ശബരിമല സ്വർണക്കൊള്ള: സന്നിധാനത്ത് എസ്ഐടി പരിശോധന രണ്ടാം ദിവസവും; പങ്കജ് ഭണ്ഡാരിയുടെ ഹർജിയിൽ വിധി ഉടന്‍

സന്നിധാനം: (KasargodVartha) ശബരിമല സ്വർണക്കൊള്ള കേസിൽ അന്വേഷണം നിർണ്ണായക ഘട്ടത്തിലേക്ക്. പ്രത്യേക അന്വേഷണ സംഘം (എസ്ഐടി) സന്നിധാനത്ത് നടത്തുന്ന ശാസ്ത്രീയ പരിശോധന രണ്ടാം ദിവസവും തുടരുകയാണ്. കുംഭമാസ പൂജകൾക്കായി നട തുറന്നതിന് പിന്നാലെയാണ് എസ്പി ശശിധരന്റെ നേതൃത്വത്തിലുള്ള സംഘം ശ്രീകോവിലിൽ നിന്നുള്ള സാമ്പിൾ ശേഖരണം ആരംഭിച്ചത്.

ശാസ്ത്രീയ പരിശോധന

വ്യാഴാഴ്ച (12.02.2026) ശ്രീകോവിലിന്റെ പിൻഭാഗത്തെ തൂണുകളിലെ സ്വർണപ്പാളികൾ ഇളക്കിയെടുത്ത് പരിശോധിച്ചിരുന്നു. തുടർന്ന് ദ്വാരപാലക ശില്പങ്ങളിലെ പരിശോധനയിലേക്ക് കടന്നു. അവശേഷിക്കുന്ന ഭാഗങ്ങളിലെ സാമ്പിളുകൾ വെള്ളിയാഴ്ച ശേഖരിക്കും. ലീഗൽ മെട്രോളജിയുടെ ഗോൾഡ് അസസ്മെൻ്റ് വിഭാഗവും എസ്ഐടിക്ക് ഒപ്പമുണ്ട്. നഷ്ടപ്പെട്ട സ്വർണ്ണത്തിൻ്റെ കൃത്യമായ അളവ്, സ്വർണത്തിന്റെ കാലപ്പഴക്കം എന്നിവ ശാസ്ത്രീയമായി തിട്ടപ്പെടുത്തുകയാണ് പരിശോധനയുടെ ലക്ഷ്യം. വിശദമായ തെളിവ് ശേഖരണത്തിന് ശേഷം കുറ്റപത്രം സമർപ്പിക്കാനാണ് നീക്കം.

ഹൈകോടതി വിധി

അതേസമയം, സ്വർണക്കൊള്ള കേസിൽ സ്മാർട് ക്രിയേഷൻ സിഇഒ പങ്കജ് ഭണ്ഡാരി നൽകിയ ഹർജിയിൽ ഹൈകോടതി വെള്ളിയാഴ്ച (13.02.2026) വിധി പറയും. തന്നെ പ്രതി ചേർത്ത എഫ്ഐആർ റദ്ദാക്കണമെന്നും അറസ്റ്റ് നിയമവിരുദ്ധമാണെന്നും ചൂണ്ടിക്കാട്ടിയാണ് ഹർജി. മതിയായ കാരണങ്ങൾ ഇല്ലാതെയാണ് അറസ്റ്റ് ചെയ്തതെന്നും, സ്ഥാപനത്തിൽ നിന്ന് കണ്ടെടുത്ത 109.234 ഗ്രാം സ്വർണം അന്വേഷണ ഉദ്യോഗസ്ഥർക്ക് സ്വമേധയാ കൈമാറിയതാണെന്നും പങ്കജ് ഭണ്ഡാരി വാദിക്കുന്നു. അറസ്റ്റിന് മുൻപ് 6 തവണ ചോദ്യം ചെയ്യലിന് ഹാജരായ കാര്യവും ഹർജിയിൽ ചൂണ്ടിക്കാട്ടിയിട്ടുണ്ട്. എന്നാൽ കേസിലെ പ്രധാന പ്രതിയായതിനാൽ പങ്കജ് ഭണ്ഡാരിക്ക് ജാമ്യം നൽകരുതെന്ന കർശന നിലപാടാണ് എസ്ഐടി ഹൈകോടതിയിൽ സ്വീകരിച്ചിരിക്കുന്നത്.

ഈ വാർത്ത ഷെയർ ചെയ്യൂ. അഭിപ്രായങ്ങൾ കമന്റായി പങ്കുവെക്കാനും മറക്കരുത്. പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ.

Article Summary: SIT continues scientific inspection at Sabarimala in gold theft case; Kerala High Court to pronounce verdict on CEO Pankaj Bhandari's plea today.

#Sabarimala #GoldTheft #SIT #PankajBhandari #KeralaHighCourt #CrimeInvestigation #KeralaNews