പ്രഭാത വ്യായാമത്തിനുശേഷം നീന്തലിലും ഏർപ്പെടാറുണ്ട്. ഇതും വ്യായാമത്തിന്റെ ഭാഗമാണെന്ന് അംഗങ്ങൾ പറയുന്നു. 

അതുകൊണ്ടുതന്നെ രാവിലെ പള്ളിക്കുളം മെക് 7 അംഗങ്ങളെക്കൊണ്ട് നിറയുന്ന കാഴ്ചയാണ് കാണാൻ സാധിക്കുന്നത്. ഇത് അറിഞ്ഞ് പ്രഭാത നീന്തൽ വ്യായാമത്തിനായി നിരവധി പേരാണ് എത്തുന്നത്. എല്ലാവരും നീന്തൽ പഠിച്ചവരായതുകൊണ്ട് സംഘാടകർക്ക് ആശങ്കപ്പെടേണ്ടതില്ല.

വൈകുന്നേരങ്ങളിലും പള്ളിക്കുളത്തിൽ നിരവധിപേർ എത്തുന്നുണ്ട്. നീന്തൽ പരിശീലനം നേടിയ കുട്ടികൾ രക്ഷിതാക്കൾക്കൊപ്പമാണ് കുളിക്കാനെത്തുന്നത്. ജാഗ്രതക്കുറവ് ഉണ്ടാകാതിരിക്കാൻ രക്ഷിതാക്കൾ പ്രത്യേകം ശ്രദ്ധിക്കുന്നുണ്ട്. നീന്തൽ അറിയാത്ത കുട്ടികൾക്ക് രക്ഷിതാക്കൾതന്നെ നീന്തൽ പരിശീലനം നൽകുന്നുമുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Mogral Pallikulam remains popular for swimming despite coach's absence.

#Mogral #Pallikulam #Swimming #MorningExercise #KeralaHealth #LocalNews