'വൈര നാമ' ഉൾപ്പെടെയുള്ളവ ലോക്കറിൽ ഭദ്രം; പോലീസിനെ തള്ളി പത്മനാഭസ്വാമി ക്ഷേത്രം ഭരണസമിതി

തിരുവനന്തപുരം: (KasargodVartha) പത്മനാഭസ്വാമി ക്ഷേത്രത്തിൽ നിന്ന് കാണാതായി എന്ന് പോലീസ് പറയുന്ന ആഭരണങ്ങൾ സുരക്ഷിതമാണെന്ന് ക്ഷേത്രം ഭരണസമിതി. ആഭരണങ്ങൾ ലോക്കറിൽ ഉണ്ടെന്നും താക്കോലുകൾ നമ്പിമാരുടെ കൈകളിൽ സുരക്ഷിതമാണെന്നും ഭരണസമിതി വാർത്താക്കുറിപ്പിലൂടെ വ്യക്തമാക്കി. 

ജില്ലാ ജഡ്ജി അധ്യക്ഷനായ ഭരണസമിതിക്ക് അഡ്മിനിസ്ട്രേറ്റീവ് ഓഫീസർ ഇത് സംബന്ധിച്ച റിപ്പോർട്ട് നൽകി. 'വൈര നാമ' ഉൾപ്പെടെയുള്ള ആഭരണങ്ങൾ ക്ഷേത്രത്തിലെ ലോക്കറിലുണ്ടെന്നാണ് റിപ്പോർട്ടിൽ പറയുന്നത്. ആഭരണങ്ങൾ കാണാനില്ലെന്ന് വ്യാജ റിപ്പോർട്ട് തയ്യാറാക്കിയ പോലീസ് ഉദ്യോഗസ്ഥർക്കെതിരെ നടപടി വേണമെന്നും ഭരണസമിതി ആവശ്യപ്പെട്ടു.

പോലീസ് റിപ്പോർട്ട് തള്ളി ഭരണസമിതി

സംസ്ഥാന പോലീസ് മേധാവിക്കുവേണ്ടി പോലീസ് ഹെഡ്ക്വാർട്ടേഴ്സിലെ എഡിജിപി സംസ്ഥാന അഡീഷണൽ ചീഫ് സെക്രട്ടറിക്ക് സമർപ്പിച്ച റിപ്പോർട്ടിലെ കണ്ടെത്തലുകൾ പൂർണ്ണമായും തെറ്റാണെന്ന് ഭരണസമിതി വ്യക്തമാക്കി.

ഡിജിപിയുടെ റിപ്പോർട്ടിൽ നഷ്ടപ്പെട്ടു എന്ന് പറയുന്ന വൈര നാമവും വിളക്കും ഉൾപ്പെടെ ശ്രീകോവിലിനുള്ളിൽ ഭദ്രമായിരിപ്പുണ്ടെന്നും, ഭക്തർ സമർപ്പിച്ച സ്വർണ്ണനാണയങ്ങളുടെയും കട്ടകളുടെയും കൃത്യമായ കണക്കുകൾ ക്ഷേത്രത്തിലുണ്ടെന്നും ഭരണസമിതി യോഗത്തിന് ശേഷം ഭാരവാഹികൾ അറിയിച്ചു.

സുരക്ഷാ പരിശോധനകൾ കർശനം

ചെമ്പകത്തിൻമൂട് നട വഴിയുള്ള പ്രവേശനം ക്ഷേത്ര സ്ഥാനിക്കും രാജകുടുംബാംഗങ്ങൾക്കും മാത്രമായി പരിമിതപ്പെടുത്തിയിട്ടുള്ളതാണെന്നും ഭരണസമിതി വ്യക്തമാക്കി. മറ്റാർക്കും ഈ വഴി പ്രവേശനമില്ല. ഭക്തരും ജീവനക്കാരും അതിഥികളും അടക്കമുള്ള എല്ലാവരും പോലീസ് സുരക്ഷാ പരിശോധനകൾക്ക് വിധേയമായി മാത്രമാണ് ക്ഷേത്രത്തിനകത്ത് പ്രവേശിക്കുന്നതും പുറത്തുപോകുന്നതും. ചില വ്യക്തികൾ സുരക്ഷാ പരിശോധനയില്ലാതെ ക്ഷേത്രത്തിൽ വന്നുപോകുന്നു എന്ന പോലീസിൻ്റെ വാദം അടിസ്ഥാനരഹിതമാണെന്നും ഭരണസമിതി വാർത്താക്കുറിപ്പിൽ വിശദീകരിച്ചു.

ക്ഷേത്ര സംബന്ധമായ ഈ വാർത്ത നിങ്ങളുടെ സുഹൃത്തുക്കൾക്കും ഗ്രൂപ്പുകളിലും ഷെയർ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: The Sree Padmanabhaswamy Temple administration has strongly refuted a police report claiming that precious ornaments are missing from the temple. The administrative committee stated that all ornaments, including the 'Vaira Nama' and lamps, are safely stored in the lockers and the Sreekovil, with the keys secured by the 'Nambis'. Rejecting the ADGP's report, the committee demanded action against the police officers who prepared the allegedly false document. The committee also dismissed claims of security lapses, asserting that the 'Chempakathinmoodu' entrance is strictly for the royal family and 'Sthani', while everyone else undergoes rigorous police security checks.

#PadmanabhaswamyTemple #ThiruvananthapuramNews #KeralaPolice #TempleOrnaments #KeralaNews #MalayalamNews