കർക്കടക തെയ്യങ്ങൾ; കേരളീയ തെയ്യ സംസ്കാരവും തുളുനാടൻ ഭൂതക്കോലവും ഒത്തുചേരുന്ന അപൂർവ സമന്വയം

കുമ്പള: (KasargodVartha) ഭാഷാപരമായും സാംസ്കാരികമായും ഏറെ വൈവിധ്യങ്ങൾ കാത്തുസൂക്ഷിക്കുന്ന പ്രദേശമാണ് കാസർകോട് അതിർത്തി ഗ്രാമങ്ങൾ. കാസർകോട് ജില്ലയിലെ ചന്ദ്രഗിരി പുഴയ്ക്ക് വടക്കുള്ള കുമ്പള സ്വരൂപത്തിലെ അഥവാ മായ്പ്പാടി സ്വരൂപത്തിലെ തെയ്യങ്ങൾക്ക് സാംസ്കാരികമായി ഏറെ സവിശേഷതകളുണ്ട്. കേരളീയ തെയ്യ സംസ്കാരവും കർണാടകത്തിലെ തുളുനാടൻ ഭൂതക്കോല പാരമ്പര്യവും ഒത്തുചേരുന്ന ഒരു സാംസ്കാരിക സമന്വയമാണ് ഇവിടത്തെ തെയ്യങ്ങളുടെ പ്രധാന വിശേഷം. 

നൂറ്റാണ്ടുകളുടെ ചരിത്രമുള്ള ഈ പാരമ്പര്യം ഇന്നും യാതൊരു കോട്ടവും തട്ടാതെ പ്രാദേശിക ജനത കാത്തുസൂക്ഷിച്ചു പോരുന്നുണ്ട്. കുമ്പള പ്രദേശത്ത് കർക്കടക മാസത്തിൽ വീടുകൾതോറും കയറിയിറങ്ങുന്ന പ്രധാന കർക്കടക തെയ്യങ്ങൾ മൂന്നെണ്ണമാണ്. ഉത്തര മലബാറിലെ മറ്റു ഭാഗങ്ങളിൽ ആടിയും വേടനും മാത്രമുള്ളപ്പോൾ, കുമ്പള ഉൾപ്പെടുന്ന തുളുനാടൻ അതിർത്തിയിൽ മഹാഭാരതത്തിലെ കിരാത പർവം കഥയെ അടിസ്ഥാനമാക്കി വേടൻ, ആടി, ഗളിഞ്ചൻ എന്നീ മൂന്ന് തെയ്യങ്ങൾ ഭക്തിപൂർവം കെട്ടിയാടുന്നു.

വേടൻ, ആടി, ഗളിഞ്ചൻ തെയ്യങ്ങൾ

പാശുപതാസ്ത്രം നൽകുന്നതിനായി അർജുനനെ പരീക്ഷിക്കാൻ വേട രൂപത്തിൽ വന്ന പരമശിവൻ്റെ സങ്കൽപമാണ് വേടൻ തെയ്യം. മലയൻ സമുദായത്തിലെ കൊച്ചുകുട്ടികളാണ് ഈ തെയ്യം കെട്ടിയാടുന്നത്. കർക്കടക മാസത്തിലെ ആദ്യ പകുതിയിലാണ് വേടൻ തെയ്യം വീടുകളിൽ എത്തുന്നത്. ദാരിദ്ര്യവും ദുരിതങ്ങളും അകറ്റി ഐശ്വര്യം നൽകാനാണ് വേടൻ വരുന്നത് എന്നാണ് പ്രദേശവാസികളുടെ വിശ്വാസം. 

വേട രൂപം പൂണ്ട ശിവനോടൊപ്പം കാട്ടാളത്തിയായി വന്ന പാർവതി ദേവിയുടെ സാങ്കൽപിക രൂപമാണ് ആടി തെയ്യം. ഇതിനെ 'കർക്കിടോത്തി' എന്നും വിളിക്കാറുണ്ട്. മണ്ണാർ സമുദായത്തിലെ കുട്ടികളാണ് ഈ തെയ്യം കെട്ടുന്നത്. ഗളിഞ്ചൻ തെയ്യമാണ് കുമ്പളയുടെ ആത്മാവായി കണക്കാക്കപ്പെടുന്നത്. ഇതിന് ഒരുപാട് ചരിത്രങ്ങളുണ്ട്. ശിവനോട് യുദ്ധം ചെയ്ത അർജുനൻ്റെ സങ്കൽപമാണ് ഗളിഞ്ചൻ തെയ്യം. 

കുമ്പള ഉൾപ്പെടുന്ന തുളുനാടൻ മേഖലയിൽ മാത്രം കാണാറുള്ള സവിശേഷമായ തെയ്യമാണിത്. തുളു പാരമ്പര്യമുള്ള നാൽക്കത്തായ സമുദായത്തിലെ കുട്ടികളാണ് ഈ തെയ്യം കെട്ടിയാടുന്നത്. ഇതിൻ്റെ 'തോറ്റപ്പാട്ടുകൾ' മലയാളത്തിന് പകരം പൂർണമായും തുളു ഭാഷയിലാണ് പാടുന്നത്. അതുകൊണ്ടുതന്നെ അതിന് തുളുനാട്ടിൽ വല്ലാത്തൊരു മനോഹാരിതയുമുണ്ട്. നാടൻ കലകളുടെ തനിമ ഒട്ടും ചോർന്നുപോകാതെയാണ് ഈ വരികൾ തലമുറകളായി കൈമാറി വരുന്നത്.

ഗുരുതി തർപ്പണവും വഴിപാടുകളും

കർക്കടകമാസം പകുതിയാകുമ്പോൾ വീട്ടിലെത്തുന്ന ഈ തെയ്യം കോലങ്ങൾ വീട്ടിലെ ദോഷങ്ങൾ അകറ്റാൻ സഹായകമാവുന്നുവെന്നാണ് വിശ്വാസം. പതിറ്റാണ്ടുകളായിട്ടുള്ള ഈ ആചാരം ഇന്നും കുമ്പളയുടെ വിവിധ ഭാഗങ്ങളിൽ സജീവമായി കെട്ടിയാടുന്നുണ്ട്. വീട്ടിലെത്തുന്ന തെയ്യം കൂട്ടങ്ങളെ വീട്ടുകാർ ഭക്തിപൂർവം സ്വീകരിക്കും. 

ദോഷങ്ങൾ അകറ്റാനും കൃഷി അഭിവൃദ്ധിക്കും മഞ്ഞളും ചുണ്ണാമ്പും ചേർന്ന ചുവന്ന 'ഗുരുതി' വെള്ളം ഉഴിഞ്ഞെടുക്കുന്ന ചടങ്ങുമുണ്ട്. ഈ ചടങ്ങിന് വേണ്ടി തെയ്യം കെട്ടിയാടിയതിന് ശേഷം മേൽപ്പറഞ്ഞ 'ഗുരുതി' വെള്ളം വീടിന് ചുറ്റും ഒഴുക്കും. അതോടെ ഒരു വീട്ടിലെ പരിപാടിക്ക് സമാപനമാവും. പ്രകൃതിയും മനുഷ്യനും തമ്മിലുള്ള അഭേദ്യമായ ബന്ധമാണ് ഇത്തരം ആചാരങ്ങളിലൂടെ പ്രതിഫലിക്കുന്നത്. 

പണ്ടുകാലത്ത് കെട്ടിയാടുന്ന ഇത്തരം തെയ്യങ്ങൾക്ക് വീട്ടുകാർ 'ദഡ്പ്പയിൽ' വലിയ ദക്ഷിണ നൽകുമായിരുന്നു. അതിൽ അരിയും ഉപ്പുതൊട്ട് കർപ്പൂരം വരെയുള്ള മറ്റു അവശ്യസാധനങ്ങളുമുണ്ടാകുമായിരുന്നുവെന്ന് കുമ്പളയിലെ പ്രമുഖ തെയ്യം കലാകാരൻ അജയ് ആരിക്കാടി പറയുന്നു. എന്നാൽ ഇന്ന് മിക്ക വീടുകളിൽ നിന്നും പണമാണ് പ്രധാനമായും ദക്ഷിണയായി നൽകുന്നത്. കാലഘട്ടത്തിനനുസരിച്ച് ആചാരങ്ങളുടെ അനുഷ്ഠാന രീതികളിൽ വന്ന മാറ്റമാണ് ഇതിലൂടെ വ്യക്തമാകുന്നത്.

വിവിധ തെയ്യങ്ങളും ഐതിഹ്യങ്ങളും

കർക്കടകമല്ലാത്ത മറ്റ് മാസങ്ങളിൽ കുമ്പളയിൽ വിവിധ ആഘോഷ പരിപാടികളിലും മതപരമായ ചടങ്ങുകളിലും വിവിധങ്ങളായ തെയ്യങ്ങൾ കെട്ടിയാടുന്നുണ്ട്. കുണ്ടൂർ ചാമുണ്ഡി, കുറത്തി തെയ്യം, മന്ത്രമൂർത്തി, ആലി ചാമുണ്ഡി, ധൂമാവലി, പഞ്ചുരുളി, കൃഷ്ണമൂർത്തി, ഭഗവതി തുടങ്ങിയവ അതിൽ ഉൾപ്പെടുന്നു. കുമ്പള രാജവംശത്തിൻ്റെ പ്രധാന വരദേവതയാണ് കുണ്ടൂർ ചാമുണ്ഡി. കോപ്പാളർ സമുദായത്തിൽ പെട്ടവരാണ് ഈ തെയ്യം പ്രധാനമായും കെട്ടിയാടുന്നത്. 

കുമ്പള ഭാഗങ്ങളിൽ കെട്ടിയാടുന്ന വളരെ ശക്തമായ മറ്റൊരു ആരാധനാമൂർത്തിയാണ് 'മന്ത്രമൂർത്തി'. കുമ്പള ആരിക്കാടിയിൽ കെട്ടിയാടുന്ന വളരെ പ്രശസ്തമായ തെയ്യമാണ് ആലി ചാമുണ്ഡി. ആലി എന്ന മുസ്ലിം യുവാവിൻ്റെ ആത്മാവും ചാമുണ്ഡി ദേവിയുടെ ചൈതന്യവും ചേർന്ന ഐതിഹ്യമാണ് ഇതിന് പിന്നിലുള്ളത്. ആരിക്കാടി ഭഗവതി ക്ഷേത്രവുമായി ബന്ധപ്പെട്ടതാണ് ഇതിൻ്റെ പ്രധാന ഐതിഹ്യം. 

മതസൗഹാർദത്തിൻ്റെ ഉത്തമ ഉദാഹരണമായി നിലകൊള്ളുന്ന ഈ തെയ്യം കാണാൻ നാനാജാതി മതസ്ഥരും ക്ഷേത്രമുറ്റത്ത് എത്താറുണ്ട്. ഇവിടത്തെ ഭൂരിഭാഗം തെയ്യങ്ങളുടെയും 'തോറ്റങ്ങൾ' ചൊല്ലുന്നത് മലയാളത്തിന് പകരം തുളു ഭാഷയിലാണ് എന്ന പ്രത്യേകതയുമുണ്ട്. കുമ്പളയിലെ ഓരോ പ്രദേശത്തും ഓരോ തെയ്യങ്ങളും ഐതിഹ്യങ്ങളുമുണ്ട്. അതിനനുസരിച്ച് ഓരോ വർഷവും വ്യത്യസ്ത മാസങ്ങളിലായി ക്ഷേത്രങ്ങളിലും മറ്റും ഭക്തിസാന്ദ്രമായി തെയ്യങ്ങൾ കെട്ടിയാടുന്നു. ഇത് കാണാൻ വലിയ ജനാവലിയാണ് എപ്പോഴും തടിച്ചുകൂടാറുള്ളത്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിവരങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Kumbla in Kasaragod showcases a rich blend of Theyyam and Bhuta Kola cultures.

#KasaragodNews #KumblaTheyyam #BhutaKola #TulunaduCulture #KeralaTourism #TheyyamSeason #AparnaNews