സമസ്ത നൂറാം വാർഷികം: ജിഫ്രി മുത്തുക്കോയ തങ്ങൾ നയിക്കുന്ന സന്ദേശയാത്ര ഞായറാഴ്ച കാസർകോട് എത്തും; പി കെ കുഞ്ഞാലിക്കുട്ടി ഉദ്ഘാടനം ചെയ്യും; ഗംഭീര സ്വീകരണത്തിന് ഒരുക്കങ്ങളായി

കാസർകോട്: (KasargodVartha) 2026 ഫെബ്രുവരി നാല് മുതൽ എട്ട് വരെ കാസർകോട് കുണിയയിൽ നടക്കുന്ന സമസ്ത കേരള ജംഇയ്യത്തുൽ ഉലമ നൂറാം വാർഷികാഘോഷ അന്താരാഷ്ട്ര മഹാസമ്മേളനത്തിന്റെ വിളംബരവുമായി സമസ്ത അധ്യക്ഷൻ സയ്യിദ് മുഹമ്മദ് ജിഫ്രി മുത്തുക്കോയ തങ്ങൾ നയിക്കുന്ന സമസ്ത ശതാബ്ദി സന്ദേശയാത്രയ്ക്ക് ഡിസംബർ 28-ന് ഞായറാഴ്ച കാസർകോട് ആവേശകരമായ സ്വീകരണം നൽകുമെന്ന് നേതാക്കളും സ്വാഗത സംഘം ഭാരവാഹികളും. രാവിലെ 10-ന് തളങ്കര മാലിക് ദീനാർ ജുമാമസ്ജിദ് പരിസരത്ത് നടക്കുന്ന സ്വീകരണ സമ്മേളനം പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി ഉദ്ഘാടനം ചെയ്യും.

ജില്ലാ സ്വാഗത സംഘം ചെയർമാൻ ത്വാഖാ അഹ്മദ് മൗലവി അസ്ഹരി സമ്മേളനത്തിൽ അധ്യക്ഷത വഹിക്കും. കർണാടക നിയമസഭാ സ്പീക്കർ യു.ടി ഖാദർ മുഖ്യാതിഥിയാകും. രാജ്‌മോഹൻ ഉണ്ണിത്താൻ എം.പി, എം.എൽ.എമാരായ എൻ.എ നെല്ലിക്കുന്ന്, എം. രാജഗോപാലൻ, ഇ. ചന്ദ്രശേഖരൻ, എ.കെ.എം അഷ്‌റഫ്, സി.എച്ച് കുഞ്ഞമ്പു, ഡി.സി.സി പ്രസിഡന്റ് പി.കെ ഫൈസൽ, മുസ് ലിംലീഗ് ജില്ലാ പ്രസിഡന്റ് കല്ലട്ര മാഹിൻ ഹാജി എന്നിവരും വിവിധ രാഷ്ട്രീയ, സാമുദായിക നേതാക്കളും ചടങ്ങിൽ പങ്കെടുക്കും.

സ്വീകരണ പരിപാടികൾക്ക് മുന്നോടിയായി ഞായറാഴ്ച രാവിലെ ഒൻപതിന് തളങ്കരയിൽ സ്വാഗത സംഘം ചെയർമാൻ എ. അബ്ദുൽറഹ്മാൻ പതാക ഉയർത്തും. തുടർന്ന് കുമ്പോൽ സയ്യിദ് അലി തങ്ങളുടെ നേതൃത്വത്തിൽ കൂട്ട സിയാറത്തും സയ്യിദ് ഹാദി തങ്ങളുടെ നേതൃത്വത്തിൽ മജ്‌ലിസുന്നൂറും നടക്കും. ഡിസംബർ 27-ന് കണ്ണൂരിലെ പരിപാടികൾ പൂർത്തിയാക്കി രാത്രി തൃക്കരിപ്പൂരിൽ എത്തുന്ന ജാഥയ്ക്ക് അവിടെ വരവേൽപ്പ് നൽകും. ഞായറാഴ്ച രാവിലെ കാഞ്ഞങ്ങാട് പുതിയ ബസ് സ്റ്റാൻഡ് പരിസരത്ത് നിന്ന് 200 വാഹനങ്ങളുടെ അകമ്പടിയോടെ ചന്ദ്രഗിരി പാലം വഴിയാണ് ജാഥയെ തളങ്കരയിലേക്ക് ആനയിക്കുന്നത്.

റെയിൽവേ സ്റ്റേഷൻ പരിസരത്ത് എത്തുന്ന ജാഥാ ക്യാപ്റ്റൻ സയ്യിദ് മുഹമ്മദ് ജിഫ്രി മുത്തുക്കോയ തങ്ങളെ 313 ആമില, വിഖായ, ഖിദ്മ വളണ്ടിയർമാരുടെ അകമ്പടിയോടെ സ്വീകരണ കേന്ദ്രത്തിലേക്ക് കൊണ്ടുവരും. ജില്ലയുടെ വിവിധ ഭാഗങ്ങളിൽ നിന്നുള്ള അയ്യായിരത്തോളം പ്രവർത്തകർ സമ്മേളനത്തിൽ പങ്കെടുക്കുമെന്ന് ഭാരവാഹികൾ അറിയിച്ചു. ഡിസംബർ 19-ന് കന്യാകുമാരിയിൽ നിന്നാരംഭിച്ച യാത്ര ഞായറാഴ്ച വൈകുന്നേരം അഞ്ചിന് മംഗളൂരു അഡിയാർ കണ്ണൂർ മൈതാനിയിൽ സമാപിക്കും. വാർത്താസമ്മേളനത്തിൽ എം.എസ് തങ്ങൾ മദനി, അബ്ദുസ്സലാം ദാരിമി ആലംപാടി, ചെങ്കളം അബ്ദുല്ല ഫൈസി, സിദ്ദീഖ് നദ് വി ചേരൂർ, താജുദ്ദീൻ ദാരിമി പടന്ന, റഷീദ് ബെളിഞ്ചം, അബൂബക്കർ സാലൂദ് നിസാമി, ബഷീർ ദാരിമി തളങ്കര, ഇർഷാദ് ഹുദവി ബെദിര പങ്കെടുത്തു

സമസ്തയുടെ നൂറാം വാർഷികാഘോഷങ്ങളുടെ ഈ വാർത്ത മറ്റുള്ളവരിലേക്കും എത്തിക്കാൻ ഷെയർ ചെയ്യൂ. നിങ്ങളുടെ അഭിപ്രായങ്ങൾ കമന്റ് ചെയ്യുക.

Article Summary: Samastha's centenary message journey led by Jifri Thangal to receive a grand welcome in Kasaragod on Sunday.

#Samastha100 #JifriThangal #KasaragodNews #MuslimLeague #CentenaryJourney #MalikDeenar