കലാവിസ്മയം തീർത്ത് ജയശ്രീ: 34,944 മുത്തുമണികളിൽ പാലക്കുന്നമ്മ

പാലക്കുന്ന്: (KasargodVartha) തൃക്കണ്ണാട് എ.എൽ.പി. സ്കൂളിന് സമീപം അപ്പുക്കൻ-ശാരദ ദമ്പതികളുടെ മകൾ ജയശ്രീ ഹരീഷ് മുത്തുമണികൾ കൊണ്ട് നിർമ്മിച്ച പാലക്കുന്നമ്മയുടെ ചിത്രം പാലക്കുന്ന് കഴകം ശ്രീ ഭഗവതി ക്ഷേത്ര ദണ്ഡാര വീട്ടിൽ സമർപ്പിച്ചു. 34,944 മുത്തുമണികൾ ഉപയോഗിച്ചാണ് ജയശ്രീ ഈ ചിത്രം ഒരുക്കിയത്.

ചിത്രകാരികൂടിയായ ജയശ്രീയുടെ ഏറെ നാളത്തെ ആഗ്രഹമായിരുന്നു ഇത്. മനസ്സും ശരീരവും ഭഗവതിയിൽ അർപ്പിച്ച്, വ്രതശുദ്ധിയോടും ഏകാഗ്രതയോടും ക്ഷമയോടും കൂടിയാണ് അവർ ഈ ചിത്രകലാ രൂപം പൂർത്തിയാക്കിയത്. 

ക്ഷേത്ര മുഖ്യകർമ്മി സുനീഷ് പൂജാരിയുടെയും കപ്പണക്കാൽ ആയത്താറുടെയും സാന്നിധ്യത്തിൽ, ക്ഷേത്ര കമ്മിറ്റി പ്രസിഡന്റ് അഡ്വ. കെ. ബാലകൃഷ്ണൻ, മുൻ പ്രസിഡന്റ് ഉദയമംഗലം സുകുമാരൻ, പി.വി. രാജേന്ദ്രനാഥ് കേവീസ്, റിട്ട. സംഗീത അധ്യാപിക പത്മാവതി, ഉദുമ ഹൈസ്കൂൾ റിട്ട. അധ്യാപകൻ വിശാലക്ഷൻ, ശ്രീദേവി, റിട്ട. പ്രൊഫ. ഹരീഷ് എന്നിവർ ചേർന്നാണ് ചിത്രം ഏറ്റുവാങ്ങിയത്.

ജയശ്രീ ഇതിനോടകം നിരവധി ചിത്രങ്ങൾ വരച്ചിട്ടുണ്ട്. മഹാഗണപതിയുടെ ചിത്രം ദേർളക്കട്ട കുത്താറിലെ രാജരാജേശ്വരി ക്ഷേത്രത്തിലും, മുത്തപ്പൻ വെള്ളാട്ട ചിത്രം മംഗലാപുരം റെയിൽവേ മുത്തപ്പൻ അമ്പലത്തിലും സമർപ്പിച്ചിരുന്നു. ഭർത്താവ് ഡോ. ഹരീഷ് ജയശ്രീയുടെ കലാപ്രവർത്തനങ്ങൾക്ക് പൂർണ്ണ പിന്തുണ നൽകുന്നുണ്ട്.

ഗുരുക്കന്മാരുടെ സഹായമില്ലാതെ ജന്മനാ ലഭിച്ച കഴിവു കൊണ്ട് ചിത്രകലയുടെ വിസ്മയലോകം തന്നെ തീർത്തിരിക്കുകയാണ് ജയശ്രീ. ഡയമണ്ട് പെയിന്റിങ്, ക്ലോത്ത് എംബ്രോയ്ഡറി തുടങ്ങിയ വിവിധ ശൈലികളിലുള്ള ഇവരുടെ ചിത്രങ്ങൾ ആരെയും അത്ഭുതപ്പെടുത്തുന്നതാണ്. 

താമസസ്ഥലമായ ദേർളക്കട്ട കുത്താറിൽ മനോഹരമായ പൂന്തോട്ടവും പച്ചക്കറിത്തോട്ടവുമടങ്ങുന്ന ഒരു ലോകം തന്നെ അവർ ഒരുക്കിയിട്ടുണ്ട്. ആർട്ടിസ്റ്റ് ഉദുമയിലെ മനോജ് മേഘയുടെ കീഴിൽ മ്യൂറൽ പെയിന്റിങ് പഠിക്കുന്ന തിരക്കിലാണ് ഇപ്പോൾ ജയശ്രീ

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Jayashree Hareesh donates bead-made portrait of Palakkunnu Amma.

#ArtDonation #PalakkunnuTemple #JayashreeHareesh #KeralaNews #BeadArt #InspiringStory