ചരിത്രമുറങ്ങുന്ന മാലിക് ദീനാറിനെ സാക്ഷിയാക്കി സ്ഥാനാരോഹണം; പി പി ഉമർ മുസ്ലിയാർ കൊയ്യോട് കാസർകോട് സംയുക്ത ഖാസിയായി ചുമതലയേറ്റു

കാസർകോട്: (KasargodVartha) മതസൗഹാർദത്തെ ജീവിതത്തോടൊപ്പം ചേർത്ത ബഹുഭാഷാ പണ്ഡിതനും സൂഫി ശ്രേഷ്ഠനുമായ സമസ്ത കേരള ജംഇയ്യത്തുൽ ഉലമ ജനറൽ സെക്രട്ടറി പി പി ഉമർ മുസ്ലിയാർ കൊയ്യോട് കാസർകോട് സംയുക്ത മുസ്ലിം ജമാഅത്ത് ഖാസിയായി ചുമതലയേറ്റു. തളങ്കര മാലിക് ദീനാർ വലിയ ജമാഅത്ത് പള്ളി പരിസരത്ത് നടന്ന പ്രൗഢ ഗംഭീര ചടങ്ങ് മുൻഗാമികൾ പകർന്നുനൽകിയ മതസൗഹാർദ മൂല്യങ്ങളുടെ തുടർച്ചയായി മാറി.

സ്ഥാനത്തിന് യോഗ്യൻ എന്ന് ജിഫ്രി തങ്ങൾ 

സമസ്ത കേരള ജംഇയ്യത്തുൽ ഉലമ പ്രസിഡൻ്റ് സയ്യിദ് മുഹമ്മദ് ജിഫ്രി മുത്തുകോയ തങ്ങൾ ചടങ്ങ് ഉദ്ഘാടനം ചെയ്തു. മുൻഗാമികളെ പോലെ എല്ലാ നിലയ്ക്കും കാസർകോട് ഖാസി സ്ഥാനത്തിന് യോഗ്യനാണ് ഉമർ മുസ്ലിയാരെന്ന് അദ്ദേഹം പറഞ്ഞു. ഖാസി സ്ഥാനം ഏറെ ഉത്തരവാദിത്തം നിറഞ്ഞതാണ്. ഈ നാടിൻ്റെ സൗഹാർദവും സ്നേഹവും നിലനിർത്താനും നിയന്ത്രിക്കാനും ഉമർ മുസ്ലിയാർക്ക് കഴിയട്ടെയെന്നും ജിഫ്രി തങ്ങൾ ആശംസിച്ചു.

തലപ്പാവണിയിച്ച് സാദിഖലി തങ്ങൾ 

പാണക്കാട് സയ്യിദ് സാദിഖലി ശിഹാബ് തങ്ങൾ ഖാസിയെ ശിരോവസ്ത്രവും തലപ്പാവുമണിയിച്ച് അനുഗ്രഹ പ്രഭാഷണം നടത്തി. മഹല്ലുകളെയും സമൂഹത്തെയും ഒരുമിപ്പിച്ചു നിർത്തുന്നതിൽ ഖാസിമാരുടെ പങ്ക് വലുതാണെന്നും പരമ്പരാഗത പണ്ഡിതന്മാരുടെ കീഴിൽ സമൂഹം സുരക്ഷിതമാണെന്നും സാദിഖലി ശിഹാബ് തങ്ങൾ പറഞ്ഞു. പാണ്ഡിത്യത്തിൻ്റെ നിറശോഭയ്ക്കിടയിലും സൗഹൃദം നിലനിർത്തി ഉപദേശങ്ങളും തിരുത്തലുകളും നൽകുന്ന പണ്ഡിതനാണ് ഉമർ മുസ്ലിയാർ. ജാതിമത കക്ഷി ചിന്തകൾക്കതീതമായി കാസർകോട്ടെ ഖാസി സ്ഥാനം എല്ലാവരുടേതുമാണെന്നും, പണ്ഡിതശ്രേഷ്ഠനായ ഉമർ മുസ്ലിയാരുടെ സേവനം കാസർകോട്ടെ ജനങ്ങൾക്ക് വലിയൊരു അനുഗ്രഹമായിരിക്കുമെന്നും അദ്ദേഹം കൂട്ടിച്ചേർത്തു.

വർഗീയതയെ പ്രോത്സാഹിപ്പിക്കാത്ത നാടെന്ന് ഖാസി

 മതസൗഹാർദം കാത്തുസൂക്ഷിക്കുന്ന ഖാസി പാരമ്പര്യമുള്ള പ്രദേശമാണ് കാസർകോടെന്ന് ഖാസി ചുമതല ഏറ്റെടുത്ത ശേഷം പി പി ഉമർ മുസ്ലിയാർ കൊയ്യോട് പറഞ്ഞു. വർഗീയതയോ വിഘടനവാദമോ പ്രോത്സാഹിപ്പിക്കാത്ത പാരമ്പര്യമാണ് ഈ നാടിനുള്ളത്. രാജ്യത്തിൻ്റെ വളർച്ചയ്ക്ക് മുൻകാലങ്ങളിൽ ഇവിടത്തെ മുസ്ലിം സമൂഹം വലിയ പങ്കുവഹിച്ചിട്ടുണ്ടെന്നും ഉമർ മുസ്ലിയാർ വ്യക്തമാക്കി.

പ്രമുഖരുടെ സാന്നിധ്യം 

ചടങ്ങിൽ സംയുക്ത ജമാഅത്ത് പ്രസിഡൻ്റ് എൻ എ നെല്ലിക്കുന്ന് അധ്യക്ഷനായി. ജനറൽ സെക്രട്ടറി എ അബ്ദുൽ റഹ്മാൻ സ്വാഗതം പറഞ്ഞു. കോഴിക്കോട് ഖാസി മുഹമ്മദ് കോയ തങ്ങൾ ജമലുല്ലൈലി, മംഗളൂരു ഖാസി നാസർ അബ്ദുൽ ഹയ്യ് ശിഹാബ് തങ്ങൾ പാണക്കാട്, സമസ്ത കാസർകോട് ജില്ലാ പ്രസിഡൻ്റ് എം എസ് തങ്ങൾ മദനി ഓലമുണ്ട, ദക്ഷിണ കന്നഡ ജില്ലാ പ്രസിഡൻ്റ് എൻ പി എം സൈനുൽ ആബിദീൻ തങ്ങൾ കുന്നുങ്കൈ, മുൻ മന്ത്രി സി ടി അഹമ്മദലി, മാലിക് ദീനാർ ഖത്തീബ് കെ എം അബ്ദുൽ മജീദ് ബാഖവി എന്നിവർ സന്നിഹിതരായിരുന്നു.

എസ്എംഎഫ് സംസ്ഥാന വൈസ് പ്രസിഡൻ്റ് അബ്ദുൽ റഹ്മാൻ കല്ലായി, സമസ്ത ജില്ലാ വർക്കിങ് സെക്രട്ടറി അബ്ദുല്ല ഫൈസി ചെങ്കള, മാലിക് ദീനാർ ഇസ്‌ലാമിക് അക്കാദമി പ്രിൻസിപ്പൽ അബ്ദുൽ ബാരി ഹുദവി, സംയുക്ത ജമാഅത്ത് വൈസ് പ്രസിഡൻ്റുമാരായ യഹ്‌യ തളങ്കര, അബ്ദുൽ കരീം കോളിയാട്, സി എച്ച് മുഹമ്മദ് കുഞ്ഞി ചായിൻ്റടി, അഹമ്മദ് മഖ്സൂദ് ഫോർട്ട് റോഡ്, സെക്രട്ടറിമാരായ കെ ബി മുഹമ്മദ് കുഞ്ഞി, മാഹിൻ കേളോട്ട്, എം എ എച്ച് മഹമൂദ് എന്നിവർ പ്രസംഗിച്ചു.

സ്റ്റിയറിങ് കമ്മിറ്റി അംഗങ്ങളായ സിദ്ദീഖ് നദ്‌വി ചേരൂർ, കെ എ മുഹമ്മദ് ബഷീർ, മുഈനുദ്ദീൻ കെ കെ പുറം, ടി എ ഷാഫി, കെ എം അബ്ദുൽ റഹ്മാൻ, ഹനീഫ് നെല്ലിക്കുന്ന്, പി എം മുനീർ ഹാജി, എ ബി ഷാഫി, ടി കെ മഹമൂദ് ഹാജി, യു സഅദ് ഹാജി, അഷ്റഫ് പള്ളിക്കണ്ടം, ഹമീദ് മിഹ്റാജ്, സി എ അബ്ദുല്ലക്കുഞ്ഞി ഹാജി എന്നിവരും സംസാരിച്ചു. മാലിക് ദീനാർ അക്കാദമി വിദ്യാർഥി മുഹമ്മദ് ഇബ്നു അഹമ്മദ് ഖിറാഅത്ത് നടത്തി. സംയുക്ത ജമാഅത്തിൻ്റെ കീഴിലുള്ള 109 മഹല്ലുകളിലെ ഖത്തീബുമാരും മറ്റു മതപണ്ഡിതരും വിവിധ മഹല്ല് അംഗങ്ങളും വിശ്വാസികളും ചടങ്ങിൽ പങ്കെടുത്തു.

ആരാണ് പി പി ഉമർ മുസ്ലിയാർ? 

കൊയ്യോട് ഖാസിയും സമസ്ത കേന്ദ്ര മുശാവറ അംഗവുമായിരുന്ന പരേതനായ കൊയ്യോട് മൊയ്തീൻ കുട്ടി മുസ്ലിയാരുടെ മകനാണ് പി പി ഉമർ മുസ്ലിയാർ. നിലവിൽ സമസ്ത ജനറൽ സെക്രട്ടറി, വിദ്യാഭ്യാസ ബോർഡ് ജോയിൻ്റ് സെക്രട്ടറി എന്നീ പദവികൾ അലങ്കരിക്കുന്നു. എസ്എൻഇസി ഗവേർണിംഗ് ബോർഡ് കൺവീനർ പെരിങ്ങത്തൂർ, കർണാടകയിലെ മൂഡിഗരെ തുടങ്ങിയ വിവിധ സംയുക്ത ജമാഅത്തുകളുടെയും ഖാസിയായി സേവനം അനുഷ്ഠിക്കുന്ന അദ്ദേഹം പാപ്പിനിശ്ശേരി ജാമിഅ അസ്അദിയ്യ അടക്കം വിവിധ വിദ്യാഭ്യാസ സ്ഥാപനങ്ങളുടെ പ്രസിഡൻ്റും പ്രിൻസിപ്പലുമാണ്.

നീണ്ട 19 വർഷക്കാലം കാസർകോട് സംയുക്ത മുസ്ലിം ജമാഅത്ത് ഖാസിയായിരുന്ന പ്രൊഫ. കെ ആലിക്കുട്ടി മുസ്ലിയാരുടെ നിര്യാണത്തെ തുടർന്നാണ് പുതിയ ഖാസിയെ നിയമിച്ചത്. അതിന് മുൻപ് ഇബ്രാഹീം മുസ്ലിയാർ, അബ്ദുൽ ഖാദിർ മുസ്ലിയാർ, മൗലാനാ അബ്ദുല്ല ഹാജി, എ പി അബ്ദുൽ റഹ്മാൻ മുസ്ലിയാർ, ഇ കെ ഹസ്സൻ മുസ്ലിയാർ, ടി കെ എം ബാവ മുസ്ലിയാർ എന്നീ പണ്ഡിതന്മാർ വിവിധ കാലയളവിൽ ഖാസിയായി ചുമതല വഹിച്ചിരുന്നു.

മതസൗഹാർദത്തിൻ്റെയും ഐക്യത്തിൻ്റെയും ഈ സുപ്രധാന വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: PP Umar Musliyar, General Secretary of Samastha Kerala Jamiyyathul Ulama, officially took charge as the new Qazi of Kasaragod Samyuktha Muslim Jamaath at a grand ceremony held at the Malik Deenar Juma Masjid premises. 

#PPUmarMusliyar #KasaragodQazi #MalikDeenar #Samastha #SadiqAliShihabThangal #JifriMuthukkoyaThangal #KasaragodNews #KeralaMuslims #KasargodVartha #MalayalamNews #AparnaNews