ലൈലത്തുല്‍ ഖദ്‌റിനെ വരവേല്‍ക്കാന്‍ വിശ്വാസികള്‍ ഒരുങ്ങി; പള്ളികള്‍ പ്രാര്‍ത്ഥനാനിരതം

കാസര്‍കോട്: (www.kasargodvartha.com 11.06.2018) വിശുദ്ധ ഖുര്‍ആന്‍ അവതരിക്കപ്പെട്ട ലൈലത്തുല്‍ ഖദ്‌റിനെ വരവേല്‍ക്കാന്‍ വിശ്വാസികള്‍ ഒരുങ്ങി. റമദാനിന്റെ 27-ാം രാവില്‍ ലൈലത്തുല്‍ ഖദ്‌റിനെ കൂടുതല്‍ പ്രതീക്ഷിക്കുന്നതോടെ തിങ്കളാഴ്ച രാത്രി പള്ളികള്‍ പ്രാര്‍ത്ഥനാനിരതമാകും. ആയിരം മാസത്തേക്കാള്‍ പുണ്യമുള്ള രാവ് എന്ന് ഖുര്‍ആനില്‍ അല്ലാഹു വിശേഷിപ്പിച്ച രാവില്‍ വിശ്വാസികള്‍ പുലരും വരെ പള്ളികളില്‍ ഇബാദത്തിലായി മുഴുകും.


പള്ളികളില്‍ മണിക്കൂറുകള്‍ നീണ്ട തസ്ബീഹ് നിസ്‌ക്കാരവും പാപങ്ങള്‍ക്ക് മാപ്പപേക്ഷിച്ച് കരഞ്ഞുകൊണ്ടുള്ള കൂട്ടപ്രാര്‍ത്ഥനകളും നടക്കും. അനുഗ്രഹങ്ങള്‍ ചൊരിയപ്പെടുന്നതോടൊപ്പം പശ്ചാത്താപം സ്വീകരിക്കപ്പെടാന്‍ ഏറ്റവും സാധ്യതയുള്ള രാവ് എന്ന് വിശേഷിപ്പിക്കപ്പെട്ടതിനാല്‍ ഏറ്റവും കൂടുതല്‍ ദാനധര്‍മ്മങ്ങള്‍ നല്‍കപ്പെടുന്നതും ഇരുപത്തേഴാം രാവിലാണ്. ഈ രാവ് പുലരുന്നതോടെ മിക്ക വീടുകളിലും ഈദുല്‍ ഫിത്വറിനെ വരവേല്‍ക്കാനുള്ള ഒരുക്കങ്ങള്‍ക്ക് തുടക്കമാകും.