വീടുകളിൽ പെരുന്നാൾ ആഘോഷിച്ച് വിശ്വാസികൾ

ആഘോഷത്തിന് പൊലിമ കുറവാണെങ്കിലും ഉള്ളത് കൊണ്ട് എല്ലാം ഭംഗിയാക്കാൻ എല്ലാ വീടുകളിലും മുതിർന്നവരും സ്ത്രീകളും ശ്രദ്ധിച്ചു.

ഇത്തവണ റമദാന്‍ മുപ്പത് പൂര്‍ത്തിയാക്കിയാണ് വിശ്വാസികള്‍ ചെറിയ പെരുന്നാൾ ആഘോഷിക്കുന്നത്. പൂർണമായും കോവിഡ് നിയന്ത്രണം പാലിച്ചായിരുന്നു ഈ നോമ്പ് കാലം കടന്നുപോയത്. പുതുവസ്ത്രം പോലും വാങ്ങാതെയാണ് പലരും ചെറിയ പെരുന്നാള്‍ ആഘോഷത്തിന്റെ ഭാഗമാകുന്നത്.

പെരുന്നാള്‍ ദിനത്തില്‍ ഭക്ഷണമൊരുക്കാനുള്ള അവശ്യസാധനങ്ങള്‍ വാങ്ങാനാണ് വിശ്വാസികള്‍ ആകെ വീടിന് പുറത്തിറങ്ങിയത്. മത്സ്യ-മാംസ കമ്പോളങ്ങളില്‍ അതുകൊണ്ട് തന്നെ കോവിഡ് മാനദണ്ഡങ്ങൾ പാലിച്ചുകൊണ്ടുള്ള തിരക്ക് അനുഭവപ്പെട്ടു. വ്യാപാര കേന്ദ്രങ്ങളിലൊന്നും പെരുന്നാള്‍ തലേന്നത്തെ പതിവ് തിരക്കുകൾ ഉണ്ടായിരുന്നില്ല.

കോവിഡ് കാലത്തെ മാന്ദ്യം വിപണിയെ കാര്യമായി തന്നെ ബാധിച്ചു. പുത്തൻ വസ്ത്രങ്ങൾ എത്തിച്ച വസ്ത്രവ്യാപാരികളാണ് ശരിക്കും പ്രതിസന്ധിയിലായത്. ആഘോഷങ്ങള്‍ കുറച്ച് കോവിഡ് മുക്തിക്കായി പ്രാര്‍ഥിക്കാനാണ് വിശ്വാസികളോട് ഇത്തവണ മത പണ്ഡിതർ ആഹ്വാനം ചെയ്തത്. ഫിതർ സകാത്തും നടത്തി.

Keywords:  Ramadan, Kasaragod, News, Kerala, State, Celebration, Festival, Top-Headlines, Eid al-Fitr, Believers celebrate Eid al-Fitr in their homes.