മതന്യൂനപക്ഷങ്ങൾക്ക് ഇടതുപക്ഷത്തിലും മുഖ്യമന്ത്രിയിലുമുള്ള വിശ്വാസം പുതിയ മേഖലകളിൽ വോട് നേടാനും റെകോർഡ് ഭൂരിപക്ഷത്തിൽ വിജയിക്കാനും സഹായകരമായെന്ന് എം രാജഗോപാലൻ

പിണറായി സർകാരിന്റെ വികസന - ജനക്ഷേമ പ്രവർത്തനങ്ങൾ, ദുരിത കാലത്തുള്ള പ്രവർത്തനങ്ങൾ, മണ്ഡലത്തിൽ നടത്തിയ വികസന പ്രവർത്തനങ്ങൾ എന്നിവയ്ക്കുള്ള അംഗീകാരമാണ് എൽഡിഎഫിന്റെ വിജയം. മതന്യൂനപക്ഷങ്ങൾക്കെതിരെ പൗരത്വ ബിൽ അടക്കം അപകടകരമായ നടപടികൾ കേന്ദ്ര ഗവ. ന്റെ ഭാഗത്ത് നിന്ന് ഉണ്ടായപ്പോൾ അതിനെ പ്രതിരോധിക്കാനും സംരക്ഷിക്കാനുള്ള കരുത്തും രാഷ്ട്രീയ ഇച്ഛാശക്തിയും ഇടതുപക്ഷ രാഷ്ട്രീയത്തിനും അതിന് നേതൃത്വം നൽകുന്ന മുഖ്യമന്ത്രിക്കും ആണെന്ന തിരിച്ചറിവ് മുസ്ലിം ന്യൂനപക്ഷങ്ങൾക്കിടയിൽ ഉണ്ടായെന്ന് വോട് അഭ്യർഥനയുമായി ചെന്നപ്പോൾ മനസിലാക്കാനായി. ഇത് പുതിയമേഖലകളിൽ കൂടി വോട് വർധിപ്പിച്ചു.

മണ്ഡലത്തിൽ നടത്തിയ 1436 കോടിയുടെ വികസന പ്രവർത്തനങ്ങൾ വിവിധ ഘട്ടത്തിലാണ്. അവ സമയബന്ധിതമായി പൂർത്തിയാക്കാൻ മുൻഗണ നൽകും. ചെറുവത്തൂർ നീലേശ്വരം മിനി സിവിൽ സ്റ്റേഷൻ, കൊടക്കാട് ഫോക്‌ലോർ ഗ്രാമം, മാടക്കാൽ, തെക്കേക്കാട് പാലം, മടക്കര ഹാർബർ എന്നിവയുടെ പ്രവർത്തനങ്ങൾക്കു ഇടപെടലുകൾ നടത്തും.

യുവാക്കൾക്ക് തൊഴിൽ അവസരങ്ങൾ നൽകാനായി വ്യവസായ സംരംഭങ്ങൾക്ക് തുടക്കം കുറിക്കും. സായാഹ്നങ്ങളിൽ വ്യായാമത്തിനായി പഞ്ചായത്തുകൾ തോറും കേന്ദ്രങ്ങൾ സ്ഥാപിക്കും. കാർഷിക, ടൂറിസം, സാംസ്കാരികം തുടങ്ങിയ എല്ലാ മേഖലകളിലും വികസന പ്രവർത്തനങ്ങൾ നടത്താൻ കാര്യക്ഷമമായി ഇടപെടും.

മണ്ഡലത്തിന്റെ രാഷ്ട്രീയ ഭൂപടം അറിയാത്തവരാണ് താൻ തോൽക്കുമെന്ന് പറഞ്ഞു സർവേ പ്രസിദ്ധീകരിച്ചതെന്നും അദ്ദേഹം കൂട്ടിച്ചേർത്തു. < !- START disable copy paste -->