കാസർകോട് ക്രിക്കറ്റ് അസോസിയേഷൻ തിരഞ്ഞെടുപ്പ്: ഔദ്യോഗിക പാനലിന് വിജയം! കെ എം അബ്ദുൽ റഹ്മാൻ പ്രസിഡൻ്റ്, ടി എം ഇഖ്ബാൽ സെക്രട്ടറി

കാസർകോട്: (KasargodVartha) ജില്ലാ ക്രിക്കറ്റ് അസോസിയേഷൻ (Kasaragod District Cricket Association) തിരഞ്ഞെടുപ്പിൽ വാശിയേറിയ പോരാട്ടത്തിനൊടുവിൽ ഔദ്യോഗിക പാനലിന് വ്യക്തമായ വിജയം. പ്രസിഡൻ്റായി മുൻ കേരള ക്രിക്കറ്റ് അസോസിയേഷൻ ട്രഷറർ കെ.എം. അബ്ദുൽ റഹ്മാൻ തിരഞ്ഞെടുക്കപ്പെട്ടു. ഹോണററി സെക്രട്ടറിയായി ടി.എം. ഇഖ്ബാലും ട്രഷററായി സലാം ചെർക്കളയും വിജയിച്ചു.

മാന്യയിലെ വിൻടച്ച് ക്ലബ് ഹൗസിൽ നടന്ന ജനറൽ ബോഡി യോഗത്തിലാണ് തിരഞ്ഞെടുപ്പ് നടന്നത്. ആകെ 67 വോട്ടർമാരിൽ 65 പേർ വോട്ട് രേഖപ്പെടുത്തി. പ്രസിഡൻ്റ് സ്ഥാനത്തേക്ക് മത്സരിച്ച കെ.എം. അബ്ദുൽ റഹ്മാൻ 38 വോട്ടുകൾ നേടി 12 വോട്ടുകളുടെ ഭൂരിപക്ഷത്തിലാണ് വിജയിച്ചത്. എതിരാളിയായ പള്ളിക്കാൽ ക്രിക്കറ്റ് ക്ലബ്ബിലെ ഷാനവാസ് പാർസിക്ക് 26 വോട്ടുകൾ ലഭിച്ചു. ഒരു വോട്ട് അസാധുവായി.

ഹോണററി സെക്രട്ടറിയായി ടി.എം. ഇഖ്ബാൽ 40 വോട്ടുകൾ നേടി വിജയിച്ചു. കെ.എം. മുഹമ്മദ് ഫൈസൽ 24 വോട്ടുകൾ നേടി. ഒരു വോട്ട് അസാധുവായി. 16 വോട്ടുകളുടെ ഭൂരിപക്ഷമാണ് ഇഖ്ബാലിന് ലഭിച്ചത്.

ട്രഷറർ സ്ഥാനത്തേക്ക് മത്സരിച്ച സലാം ചെർക്കള 41 വോട്ടുകൾ നേടി 18 വോട്ടുകളുടെ ഭൂരിപക്ഷത്തിൽ വിജയിച്ചു. ടി.എം. നിസാർ 23 വോട്ടുകൾ നേടി. ഒരു വോട്ട് അസാധുവായി. കെ.സി.എ. ജോയിൻ്റ് സെക്രട്ടറി ബിനീഷ് കൊടിയേരി നിരീക്ഷകനായി പങ്കെടുത്തു.

മറ്റ് സ്ഥാനങ്ങളിലേക്ക് എതിരാളികളില്ലാത്തതിനാൽ വോട്ടെടുപ്പ് ആവശ്യമുണ്ടായില്ല. വൈസ് പ്രസിഡൻ്റുമാരായി എൻ.എ. അബ്ദുൽ ഖാദർ, കെ. വിനോദ് കുമാർ, ഫൈസൽ കുണ്ടിൽ, മഹ്മൂദ് കുഞ്ഞിക്കാനം എന്നിവർ തിരഞ്ഞെടുക്കപ്പെട്ടു. ജോയിൻ്റ് സെക്രട്ടറിയായി പി.എ. മുഹമ്മദ് അൻസാർ, അസിസ്റ്റൻ്റ് സെക്രട്ടറിയായി സി.എം.എസ്. ഖലീലുല്ല എന്നിവരും എതിരില്ലാതെ തിരഞ്ഞെടുക്കപ്പെട്ടു.

കേരള ക്രിക്കറ്റ് അസോസിയേഷൻ പ്രതിനിധികളായി ടി.എച്ച്. മുഹമ്മദ് നൗഫലും ടി.എ. മുഹമ്മദ് ജാനിഷും ജില്ലാ സ്പോർട്സ് കൗൺസിൽ പ്രതിനിധിയായി എം.എം. മുനീറും തിരഞ്ഞെടുക്കപ്പെട്ടു. 20 വർഷങ്ങൾക്ക് ശേഷമാണ് ജില്ലാ ക്രിക്കറ്റ് അസോസിയേഷനിൽ വോട്ടെടുപ്പ് നടക്കുന്നത്. പുതിയ ഭരണസമിതിയുടെ കാലാവധി നാല് വർഷമാണ്.

വിജയികളെ അഭിനന്ദിക്കാം, കമന്റ് ചെയ്യൂ. കൂടുതല്‍ വാര്‍ത്ത അറിയാൻ വാട്സ്ആപ്പ് ചാനൽ ഫോളോ ചെയ്യൂ.

Article Summary: The official panel led by K.M. Abdul Rahman won the Kasaragod District Cricket Association election. Rahman was elected President, T.M. Iqbal as Secretary, and Salam Cherkala as Treasurer in the first poll held in 20 years.

#Kasaragod #Cricket #KDCA #Election #SportsNews #KCA #KeralaCricket #KasaragodNews