മേല്പറമ്പിൽ ഫുട്ബോൾ ആരവം വീണ്ടും! പാദൂർ കുഞ്ഞാമു ഹാജി സ്മാരക ടൂർണമെൻ്റ് മെയ് 10 മുതൽ

മേല്പറമ്പ്: (KasargodVartha) ഫുട്ബോൾ പ്രേമികൾക്ക് ആവേശത്തിൻ്റെ ദിനങ്ങൾ സമ്മാനിക്കാൻ മേല്പറമ്പ് ചന്ദ്രഗിരി ഹയർ സെക്കന്ററി സ്കൂൾ ഗ്രൗണ്ട് ഒരുങ്ങിക്കഴിഞ്ഞു. നീണ്ട ഇടവേളയ്ക്ക് ശേഷം, കല, കായിക, ജീവകാരുണ്യ രംഗത്ത് നാല് പതിറ്റാണ്ടുകളായി സജീവമായ തമ്പ് മേല്പറമ്പും ചന്ദ്രഗിരി മേല്പറമ്പും സംയുക്തമായി സംഘടിപ്പിക്കുന്ന ഫുട്ബോൾ ടൂർണമെൻ്റിനാണ് ഇവിടെ അരങ്ങൊരുങ്ങുന്നത്. മേല്പറമ്പിൽ പുതുതായി സജ്ജമാക്കിയ ‘വെൽഫിറ്റ് ഇൻ്റർനാഷണൽ ഫ്ലഡ് ലൈറ്റ് സ്റ്റേഡിയത്തിൽ 8000 പേർക്ക് ഇരിക്കാവുന്ന ഗാലറിയും പൂർത്തിയായിക്കഴിഞ്ഞു.

ഈ ടൂർണമെൻ്റ് രാഷ്ട്രീയ, കല, സാംസ്കാരിക, സാമൂഹിക രംഗത്തെ നിറസാന്നിധ്യവും, 10 വർഷം ചെമ്മനാട് ഗ്രാമ പഞ്ചായത്ത് പ്രസിഡൻ്റായും ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാനുമായിരുന്ന ബഹുമാനപ്പെട്ട പാദൂർ കുഞ്ഞാമു ഹാജിയുടെ സ്മരണാർത്ഥമാണ് നടത്തപ്പെടുന്നത്.

കേരളത്തിലെ സെവൻസ് ഫുട്ബോൾ രംഗത്തെ പ്രശസ്തരായ 16 ടീമുകൾ ഈ ടൂർണമെൻ്റിൽ മാറ്റുരയ്ക്കും. സൂപ്പർ സ്റ്റുഡിയോ മലപ്പുറം, ഫിഫ മഞ്ചേരി, സബാൻ കോട്ടക്കൽ, റോയൽ ട്രാവൽസ്, അൽ മദീന ചെറുപ്പളശ്ശേരി, എഫ് സി നെല്ലിക്കൂത്ത്, ലിൻഷാ മെഡിക്കൽസ്, യൂറോ സ്പോർട്സ്, കെ ആർ എസ് കോഴിക്കോട്, ഷൂട്ടേഴ്സ് പടന്ന, മെഡിഗാർഡ് അരീക്കോട്, ബ്രദേഴ്സ് മൊഗ്രാൽ, എഫ് സി കാളികാവ്, കെ എം ജി മാവൂർ, ലക്കി സോക്കർ കോട്ടപ്പുറം എന്നീ ടീമുകളാണ് കിരീടത്തിനായി പോരാടുന്നത്. വിവിധ പ്രാദേശിക ടീമുകൾക്ക് ഈ പ്രമുഖ ടീമുകൾ ജേഴ്സി സമ്മാനിക്കും എന്നതും ടൂർണമെൻ്റിൻ്റെ പ്രത്യേകതയാണ്.

മെയ് 10 ന് ശനിയാഴ്ച നടക്കുന്ന ഉദ്ഘാടന മത്സരത്തിൽ മെഡിഗാർഡ് അരീക്കോട് ഉദയ പറമ്പിൽ മലപ്പുറവുമായി ഏറ്റുമുട്ടും. ടൂർണമെൻ്റിലെ വിജയികൾക്ക് പാദൂർ ട്രോഫിയും, ലേക്ഷോർ ഹോസ്പിറ്റൽ നൽകുന്ന ആകർഷകമായ സമ്മാനത്തുകയും ലഭിക്കും. റണ്ണേഴ്സ് അപ്പിന് അൽ മൂസവി ട്രേഡിംഗ് ട്രോഫിയാണ് സമ്മാനം.

ഈ ടൂർണമെൻ്റിൻ്റെ പ്രധാന ലക്ഷ്യം യുവതലമുറയെ മയക്കുമരുന്നിൻ്റെയും ലഹരിയുടെയും പിടിയിൽ നിന്ന് ഫുട്ബോളിൻ്റെ ലഹരിയിലേക്ക് ആകർഷിക്കുക എന്നതാണ്. കോവിഡ് മഹാമാരിയുടെ കാലത്ത് തമ്പ് മേല്പറമ്പും ചന്ദ്രഗിരി മേല്പറമ്പും നിരവധി സാന്ത്വന പ്രവർത്തനങ്ങൾ നടത്തിയിരുന്നു. ഏറ്റവും ഒടുവിൽ കാസർഗോഡ് സി എച്ച് സെൻ്ററിന് 7,50,000 രൂപയുടെ ഡയാലിസിസ് മെഷീൻ നൽകിയത് ഇതിന് ഉദാഹരണമാണ്. ഇനിയും നിരവധി ജീവകാരുണ്യ പ്രവർത്തനങ്ങൾ നടത്താൻ ലക്ഷ്യമിട്ടാണ് ഈ ഫുട്ബോൾ ടൂർണമെൻ്റ് സംഘടിപ്പിക്കുന്നത്.

ടൂർണമെൻ്റിൻ്റെ വിജയത്തിനായി ജലീൽ കോയ ചെയർമാനായും, അഫ്സൽ സീസ്ലു ജനറൽ കൺവീനറായും, യൂസഫ് മേല്പറമ്പ് ട്രഷററായും 201 അംഗ സംഘാടക സമിതി രൂപീകരിച്ചിട്ടുണ്ട്. കല്ലട്ര മാഹിൻ ഹാജിയാണ് മുഖ്യ രക്ഷാധികാരി. ഈ ടൂർണമെൻ്റിൻ്റെ വിജയത്തിനായി മുഴുവൻപേരുടെയും അകമഴിഞ്ഞ സഹകരണവും സന്നിധ്യവും ഉണ്ടാകണമെന്ന് സംഘാടക സമിതി അഭ്യർത്ഥിച്ചു.

വാർത്താസമ്മേളനത്തിൽ ജലീൽ കോയ (ചെയർമാൻ, ടൂർണമെൻ്റ് കമ്മിറ്റി), യൂസഫ് മേല്പറമ്പ് (ട്രഷറർ), അബ്ദുൽ ഖാദർ ചട്ടഞ്ചാൽ (പബ്ലിസിറ്റി കമ്മിറ്റി ചെയർമാൻ), തമ്പ് പ്രസിഡൻ്റ് സൈഫുദ്ദീൻ കട്ടക്കാൽ, ചന്ദ്രഗിരി പ്രസിഡൻ്റ് ഡീഗോ നാസർ, വിജയൻ മാസ്റ്റർ, തുടങ്ങിയവർ പങ്കെടുത്തു.

ഈ ഫുട്ബോൾ വാർത്ത നിങ്ങളുടെ കൂട്ടുകാർക്കും ഷെയർ ചെയ്യൂ! അഭിപ്രായങ്ങൾ അറിയിക്കുക. 

Article Summary: Melparamba is set to host a football tournament in memory of Padoor Kunjamu Haji, featuring 16 prominent sevens teams from Kerala. The tournament aims to promote sports among youth and raise funds for charity. Matches begin on May 10th at the newly equipped Wellfit International Flood Light Stadium.
 

#MelparambaFootball #PadoorTournament #KeralaSevens #FootballFever #CharityEvent #SportsNews