ശബരിമല സ്വർണക്കൊള്ളക്കേസ്: എ പത്മകുമാർ ഉൾപ്പെടെയുള്ള പ്രതികളുടെ ജാമ്യാപേക്ഷ ഹൈകോടതി തള്ളി; ഉണ്ണികൃഷ്ണൻ പോറ്റിക്ക് കർശന ഉപാധികളോടെ ജാമ്യം ലഭിച്ചെങ്കിലും പുറത്തിറങ്ങാനാവില്ല

കൊച്ചി: (KasargodVartha) ശബരിമല സ്വർണക്കൊള്ളക്കേസിൽ തിരുവിതാംകൂർ ദേവസ്വം ബോർഡ് മുൻ പ്രസിഡൻ്റ് എ. പത്മകുമാർ ഉൾപ്പെടെയുള്ള പ്രധാന പ്രതികളുടെ ജാമ്യാപേക്ഷ ഹൈകോടതി തള്ളി. പത്മകുമാറിന് പുറമെ മുൻ അഡ്‌മിനിസ്ട്രേറ്റീവ് ഓഫിസർ മുരാരി ബാബു, ജ്വല്ലറി ഉടമ ഗോവർധൻ എന്നിവർ നൽകിയ ജാമ്യാപേക്ഷകളാണ് ജസ്റ്റിസ് എ. ബദറുദീൻ തള്ളിക്കൊണ്ട് വിധി പറഞ്ഞത്.

ശബരിമലയിലെ ദ്വാരപാലക ശിൽപങ്ങൾ, കട്ടിളപ്പാളികൾ എന്നിവിടങ്ങളിലെ സ്വർണക്കവർച്ചയ്ക്ക് ആവശ്യമായ സൗകര്യങ്ങൾ ഒരുക്കിക്കൊടുത്തു എന്നതടക്കം രണ്ട് കേസുകളിലാണ് പത്മകുമാറും മുരാരി ബാബുവും ജാമ്യഹർജികൾ സമർപ്പിച്ചിരുന്നത്. ദ്വാരപാലക കേസിൽ മാത്രമാണ് ഗോവർധൻ ജാമ്യം തേടിയത്. നേരത്തെ സെഷൻസ് കോടതിയും ഇവരുടെ ജാമ്യഹർജികൾ തള്ളിയിരുന്നു. ഹൈക്കോടതി ഉത്തരവിൻ്റെ വിശദാംശങ്ങൾ ലഭ്യമായിട്ടില്ല.

ഉണ്ണികൃഷ്ണൻ പോറ്റിക്ക് ജാമ്യം; പക്ഷെ പുറത്തിറങ്ങാനാവില്ല

കേസിലെ മറ്റൊരു പ്രതിയായ സ്പോണ്‍സർ ഉണ്ണികൃഷ്ണൻ പോറ്റിക്ക് ദ്വാരപാലക ശിൽപ കേസിൽ കോടതി ഇന്നലെ ജാമ്യം അനുവദിച്ചെങ്കിലും കട്ടിളപ്പാളി കേസിൽ റിമാൻഡിൽ തുടരുന്നതിനാൽ ജയിൽ മോചിതനാകാൻ കഴിയില്ല. കർശന ഉപാധികളോടെയാണ് പോറ്റിക്ക് ജാമ്യം അനുവദിച്ചിരിക്കുന്നത്.

പ്രധാന ജാമ്യവ്യവസ്ഥകൾ:

• പത്തനംതിട്ട ജില്ലയിൽ പ്രവേശിക്കരുത്.

• കേരളം വിട്ടു പോകരുത്.

• പാസ്പോർട്ട് കോടതിയിൽ ഹാജരാക്കണം.

• സാക്ഷികളെ സ്വാധീനിക്കാനോ തെളിവ് നശിപ്പിക്കാനോ ശ്രമിക്കരുത്.

• എല്ലാ ചൊവ്വാഴ്ചയും അന്വേഷണ ഉദ്യോഗസ്ഥന് മുമ്പിൽ ഹാജരാകണം.

• അന്വേഷണ സംഘം ആവശ്യപ്പെടുന്ന ഏത് സമയത്തും ഹാജരാകണം.

മന്ത്രിയുമായി പരിചയമെന്ന് മൊഴി

റിമാൻഡിൽ കഴിയുന്ന ഉണ്ണികൃഷ്ണൻ പോറ്റി പ്രത്യേക അന്വേഷണ സംഘത്തിന് നൽകിയ മൊഴിയിലെ നിർണായക വിവരങ്ങൾ പുറത്തുവന്നു. മുൻ ദേവസ്വം മന്ത്രി കടകംപള്ളി സുരേന്ദ്രനുമായി തനിക്ക് പരിചയമുണ്ടെന്നാണ് പോറ്റി മൊഴി നൽകിയിരിക്കുന്നത്. 2017 മുതൽ കടകംപള്ളിയുമായി പരിചയമുണ്ട്. അദ്ദേഹം തൻ്റെ വീട്ടിൽ വന്നിട്ടുണ്ടെന്നും പോറ്റി വെളിപ്പെടുത്തി. കൂടാതെ, പല നേതാക്കൾക്കും ദേവസ്വം ഉദ്യോഗസ്ഥർക്കും താൻ ഉപഹാരങ്ങൾ നൽകിയിട്ടുണ്ടെന്നും മൊഴിയിലുണ്ട്.

അഷ്‌ടദിക് പാലകരെ കണ്ടെത്തി

ശബരിമലയിലെ പഴയ കൊടിമരത്തിൽ സ്ഥാപിച്ചിരുന്ന അഷ്‌ടദിക് പാലക ശിൽപങ്ങളെ എസ്ഐടി കണ്ടെത്തി. ഇന്നലെ രാത്രി ഒന്നരയോടെ സന്നിധാനത്ത് എസ്ഐടി നടത്തിയ പരിശോധനയിലാണ് സ്ട്രോങ് റൂമിൽ നിന്നും ഇവ കണ്ടെടുത്തത്. ചാക്കിൽകെട്ടിയ നിലയിലായിരുന്നു ചെറിയ ശിൽപങ്ങളായ അഷ്‌ടദിക് പാലകർ ഉണ്ടായിരുന്നത്. ഇതുസംബന്ധിച്ച വിശദമായ റിപ്പോർട്ട് എസ്ഐടി കൊല്ലം കോടതിയിൽ സമർപ്പിക്കും.

അതിനിടെ, സ്വർണക്കൊള്ളക്കേസിൽ സ്പെഷ്യൽ പബ്ലിക് പ്രോസിക്യൂട്ടറെ നിയമിക്കാൻ എസ്ഐടി സർക്കാരിന് ശുപാർശ നൽകി. തൃശൂർ സ്വദേശിയായ അഡ്വ. ഉണ്ണികൃഷ്ണനെയാണ് ഈ തസ്തികയിലേക്ക് പരിഗണിക്കുന്നത്.

ഈ കർശന നടപടികൾ സ്വാഗതാർഹമാണോ? നിങ്ങളുടെ അഭിപ്രായം പറയൂ.

Article Summary: The Kerala High Court rejected the bail pleas of former Devaswom Board President A Padmakumar and others in the Sabarimala gold theft case. Unnikrishnan Potty was granted conditional bail but remains in custody.

#Sabarimala #GoldTheftCase #KeralaHighCourt #APadmakumar #UnnikrishnanPotty #KeralaNews