'വിശ്വാസികളുടെ സങ്കടം നിലനിൽക്കാൻ അനുവദിക്കില്ല': വിവാദം കത്തിനിൽക്കുന്നതിനിടെ ദേവസ്വം ബോർഡിന്റെ പ്രസിഡന്റായി കെ ജയകുമാർ ചുമതലയേറ്റു

തിരുവനന്തപുരം: (KasargodVartha) ശബരിമല സ്വർണക്കവർച്ച വിവാദം കത്തിനിൽക്കുന്നതിനിടെ തിരുവിതാംകൂർ ദേവസ്വം ബോർഡ് പ്രസിഡന്റായി മുൻ ചീഫ് സെക്രട്ടറി കെ. ജയകുമാറും അംഗമായി മുൻ മന്ത്രിയും സിപിഐ നേതാവുമായ കെ. രാജുവും സത്യപ്രതിജ്ഞ ചെയ്തു ചുമതലയേറ്റു. പി. ഡി. സന്തോഷ്‌കുമാർ ആണ്‌ ബോർഡിലെ മൂന്നാമത്തെ അംഗം.

ഏറെ നിർണായകമായ സമയത്താണ്‌ പ്രസിഡന്റായി ചുമതല ഏറ്റെടുക്കുന്നതെന്നും, നിലവിലെ വിവാദങ്ങളുടെ പേരിൽ ബോർഡിന്റെ വിശ്വാസ്യതയ്ക്കു ഭംഗം വന്നിട്ടുണ്ടെങ്കിൽ അത്തരം സാഹചര്യം ആവർത്തിക്കില്ലെന്ന് ഉറപ്പാക്കുമെന്നും കെ. ജയകുമാർ പറഞ്ഞു. ഇപ്പോഴത്തെ വിവാദം വിശ്വാസികൾക്കിടയിൽ സങ്കടം ഉണ്ടാക്കിയിട്ടുണ്ട്. ആ സാഹചര്യം അങ്ങനെ തന്നെ നിലനിൽക്കാൻ അനുവദിക്കില്ല.

നടപടിക്രമങ്ങൾ പരിശോധിക്കും

മോശമായ കാര്യങ്ങൾ അവിടെ നടക്കാൻ ഇടയായതിന് കാരണമായത് നടപടിക്രമങ്ങളിലെ പഴുതുകളാണ്. സമീപനങ്ങളിലെ ചില വൈകല്യങ്ങളുമുണ്ട്. അതെല്ലാം പരിശോധിച്ച് ആവർത്തിക്കാൻ സാധ്യമല്ലാത്ത തരത്തിൽ നടപടി സ്വീകരിക്കുമെന്നും അദ്ദേഹം വ്യക്തമാക്കി.

ദേവനെ പരിരക്ഷിക്കുന്ന ബോർഡാണ്‌ ദേവസ്വം ബോർഡ് എന്ന അഭിമാനമാണ്‌ ഭക്തർക്കുണ്ടായിരുന്നത്. അത്‌ തിരിച്ചുപിടിക്കും. ഭഗവാന്റെ സ്വത്ത് നഷ്ടപ്പെടുന്നില്ലെന്നും ഭക്തർ സമർപ്പിക്കുന്ന കാര്യങ്ങൾ ഭദ്രമാണെന്നും ഉറപ്പാക്കും. വിശ്വാസം വ്രണപ്പെടാൻ തക്ക ഒരു നടപടിയും ഈ ഭരണസമിതി അനുവദിക്കില്ലെന്നും കെ. ജയകുമാർ പറഞ്ഞു.

പുതിയ ദേവസ്വം ബോർഡ് ഭരണസമിതിയുടെ പ്രവർത്തനങ്ങളെക്കുറിച്ച് നിങ്ങളുടെ പ്രതീക്ഷകൾ പങ്കുവെക്കുക.

Article Summary: K Jayakumar takes charge as Devaswom Board President promising integrity.

#DevaswomBoard #Sabarimala #KJayakumar #KRaju #KeralaNews #TDB