ശബരിമലയിൽ ദർശനം നടത്തിയ ബിന്ദു അമ്മിണിയുടേതെന്ന് പറഞ്ഞ് വ്യാജ അശ്ലീല വീഡിയോ പ്രചരിപ്പിച്ച കാസർകോട് സ്വദേശി അറസ്റ്റിൽ

കൊയിലാണ്ടി: (www.kasargodvartha.com 06.12.2020) ശബരിമലയിൽ ദർശനം നടത്തിയ ബിന്ദു അമ്മിണിയുടേതെന്ന് പറഞ്ഞ് വ്യാജ അശ്ലീല വീഡിയോ പ്രചരിപ്പിച്ച കാസർകോട് സ്വദേശി അറസ്റ്റിൽ. ചെറുവത്തൂര്‍ പുതിയ പുരയില്‍ മഹേഷ് കുമാറിനെ (37) യാണ് കൊയിലാണ്ടി സി ഐ കെ സി സുഭാഷ് ബാബുവും സംഘവും കാസർകോട്ട് വെച്ച് അറസ്​റ്റ്​ ചെയ്തത്.

ഇയാളെ കോടതിയില്‍ ഹാജരാക്കി. സുപ്രീംകോടതി വിധിയെ തുടർന്ന് ബിന്ദു അമ്മിണിയും കനക ദുർഗ്ഗയും ശബരിമലയിൽ കയറിയിരുന്നു. ഇതേ തുടർന്ന് സമൂഹ മാധ്യമങ്ങളിൽ ഇവർക്കെതിരെ മോശം പരാമർശങ്ങളുമായി ചിലർ രംഗത്തുവന്നിരുന്നു. ഇതിന് പിന്നാലെയാന് അശ്ലീല വിഡിയോകൾ നിർമിച്ച്​ പ്രചരിപ്പിക്കുകയും ചെയ്തത്.

2019ലാണ് കേസിനാസ്പദമായ പരാതി നൽകിയത്. യുവതിയുടെ കൃത്രിമ അശ്ലീല വ്യാജ വിഡിയോ പ്രചരിപ്പിച്ചുവെന്നാണ്​ പരാതി. സൈബര്‍ സെല്ലി​ൻ്റെ സഹായത്തോടെ നടത്തിയ അന്വേഷണത്തിലാണ്‌ പ്രതിയെ പിടികൂടിയത്. സൈബര്‍ സെല്ലി​ൻ്റെ സഹായത്തോടെ കൂടുതല്‍ അന്വേഷണം നടത്തും. ഒന്നര വര്‍ഷം മുമ്പ് പരാതി നല്‍കിയിട്ടും നടപടിയൊന്നും എടുക്കാത്തതിനെ തുടർന്ന് ബിന്ദു അമ്മിണി സമരം പ്രഖ്യാപിച്ചിരുന്നു. കൊയിലാണ്ടി പൊലീസ് സ്‌റ്റേഷനു മുന്നില്‍ സമരം നടത്തുമെന്നും അവര്‍ പറഞ്ഞിരുന്നു. അതിനിടെയാണ് പ്രതിയെ അറസ്​റ്റ്​ ചെയ്തത്.

സുപ്രീംകോടതി ഉത്തരവു പ്രകാരം ബിന്ദു അമ്മിണിക്ക് ശനിയാഴ്ച മുതല്‍, പൊലീസ് സംരക്ഷണം പുനഃസ്ഥാപിച്ചിട്ടുണ്ട്.

Keywords:  Kerala, News, Kasaragod, Youth, Fake, Sabarimala, Woman, Police, Case, Complaint, Arrest, Top-Headlines, Kasargod resident arrested for spreading fake video claiming to be Bindu Ammini's who visited Sabarimala.