കായിക ഭൂപടത്തിൽ മൊഗ്രാലിന്റെ ഇരട്ടനേട്ടം; സന്തോഷ് ട്രോഫിയിൽ ദിൽഷാദും ഗുസ്തിയിൽ സ്വർണ്ണവുമായി യാക്കൂബും

കാസർകോട്: (KasargodVartha) കായിക ഭൂപടത്തിൽ കാസർകോട് മൊഗ്രാൽ ഗ്രാമത്തിന് അഭിമാനമായി ഇരട്ട നേട്ടം. ഫുട്ബോളിലും ഗുസ്തിയിലുമായി രണ്ട് യുവതാരങ്ങളാണ് നാടിന്റെ യശസ്സ് ഉയർത്തിയത്. മൊഗ്രാൽ സ്പോർട്സ് ക്ലബ് താരം അബൂബക്കർ ദിൽഷാദ് എം.എൽ സന്തോഷ് ട്രോഫി ഫുട്ബോളിനുള്ള കേരള ടീമിൽ ഇടം നേടിയപ്പോൾ, സംസ്ഥാന ഗുസ്തി ചാമ്പ്യൻഷിപ്പിൽ മുഹമ്മദ് യാക്കൂബ് സ്വർണ്ണ മെഡൽ കരസ്ഥമാക്കി.

സന്തോഷ് ട്രോഫിയിൽ ചരിത്രമായി ദിൽഷാദ്

പരേതനായ പ്രൊഫ. പി.സി.എം കുഞ്ഞിക്ക് ശേഷം മൊഗ്രാലിൽ നിന്ന് സന്തോഷ് ട്രോഫിയിൽ കേരളത്തിന് വേണ്ടി ജേഴ്സി അണിയുന്ന രണ്ടാമത്തെ താരമെന്ന ബഹുമതി ഇനി അബൂബക്കർ ദിൽഷാദിന് സ്വന്തം. 

ഫുട്ബോൾ പാരമ്പര്യമുള്ള കുടുംബത്തിൽ നിന്നാണ് ദിൽഷാദിന്റെ വരവ്. മൊഗ്രാൽ സ്പോർട്സ് ക്ലബ് റഫറിയും ടീം കോച്ചും മാനേജരുമൊക്കെയായി പ്രവർത്തിച്ചുവരുന്ന എം.എൽ അബ്ബാസിന്റെ മകനാണ് ദിൽഷാദ്. പരേതനായ മുത്തച്ഛൻ എം.എൽ മുഹമ്മദും ക്ലബ്ബ് രൂപീകരിച്ച കാലം തൊട്ട് ഫുട്ബോൾ താരമായിരുന്നു.

2022-23 വർഷം മൊഗ്രാൽ സ്പോർട്സ് ക്ലബ്ബിലെ മുഹമ്മദ് ഷഹാമത്ത് കെ.എം കേന്ദ്ര ഭരണ പ്രദേശമായ ദാമൻ ആൻഡ് ദിയു ക്ലബ്ബിന് വേണ്ടി സന്തോഷ് ട്രോഫിയിൽ ജേഴ്സി അണിഞ്ഞത് മൊഗ്രാലിന്റെ മറ്റൊരു നേട്ടമായിരുന്നു. ഇപ്പോൾ സ്വന്തം സംസ്ഥാനത്തിന് വേണ്ടി കളിക്കാൻ അവസരം ലഭിച്ച ദിൽഷാദിലൂടെ മൊഗ്രാലിന്റെ ഫുട്ബോൾ പാരമ്പര്യം വീണ്ടും തിളങ്ങുകയാണ്.

ഗോദയിൽ പൊന്നും തിളക്കവുമായി യാക്കൂബ്

റെസ്ലിംഗ് അസോസിയേഷൻ കണ്ണൂരിൽ സംഘടിപ്പിച്ച കേരള സ്റ്റേറ്റ് അണ്ടർ-15 റെസ്ലിംഗ് ചാമ്പ്യൻഷിപ്പിലാണ് മൊഗ്രാലിലെ മുഹമ്മദ് യാക്കൂബ് സ്വർണ്ണം നേടിയത്. തൃശൂർ സ്പോർട്സ് ഡിവിഷനിലെ ബോയ്സ് സ്കൂളിൽ ഒമ്പതാം ക്ലാസ് വിദ്യാർത്ഥിയാണ് യാക്കൂബ്.

കഴിഞ്ഞ രണ്ട് പ്രാവശ്യവും മത്സരങ്ങളിൽ സ്വർണ്ണവും വെള്ളിയും യാക്കൂബ് കരസ്ഥമാക്കിയിരുന്നു. സ്പോർട്സ് ക്വാട്ടയിൽ സെലക്ഷൻ ലഭിച്ചാണ് തൃശൂരിൽ പഠനം തുടരുന്നത്. സ്കൂൾ ടീമിന് വേണ്ടിയും കാസർകോട് ജില്ലയ്ക്ക് വേണ്ടിയും ഗുസ്തി മത്സരങ്ങളിൽ സജീവ സാന്നിധ്യമാണ് ഈ മിടുക്കൻ. മൊഗ്രാലിലെ കെ.ബി യൂസഫ് പാച്ചാനി - മൈമൂന ദമ്പതികളുടെ മകനാണ്.

കായികരംഗത്ത് മികച്ച പ്രകടനം നടത്താൻ മൊഗ്രാലിലെ യുവതാരങ്ങൾക്ക് കഴിഞ്ഞതിൽ ഏറെ സന്തോഷത്തിലാണ് മൊഗ്രാൽ എന്ന ഫുട്ബോൾ ഗ്രാമം. ഇരുവർക്കും അനുമോദനം നൽകാനുള്ള തയ്യാറെടുപ്പിലാണ് നാട്ടിലെ സന്നദ്ധ സംഘടനകൾ.

ദിൽഷാദിനും യാക്കൂബിനും അഭിനന്ദനങ്ങൾ അറിയിക്കൂ.  ഈ വാർത്ത ഷെയർ ചെയ്യൂ.

Article Summary: Mogral natives Dilshad selected for Kerala Santosh Trophy team and Yakoob wins gold in State Wrestling Championship.

#Mogral #Sports #SantoshTrophy #Wrestling #Kasaragod #Dilshad #Yakoob