ശബരിമല സ്വർണക്കവർച്ച കേസിൽ വീണ്ടും അറസ്റ്റ്; മുൻ അഡ്മിനിസ്‌ട്രേറ്റീവ് ഓഫിസർ എസ് ശ്രീകുമാർ പിടിയിൽ

തിരുവനന്തപുരം: (KasargodVartha) തദ്ദേശ തിരഞ്ഞെടുപ്പ് പൂർത്തിയായതോടെ ശബരിമല സ്വർണക്കവർച്ചാ കേസിൽ നിർണായക അറസ്റ്റ്. ദ്വാരപാലക ശിൽപങ്ങളിലെ സ്വർണം കവർന്ന കേസിൽ പ്രതിയായ ദേവസ്വം മുൻ അഡ്മിനിസ്‌ട്രേറ്റീവ് ഓഫിസർ എസ് ശ്രീകുമാറിനെ പ്രത്യേക അന്വേഷണ സംഘം  അറസ്റ്റ് ചെയ്തു. ക്രമക്കേടിൽ ശ്രീകുമാറിനും പങ്കുണ്ടെന്ന നിഗമനത്തിലാണ് ഉദ്യോഗസ്ഥരുടെ നടപടിയെന്ന് പൊലീസ് പറയുന്നു.

ശബരിമലയിൽ നിന്ന് സ്വർണപ്പാളി മിനുക്കുപണികൾക്കായി പുറത്തേക്കു കൊണ്ടുപോകുമ്പോഴും പിന്നീട് തിരികെ കൊണ്ടുവരുമ്പോഴും ശ്രീകുമാർ ആയിരുന്നു അഡ്മിനിസ്‌ട്രേറ്റീവ് ഓഫിസർ ആയി ചുമതല വഹിച്ചിരുന്നത്. ഈ സമയത്താണ് സ്വർണക്കവർച്ച നടന്നതെന്ന് അന്വേഷണ സംഘം സംശയിക്കുന്നു. കേസിൽ ശ്രീകുമാർ നൽകിയ മുൻകൂർ ജാമ്യഹർജി നേരത്തെ ഹൈകോടതി തള്ളിയിരുന്നു. ഇതിന് പിന്നാലെയാണ് അന്വേഷണ സംഘത്തിൻ്റെ നീക്കം.

ബുധനാഴ്ച എസ്ഐടി ഓഫിസിലേക്ക് ശ്രീകുമാറിനെ വിളിച്ചു വരുത്തിയിരുന്നു. ദീർഘനേരം നീണ്ടുനിന്ന ചോദ്യം ചെയ്യലിന് ഒടുവിൽ ഇയാളുടെ പങ്കാളിത്തം ബോധ്യപ്പെട്ടതോടെയാണ് അറസ്റ്റ് രേഖപ്പെടുത്തിയത്. ശബരിമലയിലെ അതീവ സുരക്ഷയുള്ള ഭാഗത്തുനിന്ന് സ്വർണം കാണാതായ സംഭവത്തിൽ ദേവസ്വം ഉദ്യോഗസ്ഥരുടെ പങ്ക് പ്രത്യേക സംഘം വിശദമായി പരിശോധിച്ചു വരികയാണ്.

ഈ കേസിൽ പ്രതിയായ ദേവസ്വം ബോർഡ് മുൻ സെക്രട്ടറി എസ് ജയശ്രീയെ മാത്രമാണ് ഇനി അറസ്റ്റ് ചെയ്യാനുള്ളതെന്ന് പൊലീസ് അറിയിച്ചു. നിലവിൽ മുൻകൂർ ജാമ്യം തേടി ജയശ്രീ സുപ്രീംകോടതിയെ സമീപിച്ചിരിക്കുകയാണ്. ശബരിമല സ്വർണക്കവർച്ചാ കേസിലെ ഗൂഢാലോചനയും മറ്റ് ക്രമക്കേടുകളും പുറത്തുകൊണ്ടുവരാൻ അന്വേഷണം ഊർജിതമായി മുന്നോട്ടുപോവുകയാണെന്ന് ഉദ്യോഗസ്ഥർ വ്യക്തമാക്കി.

ദേവസ്വം മുൻ പ്രസിഡൻ്റ് എ.പത്മകുമാറിനെ അറസ്‌റ്റ് ചെയ്‌തതിനു ശേഷം എസ്ഐടിയുടെ തുടർനടപടികൾ മന്ദഗതിയിലായിരുന്നു. തദ്ദേശതിരഞ്ഞെടുപ്പ് കാലത്ത് ശബരിമല സ്വർണക്കവർച്ച ചർച്ചയാകാതിരിക്കാനുള്ള സർക്കാർ സമ്മർദമാണ് ഇതിനു പിന്നിലെന്ന് ആക്ഷേപവും ഉയർന്നിരുന്നു.

ശബരിമല സ്വർണക്കവർച്ച കേസിനെക്കുറിച്ചുള്ള നിങ്ങളുടെ പ്രതികരണം അറിയിക്കൂ; വാർത്ത ഷെയർ ചെയ്യൂ.

Article Summary: Former Administrative Officer arrested in Sabarimala gold theft case.

#Sabarimala #GoldTheft #SIT #KeralaNews #DevaswomBoard #CrimeUpdate