ആത്മീയ സംഗമങ്ങളുടെ പൂക്കാലം: ഖാസി ഉമറുൽ ഫാറൂഖ് അൽ ബുഖാരി ഉറൂസ് 19-ന് ആരംഭിക്കും

കാസർകോട്: (KasargodVartha) നിരവധി മഹല്ലുകളുടെ ഖാസിയും ആയിരങ്ങൾക്ക് ആത്മീയ അഭയവുമായിരുന്ന ഖാസി സയ്യിദ് മുഹമ്മദ് ഉമറുൽ ഫാറൂഖ് അൽ ബുഖാരി പൊസോട്ട് തങ്ങളുടെ പത്താമത് ഉറൂസ് മുബാറക്കും, തങ്ങൾ സ്ഥാപിച്ച ഹോസങ്കടി മള്ഹർ സ്ഥാപന സമുച്ചയത്തിന്റെ രജത ജൂബിലി ആഘോഷങ്ങളും ജൂൺ മാസം 19-ന് വ്യാഴാഴ്ച ആരംഭിക്കും. 

വിവിധ ആത്മീയ സാംസ്കാരിക സംഗമങ്ങൾക്ക് ശേഷം 22-ന് രാത്രി നടക്കുന്ന പൊതുസമ്മേളനത്തോടെ പരിപാടികൾക്ക് സമാപനമാകും. മത, സാമൂഹിക, സാംസ്കാരിക മേഖലകളിലെ പ്രമുഖർ സമ്മേളനത്തിൽ പങ്കെടുക്കും.

ഉറൂസിന്റെ അനുബന്ധ പരിപാടികൾക്ക് തിങ്കളാഴ്ച വൈകിട്ട് 5 മണിക്ക് സയ്യിദ് ഹാമിദ് ഇമ്പിച്ചിക്കോയ തങ്ങൾ കൊയിലാണ്ടിയുടെ നേതൃത്വത്തിൽ നടക്കുന്ന മഖാം സിയാറത്തോടെ തുടക്കമാകും. സ്വാഗതസംഘം ചെയർമാൻ സയ്യിദ് അതാവുല്ല തങ്ങൾ പതാക ഉയർത്തും. 

രാത്രി 7-ന് ശാദുലി റാത്തീബ് നടക്കും. ജൂൺ 17-ന് വൈകിട്ട് 4:30-ന് മുസ്തഫ നഈമി ആവേരിയുടെ നേതൃത്വത്തിൽ മാനവ സംഗമം നടക്കും. രാത്രി നടക്കുന്ന ജലാലിയ്യ റാത്തീബിന് സയ്യിദ് കെ.എസ്. ജഅ്ഫർ സ്വാദിഖ് തങ്ങൾ കുമ്പോൽ നേതൃത്വം നൽകും. 18-ന് വൈകിട്ട് 3:30-ന് പ്രവാസി സംഗമവും രാത്രി 7-ന് സയ്യിദ് മുത്തുക്കോയ തങ്ങൾ കണ്ണവം നേതൃത്വം നൽകുന്ന മഹ്ളറത്തുൽ ബദരിയ്യ ആത്മീയ സംഗമവും നടക്കും.

ഉറൂസിന്റെയും മള്ഹർ സിൽവർ ജൂബിലിയുടെയും ഔപചാരിക ഉദ്ഘാടനം 19-ന് വ്യാഴാഴ്ച വൈകിട്ട് 4:30-ന് സമസ്ത കേന്ദ്ര ഉപാധ്യക്ഷൻ സയ്യിദ് കെ.എസ്. ആറ്റക്കോയ തങ്ങൾ കുമ്പോൽ നിർവഹിക്കും. സൈനുൽ ഉലമ അബ്ദുൽ ഹമീദ് മുസ്ലിയാർ മാണി അധ്യക്ഷത വഹിക്കുന്ന ചടങ്ങിൽ എസ്.വൈ.എസ്. സംസ്ഥാന പ്രസിഡന്റ് ഡോ. അബ്ദുൽ ഹകീം അസ്ഹരി മുഖ്യപ്രഭാഷണം നടത്തും. അന്ന് രാത്രി 7-ന് നടക്കുന്ന സ്വലാത്ത് മജ്ലിസിന് സയ്യിദ് ശഹീർ ബുഖാരി, സയ്യിദ് ജലാലുദ്ദീൻ ബുഖാരി, സ്വാലിഹ് സഅദി, ഹംസക്കോയ ബാഖവി എന്നിവർ നേതൃത്വം നൽകും.

20-ന് വെള്ളിയാഴ്ച ജുമുഅക്ക് ശേഷം സയ്യിദ് അബ്ദുറഹ്‌മാൻ ഇമ്പിച്ചക്കോയ തങ്ങൾ ബായാർ അനുസ്മരണ സംഗമത്തിന് നേതൃത്വം നൽകും. 4:30-ന് സയ്യിദ് മുഹമ്മദ് ഇബ്രാഹീം പൂക്കുഞ്ഞി തങ്ങൾ കല്ലക്കട്ടയുടെ നേതൃത്വത്തിൽ ഹദായ ആത്മീയ സംഗമം നടക്കും. രാത്രി 7-ന് സയ്യിദ് പി.എസ്. ആറ്റക്കോയ തങ്ങൾ ബാഹസൻ ജൽസത്തുന്നസീഹ ഉദ്ഘാടനം ചെയ്യും.

21-ന് രാവിലെ 10-ന് മൾഹരി പണ്ഡിത സംഗമവും 11 മണിക്ക് യുവ പണ്ഡിതർക്ക് സ്ഥാനവസ്ത്ര വിതരണവും നടക്കും. ഉച്ചയ്ക്ക് 2-ന് നടക്കുന്ന പ്രാസ്ഥാനിക സമ്മേളനം സയ്യിദ് ഹസൻ അഹ്ദൽ തങ്ങളുടെ അധ്യക്ഷതയിൽ ബി.എസ്. അബ്ദുല്ല കുഞ്ഞി ഫൈസി ഉദ്ഘാടനം ചെയ്യും. 

എസ്.എസ്.എഫ്. സംസ്ഥാന പ്രസിഡന്റ് മുനീർ അഹ്ദൽ തങ്ങളും എസ്.വൈ.എസ്. സംസ്ഥാന സെക്രട്ടറി റഹ്മത്തുല്ല സഖാഫി എളമരവും പ്രസംഗിക്കും. രാത്രി 7-ന് നടക്കുന്ന സനദ് ദാന സമ്മേളനം സയ്യിദ് ഷഹീർ ബുഖാരി തങ്ങളുടെ അധ്യക്ഷതയിൽ സമസ്ത പ്രസിഡന്റ് ഇ. സുലൈമാൻ മുസ്‌ലിയാർ ഉദ്ഘാടനം ചെയ്യും. ഇന്ത്യൻ ഗ്രാൻഡ് മുഫ്തി കാന്തപുരം എ.പി. അബൂബക്കർ മുസ്ലിയാർ സനദ് ദാനം നിർവഹിക്കും. ഉറൂസ് സമാപന ദിവസമായ 22-ന് രാവിലെ മൗലിദ് പാരായണവും 10 മണിക്ക് തബറുക്ക് വിതരണവും നടക്കും.

വാർത്താസമ്മേളനത്തിൽ സയ്യിദ് അഹ്മദ് ജലാലുദ്ദീൻ സഅദി അൽ ബുഖാരി മൾഹർ (ജനറൽ സെക്രട്ടറി, മൾഹർ), പള്ളങ്കോട് അബ്ദുൽ ഖാദർ മദനി (കൺവീനർ, സ്വാഗതസംഘം), അഡ്വ. ഹസ്സൻ കുഞ്ഞി മൾഹർ (മാനേജർ, മൾഹർ), അബ്ദുൽ ബാരി സഖാഫി (സെക്രട്ടറി, എസ്.എസ്.എഫ്. കാസർകോട് ജില്ലാ), മുഹമ്മദ് ഉമൈർ മൾഹരി കളത്തൂർ എന്നിവർ പങ്കെടുത്തു.

ഈ ആത്മീയ സംഗമങ്ങളെക്കുറിച്ച് നിങ്ങളുടെ അഭിപ്രായം പങ്കുവയ്ക്കുക. 

Article Summary (English): Qazi Umarul Farooq Al Bukhari Urooz and Hosangadi Malhar Silver Jubilee start on June 19.

#Urooz, #MalharJubilee, #SpiritualEvent, #Kasargod, #IslamicConclave, #KeralaEvents