കാനത്തൂർ ശ്രീ നാൽവർ ദൈവസ്ഥാനം കളിയാട്ട മഹോത്സവത്തിന് ശനിയാഴ്ച തുടക്കം; ജനുവരി രണ്ട് വരെ നീളുന്ന ഉത്സവ ലഹരിയിൽ നാട്

കാസർകോട്: (KasargodVartha) ഉത്തര കേരളത്തിലും ദക്ഷിണ കർണാടകയിലും ഒരുപോലെ പ്രസിദ്ധമായ മുളിയാർ കാനത്തൂർ ശ്രീ നാൽവർ ദൈവസ്ഥാനത്തെ വാർഷിക കളിയാട്ട മഹോത്സവത്തിന് ശനിയാഴ്ച (ഡിസംബർ 27) തുടക്കമാകും. 2026 ജനുവരി രണ്ട് വരെ നീണ്ടുനിൽക്കുന്ന ഉത്സവത്തിനായുള്ള എല്ലാ ഒരുക്കങ്ങളും പൂർത്തിയായതായി ആഘോഷക്കമ്മിറ്റി ഭാരവാഹികൾ വാർത്താസമ്മേളനത്തിൽ അറിയിച്ചു.
ശനിയാഴ്ച രാവിലെ ഒമ്പത് മണിക്ക് തന്ത്രി ഇരിവൽ കേശവതന്ത്രിയുടെ കാർമ്മികത്വത്തിൽ കാവിലും കൊട്ടാരത്തിലും കളരി വീട് പടിപ്പുരയിലും നടക്കുന്ന ശുദ്ധി കലശത്തോടെ മഹോത്സവത്തിന് സമാരംഭം കുറിക്കും. ഏഴ് ദിവസം നീണ്ടുനിൽക്കുന്ന ഉത്സവത്തിൽ വിവിധ തെയ്യക്കോലങ്ങൾ അരങ്ങിലെത്തും.

പ്രധാന ചടങ്ങുകൾ

ഡിസംബർ 28 ഞായറാഴ്ച രാവിലെ കളരി, കൊട്ടാര സന്നിധികളിലെ ആനപ്പന്തൽ അലങ്കരിക്കൽ ചടങ്ങ് നടക്കും. വൈകുന്നേരം മൂന്ന് മണിക്ക് നാൽവർ ദൈവങ്ങളുടെ മൂലസ്ഥാനമായ കാവിൽ നിന്നും തിരുവായുധങ്ങളും ഭണ്ഡാരവും കൊട്ടാരത്തിലേക്ക് എഴുന്നള്ളിക്കും. രാത്രി ഏഴ് മണിക്ക് ഇളയോർ ദൈവങ്ങളുടെ ദർശനവും കളരി വീട്ടിലേക്കുള്ള പുറപ്പാടും നടക്കും. തുടർന്ന് രാത്രി ഒമ്പത് മണിക്ക് തിരുവായുധങ്ങളോടെ തിരിച്ചെഴുന്നള്ളത്ത് ഉണ്ടാകും.

തെയ്യങ്ങളുടെ അരങ്ങ്

ഡിസംബർ 29 തിങ്കളാഴ്ച പുലർച്ചെ നാല് മണിക്ക് ചാമുണ്ഡി തെയ്യം അരങ്ങിലെത്തുന്നതോടെ പ്രധാന തെയ്യങ്ങളുടെ വരവായി. രാവിലെ എട്ട് മണിക്ക് പഞ്ചുർളി തെയ്യവും സന്ധ്യയ്ക്ക് മൂത്തോർ തെയ്യങ്ങളും കെട്ടിയാടും. തുടർന്ന് കൊട്ടാരത്തിൽ ബംബേര്യൻ, മാണിച്ചി തെയ്യങ്ങളുടെ ദർശനം നടക്കും.
ചൊവ്വാഴ്ച (ഡിസംബർ 30) പുലർച്ചെ നാല് മണിക്ക് ചാമുണ്ഡി തെയ്യങ്ങളുടെ ദർശനം ആരംഭിക്കും. രാവിലെ ഏഴിന് കുണ്ടങ്കലയൻ തെയ്യവും ഒമ്പത് മണിക്ക് ഉഗ്രമൂർത്തിയായ പഞ്ചുർളി തെയ്യവും അരങ്ങിലെത്തും. രാത്രി 11 മണിക്ക് പാഷാണമൂർത്തി തെയ്യത്തിന്റെ പുറപ്പാട് നടക്കും.
ഡിസംബർ 31 ബുധനാഴ്ച രാവിലെ ഒമ്പത് മണിക്ക് രക്തേശ്വരി ദൈവങ്ങളുടെ ദർശനവും ഉച്ചയ്ക്ക് രണ്ട് മണിക്ക് വിഷ്ണുമൂർത്തിയുടെ വരവും നടക്കും. രാത്രി 12 മണിക്ക് പാഷാണമൂർത്തി ഭക്തജനങ്ങൾക്ക് ദർശനം നൽകും.

പുതുവർഷ ദിനത്തിലെ ചടങ്ങുകൾ

2026 ജനുവരി ഒന്ന് വ്യാഴാഴ്ച പുലർച്ചെ നാല് മണിക്ക് നാൽവർ ദൈവങ്ങളുടെ വെളിച്ചപ്പാട് ദർശനത്തോടു കൂടി പ്രധാന ചടങ്ങായ കരിക്ക് കുളിക്കലിനായി ഇരിയണ്ണിയിലേക്കുള്ള പുറപ്പാട് നടക്കും. രാവിലെ ഒമ്പത് മണിക്ക് രക്തേശ്വരി ദൈവങ്ങളും ഉച്ചയ്ക്ക് ശേഷം വിഷ്ണുമൂർത്തിയും അരങ്ങിലെത്തും. തുടർന്ന് പ്രേത മോചനവും പ്രാർത്ഥന കേൾക്കലും നടക്കും.

സമാപനം

ജനുവരി രണ്ട് വെള്ളിയാഴ്ച രാവിലെ ഒമ്പത് മണിക്ക് കഴകം ഒപ്പിക്കൽ ചടങ്ങും വിളക്കിലരിയും നടക്കും. നാൽവർ ദൈവങ്ങളുടെ വെളിച്ചപ്പാടിന്റെ ദർശനത്തോടെ തിരുവായുധങ്ങളുമായി മഹാലിംഗേശ്വര ക്ഷേത്രത്തിലേക്കും കളരി വീട്ടിലേക്കുമുള്ള എഴുന്നള്ളത്ത് നടക്കും. തുടർന്ന് പുതുക്കുടി തറവാട്ടുകാർക്കും ഭണ്ഡാര വീട്ടുകാർക്കും ഭക്തജനങ്ങൾക്കും പ്രസാദ വിതരണം നടത്തുന്നതോടെ ഈ വർഷത്തെ കളിയാട്ട മഹോത്സവത്തിന് സമാപനമാകും.

ഉത്സവ ദിവസങ്ങളിൽ ഉച്ചയ്ക്കും രാത്രിയിലും ആയിരക്കണക്കിന് ഭക്തജനങ്ങൾക്കായി അന്നദാനം ഒരുക്കിയിട്ടുണ്ട്. 

വാർത്താസമ്മേളനത്തിൽ കാനത്തൂർ നാൽവർ സ്ഥാനം ഭരണ സമിതി ജനറൽ സെക്രട്ടറി കെ.പി. ബലരാമൻ നായർ, കെ.പി. ബാലചന്ദ്രൻ നായർ, കെ.പി. സോമചന്ദ്രൻ നായർ, കെ.പി. ജയകൃഷ്ണൻ, ഇ. ഗിരീഷ് കുമാർ, വി.വി. പ്രഭാകരൻ, ആഘോഷക്കമ്മിറ്റി ചെയർമാൻ പി. വേണുഗോപാലൻ നായർ എന്നിവർ പങ്കെടുത്തു.

ഉത്തര മലബാറിലെ പ്രശസ്തമായ കാനത്തൂർ ഉത്സവം ഡിസംബർ 27 മുതൽ; വാർത്ത ഷെയർ ചെയ്യൂ.

Article Summary: Kanathur Sree Nalvar Daivasthanam Kaliyattom from Dec 27 to Jan 2.

#Kanathur #Kaliyattom #Theyyam #KasaragodNews #TempleFestival #SpiritualKerala