റിയാസ് മൗലവിക്ക് ആയിരങ്ങളുടെ യാത്രാമൊഴി; അന്ത്യാഞ്ജലി അർപ്പിക്കാൻ ചൂരി ജമാഅത്ത് ഭാരവാഹികളും നാട്ടുകാരും മതനേതാക്കളും ഉൾപ്പടെ കാസർകോട് നിന്ന് കുടകിലെത്തിയത് നിരവധിപേർ

സയ്യിദ് ആറ്റക്കോയ തങ്ങള്‍ ബാഹസന്‍ പഞ്ചിക്കല്‍ മയ്യത്ത് നിസ്‌കാരത്തിന് നേതൃത്വം നല്‍കി. കുടക് ജില്ലാ സമസ്ത പ്രസിഡണ്ടും ഖാസിയുമായ മഹ്‌മൂദ് മുസ്ലിയാര്‍ എടപ്പലം, എസ് വൈ എസ് സംസ്ഥാന വൈസ് പ്രസിഡണ്ടുമാരായ പള്ളങ്കോട് അബ്ദുല്‍ ഖാദിര്‍ മദനി, എന്‍ അബ്ദുൽ ലത്വീഫ് സഅദി പഴശ്ശി, എസ് എസ് എഫ് കര്‍ണ്ണാടക സംസ്ഥാന പ്രസിഡണ്ട് ഇസ്മാഈല്‍ സഖാഫി, എസ് വൈ എസ് കുടക് ജില്ലാ പ്രസിഡണ്ട് അബ്ദുല്‍ ഹഫീസ് സഅദി, കേരളാ മുസ്ലിം ജമാഅത്ത് കാസർകോട് ജില്ലാ സെക്രട്ടറി അബ്ദുൽ ഹമീദ് മൗലവി ആലംപാടി, എസ് എം എ ജില്ലാ വൈസ് പ്രസിഡണ്ട് നാസര്‍ ബന്താട്, അബ്ദുല്‍ മജീദ് കൊടലിപേട്ട, മുസ്ലിം ലീഗ് നേതാവ് ബഷീര്‍ പള്ളങ്കോട്, സി പി ഐ നേതാവ് നിര്‍വാണപ്പ, ഹംസ കൊട്ടമുടി, തുടങ്ങിയ നിരവധി നേതാക്കള്‍ അന്ത്യാജ്ഞലിയര്‍പ്പിക്കാന്‍ കൊട്ടമുടിയിലെത്തിയിരുന്നു.

കുടകിലും പരിസരങ്ങളിലും വന്‍ പോലീസ് സന്നാഹമാണ് ഒരുക്കിയിരുന്നത്. ഉച്ചയോടു കൂടി പോസ്റ്റ് മോര്‍ട്ടം കഴിഞ്ഞ് പരിയാരം സി എച്ച് സെന്ററില്‍ അന്ത്യകര്‍മ്മങ്ങള്‍ പൂര്‍ത്തിയാക്കിയെങ്കിലും ചൂരി വഴി മൃതദേഹം കൊണ്ട് പോകണമെന്നുള്ള കാസർകോട് നിന്നെത്തിയവരുടെ ആവശ്യം അൽപ നേരം വാക്ക് തര്‍ക്കമുണ്ടാക്കി. മുസ്ലിം ലീഗ് നേതാക്കളും ഈ ആവശ്യമുന്നയിച്ച് ഉന്നതങ്ങളിൽ ബന്ധപ്പെട്ടു. സംഘര്‍ഷാവസ്ഥ കണക്കിലെടുത്ത് മൃതദേഹം കാസർകോട് വഴി കൊണ്ട് പോകുന്നതിന് അനുമതി നല്‍കാനാവില്ലെന്ന നിലപാടില്‍ പോലീസ് ഉറച്ച് നിന്നു. തുടര്‍ന്ന് ഡി ജി പിയുടെ നിര്‍ദ്ദേശാനുസരണം ഇരിട്ടി വഴി കുടകിലേക്ക് പുറപ്പെടുകയായിരുന്നു.

കൊട്ടമുടി ആസാദ് നഗര്‍ ജമാഅത്ത് പരിസരത്ത് എത്തിയ മൃതദേഹത്തെ ഒരു നോക്ക് കാണാന്‍ ആയിരങ്ങളാണ് തടിച്ച് കൂടിയത്. ചൂരി ജമാഅത്ത് ഭാരവാഹികളുടെ നേതൃത്തില്‍ കാസർകോട് നിന്നും നിരവധി ആളുകള്‍ അന്ത്യ കര്‍മത്തില്‍ സംബന്ധിക്കാന്‍ എത്തിയിരുന്നു.