Hajj camp | ശാരീരിക അവശത അറിയാത്ത ഹജ്ജ് ക്യാമ്പ് അനുഭവവുമായി ഉമർ വിളക്കോട്​

മട്ടന്നൂർ: (KasaragodVartha) എല്ലാ അവശതയും മറക്കുന്ന സ്നേഹപ്പശിമ ചേർന്നതാണ് ഹജ്ജ് ക്യാമ്പിലെ പരിചരണ അനുഭവമെന്ന് 65 കാരനായ തീർത്ഥാടകൻ. അത്യാഹിതത്തിൽ പെട്ട്​ വലത്​ കൈമുട്ടിന്​ താഴെ മുറിച്ചു മാറ്റേണ്ടി വന്നതുൾപ്പെടെ കടുത്ത ആരോഗ്യ പ്രതിസന്ധികളെ തരണം ചെയ്​ത ഉമർവിളക്കോട്​ ബുധനാഴ്​ച രാവിലെ മക്കത്തേക്ക്​ പറന്നത്​ പ്രായ​ത്തെ വെല്ലുന്ന യുവമനസോടെയാണ്​. ലഹരി നിർമാർജന സമിതി സംസ്ഥാന ഉപാധ്യക്ഷനും ജില്ലാ പ്രസിഡൻറുമായ അദ്ദേഹം സാമൂഹിക പ്രവർത്തന രംഗത്ത്​ ശ്രദ്ധേയനെന്ന നിലയിൽ കണ്ണൂർ എമ്പാർക്കേഷൻ പോയിൻറിൽ എല്ലാവർക്കും സുപരിചിതനായിരുന്നു. 

കുവൈത്തിലായി​രിക്കെ നാട്ടിൽ തിരിച്ചു വരുന്നതിനിടയിലാണ് ​യാത്ര ചെയ്​ത ബസ് കുന്താപുരത്ത്​ വെച്ച് ലോറിയുമായി കൂട്ടിയിടിച്ച്​  ​വലത്​കൈക്ക്​ പരിക്കേറ്റത്​. കൈമുട്ടിന്​ ​താഴെ മുറിച്ചുമാറ്റണമെന്നായിരുന്നു വൈദ്യശാസ്​ത്ര വിധി. പത്ത്​ ഓപ്പറേഷനുകളാണ്​ മണിപ്പാലിൽ മൂന്ന്​ വർഷത്തെ ചികിത്സ കാലത്ത്​ നേരിടേണ്ടി വന്നത്​. മനക്കരുത്ത്​ കൊണ്ട്​ മാത്രമായിരുന്നു ഈ പ്രതിസന്ധി താൻ തരണം ചെയ്​തതെന്ന്​ അദ്ദേഹം പറഞ്ഞു. ലഹരിക്കെതിരായ പോരാട്ടം ആശ്വാസമായി കൂടെയുണ്ടായിരുന്നത്​ മറ്റെല്ലാ പ്രതിസന്ധികളെയും മറക്കാനുള്ള മരുന്നായി തീർന്നു. 

പത്ത്​ വർഷമായി ഹജ്ജ്​ ചെയ്യാൻ ഊഴം കാത്തിരിക്കുകയായിരുന്നു. അനുവാദം കിട്ടിയ വർഷം കോവിഡ്​ കൊണ്ടുപോയി, തൊട്ടടുത്ത വർഷം പ്രായപരിധി വിലക്ക്​ കാരണം ഈ 65കാരന്റെ സ്വപ്​ന യാത്ര വീണ്ടും നീണ്ടു. ഇത്തവണ കൂട്ടിന്​ ആരുമില്ലെങ്കിലും ഒറ്റക്ക്​ യാത്രക്കൊരുങ്ങി പുറപ്പെട്ടിരിക്കയാണ്​ ഉമർ. പൊതുപ്രവർത്തകനായതിനാൽ എല്ലാവർക്കും സുപരിചിതനാണ്​ എന്നത്​കൊണ്ട്​ പുണ്യഭൂമിയിലും തനിക്ക്​ സഹായത്തിന്​ ആളെത്തുമെന്ന പ്രതീക്ഷയിലാണ്​ ഉമർ. കണ്ണൂർ ഹജ്ജ്​ ക്യാമ്പിലെത്തിയ ഉമർവിളക്കോടിന്​ ഇഹ്​റാം വേഷം ധരിച്ച്​ എയർപോർട്ടിലേക്ക്​ യാത്രയാവുമ്പോൾ മാത്രമാണ്​ കൈബാഗ്​ കയ്യിലേന്തേണ്ടി വന്നത്. ക്യാമ്പിലുടനീളം തനിക്ക്​ ഊഷ്​മളമായ പരിചരണവും സഹായവുമാണ്​ ലഭിച്ചതെന്ന്​ ഉമർ വിളക്കോട്​ പറഞ്ഞു.