ജമാഅത്തെ ഇസ്ലാമിയുടെ മതരാഷ്ട്രവാദത്തിനെതിരെ സമസ്ത; തീവ്രചിന്താഗതികൾക്കെതിരെ ജാഗ്രത വേണമെന്ന് പ്രമേയം

കുണിയ: (KasargodVartha) ജമാഅത്തെ ഇസ്ലാമിയുടെ മതരാഷ്ട്രവാദത്തിനും രാഷ്ട്രീയ ഇസ്ലാം എന്ന അപകടകരമായ ആശയത്തിനുമെതിരെ കടുത്ത നിലപാടുമായി സമസ്ത. തീവ്രപ്രബോധന ശൈലിയും സംഘടനയുടെ വഴിയല്ലെന്ന് സമസ്ത ശതാബ്ദി സമ്മേളനം പാസാക്കിയ പ്രമേയത്തിൽ വ്യക്തമാക്കുന്നു.

തീവ്രചിന്തകൾക്കെതിരെ ജാഗ്രത 

ഇസ്ലാമിന്റെ സമാധാനപരമായ പ്രബോധന ശൈലിയെയും മഹത്തുക്കളായ മുൻഗാമികൾ കാണിച്ചുതന്ന പാതയെയും അട്ടിമറിക്കാൻ ശ്രമിക്കുന്ന പാന്‍ ഇസ്ലാമിസ്റ്റ് തീവ്രചിന്താഗതികൾക്കെതിരെ ജാഗ്രത പാലിക്കണമെന്ന് സമസ്ത ആഹ്വാനം ചെയ്യുന്നു. 

മതരാഷ്ട്രവാദം ഒളിച്ചുകടത്തുന്ന വൈകാരിക പ്രകടനങ്ങളിലൂടെയും രാഷ്ട്രീയ ഇസ്ലാം എന്ന ആശയത്തിലൂടെയും മുസ്ലിം യുവാക്കളെ മുഖ്യധാരയിൽ നിന്ന് വഴിതെറ്റിക്കാൻ ശ്രമിക്കുന്ന മൗദൂദിസ്റ്റ് വിചാരധാരകൾ ഗൗരവതരമായ വെല്ലുവിളിയാണെന്ന് പ്രമേയം ചൂണ്ടിക്കാട്ടുന്നു.

നിഷ്പക്ഷ മാധ്യമങ്ങൾ എന്ന വ്യാജേന പ്രവർത്തിക്കുന്ന മാധ്യമങ്ങൾ വഴി നടത്തുന്ന ബൗദ്ധികമായ കടന്നുകയറ്റങ്ങളെയും സമുദായത്തെ ഭിന്നിപ്പിക്കാനുള്ള അജണ്ടകളെയും തിരിച്ചറിയണം. 

അഹ്ലുസ്സുന്ന വൽ ജമാഅത്തിന്റെ പൈതൃകമായ സഹിഷ്ണുതയും സൗഹൃദവും ഉയർത്തിപ്പിടിച്ച് ഇത്തരം വിഘടനവാദ ചിന്താഗതികളെ ആശയപരമായി പ്രതിരോധിക്കാൻ സമുദായം ഒന്നിക്കണമെന്ന് സംഘടന ആവശ്യപ്പെട്ടു.

മദ്ഹബീ പാരമ്പര്യത്തിൽ അടിയുറച്ച് നിൽക്കണം 

കർമ്മശാസ്ത്രപരമായി നാലിൽ ഒരു മദ്ഹബ് പിൻപറ്റുകയും വിശ്വാസപരമായി അശ്അരി-മാതുരീദി സരണികളിൽ ഒന്ന് സ്വീകരിക്കുകയും ചെയ്യുന്നതിലാണ് യഥാർത്ഥ അഹ്ലുസ്സുന്നത്തി വൽ ജമാഅത്തിന്റെ പാരമ്പര്യവും സമസ്തയുടെ മൻഹജും നിലനിൽക്കുന്നതെന്ന് മറ്റൊരു പ്രമേയം വ്യക്തമാക്കി.

സ്വന്തം താത്പര്യങ്ങൾക്കായി പ്രാമാണികരായ പൂർവ്വിക പണ്ഡിതന്മാരുടെ അഭിപ്രായങ്ങളെ അവഗണിച്ച് സ്വയം ഗവേഷകരാകുന്ന പ്രവണത ഇസ്ലാമിക വിരുദ്ധമാണ്. മഖാസ്വിദുശ്ശരീഅ:, ഫിഖ്ഹുൽ അഖല്ലിയാത്ത് തുടങ്ങിയ സാങ്കേതിക പദങ്ങളെ ദുരുപയോഗം ചെയ്ത് ചിലർ നടത്തുന്ന പുതിയ ഗവേഷണ രീതികൾ പൂർണ്ണമായും തള്ളിക്കളയണം. പൂർവ്വസൂരികളായ ഇമാമുമാർ വരച്ചുവെച്ച മദ്ഹബീ പാതയിൽ ഉറച്ചുനിൽക്കണമെന്നും സമസ്ത സമ്മേളനം ആവശ്യപ്പെട്ടു.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്

Article Summary: Samastha passes resolution against Jamaat-e-Islami's political Islam and religious statehood.

#Samastha #JamaatEIslami #KeralaMuslims #ReligiousStatehood #KuniyaConference #IslamicResearch #KVARTHA