കാസർകോട് ജില്ലാ സമ്മേളനത്തിലെ വിമർശനങ്ങൾ വാർത്തയായതിൽ അതൃപ്തി; മാധ്യമപ്രവർത്തകർക്കെതിരെ ഡിവൈഎഫ്ഐ സംസ്ഥാന പ്രസിഡൻ്റ്

കാസർകോട്: (KasargodVartha) ഡിവൈഎഫ്ഐ ജില്ലാ സമ്മേളനത്തിൽ ഉയർന്ന വിമർശനങ്ങൾ മാധ്യമങ്ങൾ റിപ്പോർട്ട് ചെയ്തതിനെ തുടർന്ന് മാധ്യമപ്രവർത്തകർക്കെതിരെ ഡിവൈഎഫ്ഐ സംസ്ഥാന പ്രസിഡൻ്റ് വി വസീഫ് രംഗത്ത്.

ജില്ലയിലെ സംഘടനാ പ്രവർത്തനങ്ങളുമായി ബന്ധപ്പെട്ട വാർത്തകൾ റിപ്പോർട്ട് ചെയ്തതിലാണ് മാധ്യമങ്ങൾക്കെതിരെ അദ്ദേഹം വിമർശനം ഉന്നയിച്ചത്. മാധ്യമങ്ങൾ ഇത്തരത്തിൽ വാർത്തകൾ നൽകുന്നത് തുടർന്നാൽ അതിൻ്റെ പ്രത്യാഘാതങ്ങൾക്കും മാധ്യമപ്രവർത്തകരുടെ സുരക്ഷയിലും സംഘടനയ്ക്ക് ഉത്തരവാദിത്തമില്ലെന്നും അദ്ദേഹം മുന്നറിയിപ്പ് നൽകി.

കാസർകോട് ജില്ലാ സമ്മേളനത്തിൻ്റെ ഭാഗമായി നടന്ന പൊതുയോഗത്തിലായിരുന്നു പ്രസംഗം. സംഘടനയെ നിരന്തരം അധിക്ഷേപിക്കാനാണ് ചില മാധ്യമങ്ങൾ ശ്രമിക്കുന്നതെന്നും ഇത്തരം വാർത്തകൾ കണ്ട് കയ്യും കെട്ടി നോക്കി നിൽക്കില്ലെന്നും വസീഫ് പറഞ്ഞു.

സമ്മേളനത്തിൽ നടന്ന ചർച്ചകൾ മാധ്യമങ്ങൾ വാർത്തയാക്കിയതാണ് അദ്ദേഹത്തിൻ്റെ പ്രതികരണത്തിന് കാരണമായതെന്ന് പറയുന്നു. ജില്ലാ സമ്മേളനത്തിൽ ഡിവൈഎഫ്ഐയുടെ രക്തസാക്ഷി ഫണ്ടുകളുടെ വിനിയോഗവുമായി ബന്ധപ്പെട്ട് നേതൃത്വത്തിനെതിരെ വിമർശനങ്ങളാണ് ഉയർന്നത്.

കൊല്ലപ്പെട്ട ഔഫ് അബ്ദുൽറഹ്മാൻ്റെ പേരിൽ ഫണ്ട് പിരിച്ചിട്ട് ആറു വർഷം കഴിഞ്ഞിട്ടും സ്മാരകം സ്ഥാപിക്കാത്തതിനെതിരെ പ്രതിനിധികൾ ചോദ്യം ഉയർത്തി. മൊഗ്രാലിലെ മുഹമ്മദ് റഫീഖിൻ്റെ പേരിൽ സമാഹരിച്ച രക്തസാക്ഷി ഫണ്ട് എങ്ങനെ വിനിയോഗിച്ചുവെന്ന കാര്യത്തിലും വ്യക്തതയില്ലെന്ന ആരോപണവും സമ്മേളനത്തിൽ ഉയർന്നു.

രക്തസാക്ഷി ഫണ്ടുകളുടെ കണക്കുകൾ സമ്മേളനത്തിൽ അവതരിപ്പിച്ചില്ലെന്നും സാമ്പത്തിക കാര്യങ്ങളിൽ സുതാര്യത പാലിച്ചില്ലെന്നുമാണ് പ്രതിനിധികളുടെ വിമർശനം. നേരത്തെ ഉയർന്ന ഫണ്ട് തിരിമറി ആരോപണങ്ങളിൽ നടപടി സ്വീകരിക്കാതിരുന്നതും ചർച്ചയായി.

ജില്ലാ കമ്മിറ്റിയുടെ ഫണ്ടിൽ ക്രമക്കേട് നടത്തിയവർക്കെതിരായ നടപടി ശാസനയിൽ മാത്രം ഒതുക്കിയെന്നും ചില സമ്മേളന പ്രതിനിധികൾ ആരോപിച്ചു. വിഷയത്തിൽ ഓഫീസ് സെക്രട്ടറിയെ മാത്രം ബലിയാടാക്കിയെന്നും നേതൃത്വത്തെ സംരക്ഷിച്ചെന്നുമുള്ള വിമർശനങ്ങളും ഉയർന്നു.

കാസർകോട്, ഉദുമ, നീലേശ്വരം, ചെറുവത്തൂർ ബ്ലോക്ക് കമ്മിറ്റികളിൽ നിന്നുള്ള പ്രതിനിധികളാണ് സമ്മേളനത്തിൽ ഈ വിമർശനങ്ങൾ ഉന്നയിച്ചത്. സമ്മേളനത്തിനുള്ളിലെ ഈ ചർച്ചകൾ മാധ്യമങ്ങളിൽ വാർത്തയായതോടെയാണ് സംസ്ഥാന പ്രസിഡൻ്റിൻ്റെ പ്രതികരണം ഉണ്ടായത്.

മാധ്യമസ്വാതന്ത്ര്യവും വാർത്ത റിപ്പോർട്ട് ചെയ്യാനുള്ള അവകാശവും ഭരണഘടന ഉറപ്പുനൽകുന്ന സാഹചര്യത്തിൽ മാധ്യമപ്രവർത്തകരുടെ സുരക്ഷയെ ചോദ്യം ചെയ്യുന്ന തരത്തിലുള്ള പ്രസ്താവന ചർച്ചയായിട്ടുണ്ട്. സംഘടനയ്ക്കുള്ളിൽ ഉയർന്ന വിമർശനങ്ങൾ വാർത്തയാക്കിയതിൻ്റെ പേരിൽ മാധ്യമപ്രവർത്തകരെ ഭീഷണിപ്പെടുത്തുന്നത് ജനാധിപത്യ മൂല്യങ്ങൾക്കും മാധ്യമ സ്വാതന്ത്ര്യത്തിനുമെതിരായ നടപടിയായാണ് വിലയിരുത്തപ്പെടുന്നത്.

കാസർകോട്ടെ ഡിവൈഎഫ്ഐ ജില്ലാ സമ്മേളനവുമായി ബന്ധപ്പെട്ട ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതൽ വാർത്തകൾക്കായി ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജില്‍ ഈ വാര്‍ത്തയുടെ താഴെ കമൻ്റായി രേഖപ്പെടുത്തുക.

Article Summary: Reports indicate that DYFI State President V. Vaseef allegedly threatened journalists for reporting on the criticisms regarding martyr fund misappropriation raised at the Kasaragod district conference.

#KasaragodNews #DYFIKerala #KeralaPolitics #PressFreedom #VVaseef #MalayalamNews #RenuNews