കെ എം ഷാജിയെ വർഗീയവാദിയെന്ന് അധിക്ഷേപിച്ച് പോലീസ് ഉദ്യോഗസ്ഥൻ; റിപ്പോർട്ട് നൽകി സ്പെഷ്യൽ ബ്രാഞ്ച്, നടപടിയുണ്ടാകുമെന്ന് സൂചന

കാസർകോട്: (KasargodVartha) യുഡിഎഫ് സർക്കാരിൽ മന്ത്രിയായി ചുമതലയേറ്റ കെ എം ഷാജിക്കെതിരെ അധിക്ഷേപ പരാമർശവുമായി പോലീസ് ഉദ്യോഗസ്ഥൻ രംഗത്ത്.

'വർഗീയവാദി' എന്ന് വിശേഷിപ്പിച്ചുകൊണ്ടുള്ള വാട്‌സ്ആപ്പ് സന്ദേശമാണ് വിവാദമായത്. വെള്ളരിക്കുണ്ട് പോലീസ് സ്റ്റേഷനിലെ സിപിഒ സുജിത്താണ് സന്ദേശം പങ്കുവെച്ചതെന്നാണ് വിവരം. കാസർകോട് ജില്ലയിലെ പോലീസ് ഫ്രണ്ട്സ് ('POLICE FRIENDS') എന്ന വാട്‌സ്ആപ്പ് ഗ്രൂപ്പിലായിരുന്നു വിവാദ സന്ദേശം പ്രചരിച്ചത്.

മുൻ മുഖ്യമന്ത്രി പിണറായി വിജയൻ സത്യപ്രതിജ്ഞാ ചടങ്ങിൽ സ്വീകരിച്ച സംഭവത്തെ പരാമർശിച്ചുകൊണ്ടാണ് സന്ദേശം തുടങ്ങുന്നത്. തുടർന്ന് കെ എം ഷാജിയെ വ്യക്തിപരമായി അധിക്ഷേപിക്കുന്ന തരത്തിലുള്ള പരാമർശങ്ങളും ഉൾപ്പെടുത്തിയിരുന്നു.

'ഉറക്കത്തിൽ പോലും മതം മതം മാത്രമാണെന്ന് പറയുന്ന കെ എം ഷാജി', 'ആ മനുഷ്യൻ്റെ മുന്നിൽ നിവർന്ന് നിൽക്കാൻ നിൻ്റെ മുട്ടുവിറക്കും' തുടങ്ങിയ വാചകങ്ങളാണ് സന്ദേശത്തിലുണ്ടായിരുന്നത്.

രാഷ്ട്രീയപരവും വ്യക്തിപരവുമായ വിമർശനങ്ങളടങ്ങിയ ഈ സന്ദേശം പ്രതിഷേധത്തിനിടയാക്കിയിട്ടുണ്ട്.

സംഭവത്തിൽ സ്പെഷ്യൽ ബ്രാഞ്ച് ജില്ലാ പോലീസ് മേധാവിക്ക് റിപ്പോർട്ട് കൈമാറി. പോലീസ് ഉദ്യോഗസ്ഥൻ ഔദ്യോഗിക പദവിയിൽ ഇരിക്കെ രാഷ്ട്രീയപരമായും വ്യക്തിപരമായും ഇത്തരം പരാമർശങ്ങൾ നടത്തിയതിൽ വകുപ്പുതല അന്വേഷണം ആവശ്യപ്പെട്ട് ചർച്ചകൾ സജീവമാണ്.

സംഭവത്തിൽ നടപടിയുണ്ടാകുമെന്ന് ജില്ലാ പോലീസ് മേധാവി സൂചന നൽകിയിട്ടുണ്ട്.

പോലീസ് ഉദ്യോഗസ്ഥൻ്റെ പോസ്‌റ്റ് ഇങ്ങനെയാണ്:

'സത്യപ്രതിജ്ഞാ ചടങ്ങിനെത്തി പിണറായി വിജയൻ. ഈ വീഡിയോ നിങ്ങൾ സൂക്ഷിച്ചൊന്ന് കാണണം. കഴിഞ്ഞ രണ്ട് സത്യപ്രതിജ്ഞാ ചടങ്ങുകളും യുഡിഎഫ് മുട്ടുന്യായങ്ങൾ പറഞ്ഞ് ബഹിഷ്കരിച്ചിരുന്നു. അത് അവരുടെ സംസ്കാരം. ഇന്ന് അതൊന്നും കാര്യമാക്കാതെ ചടങ്ങിനെത്തിയ പിണറായി വിജയനെ സ്വീകരിക്കുന്ന കോൺഗ്രസുകാരെയും കേരള കോൺഗ്രസുകാരെയും എന്തിന് പിണറായി കൊടുവിഷം എന്ന് വിശേഷിപ്പിച്ച രാജീവ് ചന്ദ്രശേഖറിനെയും പരനാറിയെന്ന് വിശേഷിപ്പിച്ച പ്രേമചന്ദ്രനെയും നിങ്ങൾക്ക് കാണാം. എന്നാൽ ആ ഭാഗത്തു നിന്നും തൂവാല കൊണ്ട് മുഖം തുടച്ച് സ്കൂട്ടാകുന്ന ഒരു വർഗീയവാദിയെയും നിങ്ങൾക്ക് കാണാം. ഉറക്കത്തിൽപോലും മതം മതം മതമാണ് പ്രശ്നം എന്ന് പുലമ്പുന്ന കെ എം ഷാജിയെ. മൈക്ക് കെട്ടി അണികളുടെ മുന്നിൽ തെറി വിളിച്ച് ആളാകാൻ ഏതവനും പറ്റും ഷാജിയെ… ആ മനുഷ്യൻ്റെ മുന്നിൽ നിവർന്ന് നിൽക്കാൻ നിൻ്റെ മുട്ടുവിറക്കും ഷാജിയെ…നീ നിന്ന് വിറക്കാൻ പോകുന്നതേയുള്ളൂ….', എന്നാണ് വാട്സ്ആപ്പ് ഗ്രൂപ്പിൽ വന്ന സന്ദേശം.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതൽ വാർത്തകൾ അറിയാൻ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജില്‍ ഈ വാര്‍ത്തയുടെ താഴെ കമൻ്റായി രേഖപ്പെടുത്തുക.

Article Summary: A police officer from Vellarikkundu station is facing potential disciplinary action after sending a defamatory WhatsApp message in a police group, calling newly sworn-in UDF minister K.M. Shaji a 'communalist'.

#KMShaji #KeralaPolice #KasaragodNews #WhatsAppControversy #UDFKerala #KeralaPolitics