സമസ്തയുടെ തീരുമാനങ്ങൾ പോഷക സംഘടനകൾ ഉൾക്കൊണ്ട് പ്രവർത്തിക്കണം; വിള്ളൽ വീഴ്ത്താൻ ആരും ശ്രമിക്കരുത്: ജിഫ്രി തങ്ങൾ

കാസർകോട്: (KasargodVartha) സമസ്ത കേരള ജംഇയ്യത്തുൽ ഉലമയുടെ ഉപദേശങ്ങളും തീരുമാനങ്ങളും പൂർണ്ണമായി ഉൾക്കൊണ്ട് പ്രവർത്തിക്കാൻ ഓരോ പോഷക സംഘടനകളും ബാധ്യസ്ഥരാണെന്ന് സമസ്ത അധ്യക്ഷൻ സയ്യിദ് മുഹമ്മദ് ജിഫ്രി മുത്തുക്കോയ തങ്ങൾ. സമസ്ത ശതാബ്ദി അന്താരാഷ്ട്ര മഹാസമ്മേളനത്തിന്റെ ഭാഗമായി കുണിയയിൽ സംഘടിപ്പിച്ച നേതൃ സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

പൂർവ്വികരായ മഹത്തുക്കൾ പടുത്തുയർത്തിയ ഈ പ്രസ്ഥാനത്തെ ഇകഴ്ത്താനോ സംഘടനയിൽ വിള്ളൽ വീഴ്ത്താനോ ആരും ശ്രമിക്കരുത്. സമസ്തയിൽ അഭിമാനത്തോടെ പ്രവർത്തിക്കാൻ പോഷക സംഘടനകൾക്ക് കഴിയണം. ഏൽപ്പിക്കപ്പെട്ട ഉത്തരവാദിത്തങ്ങൾ സ്വന്തം താത്പര്യങ്ങൾക്ക് വേണ്ടിയല്ല, മറിച്ച് സംഘടനയുടെ ഉന്നമനത്തിന് വേണ്ടിയാണ് വിനിയോഗിക്കേണ്ടത്. സംഘടനയെ ശക്തിപ്പെടുത്തുക എന്ന ബോധത്തോടെ വേണം പോഷക സംഘടനകൾ മുന്നോട്ട് പോകാനെന്നും ഇതിൽ യാതൊരു വിധ കളങ്കവും ഉണ്ടാകരുതെന്നും അദ്ദേഹം ഓർമ്മിപ്പിച്ചു. ഓരോ പ്രവർത്തനത്തിലും ആത്മാർത്ഥത അനിവാര്യമാണെന്നും ജിഫ്രി തങ്ങൾ കൂട്ടിച്ചേർത്തു.

സമസ്ത സെക്രട്ടറി അബ്ദുല്ല മുസ് ലിയാർ ചടങ്ങിൽ അധ്യക്ഷത വഹിച്ചു. കോഴിക്കോട് ഖാസി സയ്യിദ് മുഹമ്മദ് കോയ തങ്ങൾ ജമലുല്ലൈലി പ്രാർത്ഥനയ്ക്ക് നേതൃത്വം നൽകി. എ.വി അബ്ദുറഹ്മാൻ മുസ്ലിയാർ ആമുഖ പ്രഭാഷണം നടത്തി. കെ മോയിൻകുട്ടി, എ. അബ്ദുൽ ബാഖി എന്നിവർ സംസാരിച്ചു. ചടങ്ങിൽ 33 പേർക്ക് ഇസ്തിഖാമ സർട്ടിഫിക്കറ്റുകൾ വിതരണം ചെയ്തു.

വിവിധ പോഷക സംഘടനകളെ പ്രതിനിധീകരിച്ച് ഡോ. എൻ.എ.എം അബ്ദുൽ ഖാദർ (വിദ്യാഭ്യാസ ബോർഡ്), കുടക് അബ്ദുറഹ്മാൻ മുസ്ലിയാർ (ജംഇയ്യത്തുൽ മുഅല്ലിമീൻ), യു. മുഹമ്മദ് ശാഫി ചെമ്മാട് (എസ്.എം.എഫ്), സുലൈമാൻ ദാരിമി ഏലംകുളം (ജംഇയ്യത്തുൽ ഖുത്വബാഅ്), സി.കെ മൊയ്തീൻ ഫൈസി (ജംഇയ്യത്തുൽ മുദരിസീൻ), പുത്തനഴി മൊയ്തീൻ ഫൈസി (മദ്റസ മാനേജ്‌മെന്റ് അസോസിയേഷൻ), കെ.എച്ച് കോട്ടപ്പുഴ (ജംഇയ്യത്തുൽ മുഫത്തിശീൻ), ഹംസ റഹ്മാനി കൊണ്ടിപറമ്പ് (എസ്.വൈ.എസ്), ഒ.പി അഷ്റഫ് കുറ്റിക്കടവ് (എസ്.കെ.എസ്.എസ്.എഫ്), ശാഹുൽ ഹമീദ് മേൽമുറി (സമസ്ത എംപ്ലോയീസ് അസോസിയേഷൻ), കെ.എം കുട്ടി ഫൈസി (ഇന്റർനാഷണൽ കൗൺസിൽ), ഇസ്മാഈൽ കുഞ്ഞ് ഹാജി മാന്നാർ (പ്രവാസി സെൽ), കെ.ടി കുഞ്ഞുമോൻ ഹാജി വാണിയമ്പലം (ലീഗൽ സെൽ), സയ്യിദ് അലി ഉനൈസ് തങ്ങൾ ജമലുല്ലൈലി (സുന്നി ബാലവേദി) തുടങ്ങിയവർ സംസാരിച്ചു.

ആൾക്കൂട്ട ആക്രമണം: പ്രത്യേക നിയമനിർമ്മാണം വേണം; വ്യാജ ത്വരീഖത്തുകൾക്കെതിരെ ജാഗ്രത- സമസ്ത പ്രമേയം

അക്രമാസക്തരായ ജനക്കൂട്ടം നടത്തുന്ന നിയമവിരുദ്ധ വിചാരണകളും കൊലപാതകങ്ങളും വർധിച്ചുവരുന്ന സാഹചര്യത്തിൽ ഇതിനെതിരെ കർശന നടപടി സ്വീകരിക്കാൻ കേന്ദ്ര, സംസ്ഥാന സർക്കാരുകൾ തയ്യാറാകണമെന്ന് സമസ്ത ശതാബ്ദി അന്താരാഷ്ട്ര മഹാസമ്മേളനം പ്രമേയത്തിലൂടെ ആവശ്യപ്പെട്ടു. ഇത്തരം കുറ്റകൃത്യങ്ങളിൽ ഏർപ്പെടുന്നവർക്ക് മാതൃകാപരമായ ശിക്ഷ ഉറപ്പുവരുത്തുന്ന പ്രത്യേക നിയമനിർമ്മാണം അനിവാര്യമാണെന്നും സമ്മേളനം ചൂണ്ടിക്കാട്ടി.

രാജ്യത്തെ പൗരന്മാർക്ക് സമാധാനാന്തരീക്ഷത്തിൽ ജീവിക്കാനും ആശയപ്രചാരണം നടത്താനും കഴിയാത്ത സാഹചര്യം സൃഷ്ടിക്കപ്പെടുകയാണ്. മതസ്വാതന്ത്ര്യം അനുവദിക്കുകയും പൗരന്മാർക്കിടയിൽ മതത്തിന്റെ പേരിൽ വിവേചനം പാടില്ലെന്ന് നിഷ്കർഷിക്കുകയും ചെയ്യുന്ന ഭരണഘടനയുടെ 25, 15 വകുപ്പുകൾ ഉൾപ്പെടെയുള്ള രാജ്യത്തെ നിയമവ്യവസ്ഥകളെയും ജനാധിപത്യ നടപടിക്രമങ്ങളെയും നോക്കുകുത്തിയാക്കിയാണ് ആൾക്കൂട്ട ആക്രമണങ്ങൾ നടക്കുന്നത്. ഇതിനെതിരെ ശക്തമായ നിയമനടപടികൾ വേണമെന്ന് പ്രമേയം ആവശ്യപ്പെട്ടു.

പരിശുദ്ധ ശരീഅത്തിനെ വെല്ലുവിളിച്ചും ഇസ്ലാമിക പ്രമാണങ്ങളെ വികലമായി വ്യാഖ്യാനിച്ചും മുസ്ലിം സമുദായത്തിൽ രംഗത്തുവരുന്ന പിഴച്ച ത്വരീഖത്തുകൾക്കെതിരെ വിശ്വാസി സമൂഹം അതീവ ജാഗ്രത പാലിക്കണമെന്നും സമ്മേളനം ആഹ്വാനം ചെയ്തു. ശരീഅത്തിന് വിരുദ്ധമായ ആത്മീയത ഇസ്ലാമിലില്ല. ഉലമാക്കൾ കാണിച്ചുതന്ന പരിശുദ്ധമായ തസവ്വുഫിന്റെ വഴിയിൽ നിന്ന് വ്യതിചലിച്ച് സ്വയം പ്രഖ്യാപിത ശൈഖുമാരായി ചമയുന്നവർ സമുദായത്തെ വഴിതെറ്റിക്കുകയാണ്.

ആത്മീയതയുടെ പേരിൽ ശരീഅത്തിനെ അവഗണിക്കുന്നതും ഫിഖ്ഹീ നിയമങ്ങളെ നിസാരപ്പെടുത്തുന്നതുമായ ഇത്തരം വികല ചിന്താഗതികളെയും കേന്ദ്രങ്ങളെയും വിശ്വാസികൾ തിരിച്ചറിയണം. അഹ്‌ലുസ്സുന്നയുടെ ശുദ്ധമായ ആത്മീയ പാതയിൽ അടിയുറച്ചു നിൽക്കണമെന്നും പ്രമേയത്തിൽ വ്യക്തമാക്കി.

ആത്മീയ നിറവിൽ സമ്മേളന നഗരി

സമസ്ത നൂറാം വാർഷിക അന്താരാഷ്ട്ര മഹാ സമ്മേളനത്തിന്റെ രണ്ടാം ദിനമായ വ്യാഴാഴ്ച രാത്രി നടന്ന ആത്മീയ സംഗമം ഭക്തിസാന്ദ്രമായി. വിശുദ്ധമായ വെള്ളിയാഴ്ച രാവിൽ നടന്ന സദസ്സ് ആയിരങ്ങളെ ആത്മീയതയിൽ ലയിപ്പിച്ചു. കോഴിക്കോട് ഖാസി പാണക്കാട് നാസിർ അബ്ദുൽ ഹയ്യ് ശിഹാബ് തങ്ങൾ സംഗമം ഉദ്ഘാടനം ചെയ്തു.

ഒളവണ്ണ അബൂബക്കർ ദാരിമി അധ്യക്ഷത വഹിച്ചു. പി.കെ ഹംസക്കുട്ടി ബാഖവി ആദൃശ്ശേരി, കെ.എം ഉസ്മാനുൽ ഫൈസി തോടാർ എന്നിവർ വിഷയാവതരണം നടത്തി പ്രസംഗിച്ചു. എം.വി ഇസ്മാഈൽ മുസ്ലിയാർ സമാപന പ്രാർത്ഥനയ്ക്ക് നേതൃത്വം നൽകി. സഫ്വാൻ തങ്ങൾ ഏഴിമല, പാണക്കാട് ബഷീറലി ശിഹാബ് തങ്ങൾ, ഫള്ല്‍ തങ്ങൾ മേൽമുറി, ഇ.കെ കുഞ്ഞമ്മദ് മുസ്ലിയാർ കാട്ടുമുണ്ട, താജുദ്ദീൻ ദാരിമി പടന്ന തുടങ്ങിയ പ്രമുഖർ ചടങ്ങിൽ സംബന്ധിച്ചു.

പുതിയ അപ്‌ഡേറ്റുകൾക്കായി ഞങ്ങളുടെ ഫേസ്ബുക്ക് പേജ് ലൈക്ക് ചെയ്യുക.

ഈ വാർത്ത സുഹൃത്തുക്കൾക്കും ഗ്രൂപ്പുകളിലും ഷെയർ ചെയ്യൂ.

നിങ്ങളുടെ അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Samastha President Jifri Muthukkoya Thangal urged affiliate organisations to follow the parent body's decisions faithfully during the leadership meet in Kuniya.

#Samastha #JifriThangal #Kuniya #IslamicScholars #KeralaMuslims #Samastha100 #ReligiousMeet #KasaragodNews