ജില്ലാ ക്രിക്കറ്റ് അസോസിയേഷന്‍: ഹാരിസ് ചൂരിയെ തിരിച്ചെടുക്കണമെന്ന് ഓംബുഡ്‌സ്മാന്‍, സസ്‌പെന്‍ഷന്‍ നടപടി മരവിപ്പിച്ചു

കാസര്‍കോട്: (www.kasargodvartha.com 29.05.2019) ജില്ലാ ക്രിക്കറ്റ് അസോസിയേഷന്‍ പ്രസിഡന്റായിരിക്കെ ഹാരിസ് ചൂരിയെ സംഘടനയുടെ പ്രാഥമികാംഗത്വത്തില്‍ നിന്ന് പുറത്താക്കിയ കെസിഎ നടപടി ഓംബുഡ്‌സ്മാന്‍ സ്‌റ്റേ ചെയ്തു. അസോസിയേഷന്‍ അംഗമായി തുടര്‍ന്നും പ്രവര്‍ത്തിക്കാമെന്ന് ഉത്തരവില്‍ പറയുന്നു. ഇരുവിഭാഗങ്ങളും യോഗങ്ങളില്‍ കുഴപ്പങ്ങളുണ്ടാക്കാന്‍ പാടില്ലെന്നും സോഷ്യല്‍ മീഡിയയില്‍ സംഘടനാപരമായ ചര്‍ച്ചകള്‍ നടത്താന്‍ പാടില്ലെന്നും ഉത്തരവില്‍ പറയുന്നുണ്ട്.

സുപ്രീംകോടതി വിധിപ്രകാരം കേരള ക്രിക്കറ്റ് അസോസിയേഷന്‍ നിയമിച്ച ഓംബുഡ്‌സ്മാന്‍ ജസ്റ്റിസ് വി രാംകുമാറാണ് ഹാരിസ് ചൂരിക്കെതിരായ സസ്‌പെന്‍ഷന്‍ നടപടി മരവിപ്പിച്ചത്. കഴിഞ്ഞവര്‍ഷം സെപ്തംബര്‍ 28നാണ് ഹാരിസ് ചൂരിയെ പ്രാഥമികാംഗത്വത്തില്‍ നിന്ന് പുറത്താക്കി കെസിഎ ഉത്തരവിറങ്ങിയത്.

ഇതിനെതിരെ ഹാരിസ് ചൂരി നല്‍കിയ പരാതിയില്‍ ഇരുകൂട്ടരുടെയും വാദം കേട്ട ശേഷമാണ് നടപടി മരവിപ്പിച്ച് ഓംബുഡ്‌സ്മാന്‍ ഉത്തരവിട്ടത്. ഇതുസംബന്ധിച്ച് ഓംബുഡ്‌സ്മാന്റെ തുടര്‍ ഉത്തരവുകള്‍ ഉണ്ടാകുന്നതുവരെ ഹാരിസ് ചൂരിക്ക് ജില്ലാ ക്രിക്കറ്റ് അസോസിയേഷന്‍ അംഗമായി തുടരാമെന്നും ഉത്തരവിലുണ്ട്.