ആറ്റുകാൽ പൊങ്കാല അർപ്പിച്ച് മടങ്ങുന്ന ഭക്തർക്കായി വിപുലമായ യാത്രാ സൗകര്യങ്ങളൊരുക്കി റെയിൽവേയും കെ എസ് ആർ ടി സിയും; ദീർഘദൂര സർവീസുകൾ തമ്പാനൂരിൽ നിന്ന്

തിരുവനന്തപുരം: (KasargodVartha) തിരുവനന്തപുരം ആറ്റുകാൽ പൊങ്കാല അർപ്പിക്കാനെത്തുന്ന ഭക്തർക്ക് സുഗമമായി മടങ്ങിപ്പോകാൻ റെയിൽവേയും കെ.എസ്.ആർ.ടി.സിയും വിപുലമായ സൗകര്യങ്ങൾ ഒരുക്കി. ചൊവ്വാഴ്ച (03.03.2026) വിവിധ ട്രെയിനുകൾക്ക് അധിക സ്റ്റോപ്പുകൾ അനുവദിക്കുകയും ബസ് സർവീസുകളിൽ പ്രത്യേക ക്രമീകരണങ്ങൾ ഏർപ്പെടുത്തുകയും ചെയ്തിട്ടുണ്ട്.

റെയിൽവേയുടെ പ്രത്യേക സ്റ്റോപ്പുകൾ

ചൊവ്വാഴ്ച വൈകിട്ട് 3.10 ന് പുറപ്പെടുന്ന തിരുവനന്തപുരം സെൻട്രൽ - എറണാകുളം ജംക്‌ഷൻ ട്രെയിനിന് (കോട്ടയം വഴി) കഴക്കൂട്ടം, ചിറയിൻകീഴ്, വർക്കല ശിവഗിരി, കൊല്ലം, ശാസ്താംകോട്ട, കരുനാഗപ്പള്ളി, കായംകുളം, ചെങ്ങന്നൂർ, തിരുവല്ല, കോട്ടയം, ഏറ്റുമാനൂർ, വൈക്കം റോഡ്, തൃപ്പൂണിത്തുറ എന്നിവിടങ്ങളിൽ സ്‌റ്റോപ് അനുവദിച്ചു.

ഉച്ചയ്ക്ക് 2.40 ന് പുറപ്പെടുന്ന തിരുവനന്തപുരം സെൻട്രൽ - എറണാകുളം ജംക്‌ഷൻ (ആലപ്പുഴ വഴി) ട്രെയിനിന് കഴക്കൂട്ടം, ചിറയിൻകീഴ്, വർക്കല ശിവഗിരി, കൊല്ലം, കരുനാഗപ്പള്ളി, കായംകുളം, ഹരിപ്പാട്, അമ്പലപ്പുഴ, ആലപ്പുഴ, ചേർത്തല, തുറവൂർ എന്നിവിടങ്ങളിലാണ് സ്‌റ്റോപ്പുള്ളത്. വൈകിട്ട് പുറപ്പെടുന്ന തിരുവനന്തപുരം സെൻട്രൽ - ഡോ. എംജിആർ ചെന്നൈ സെൻട്രൽ സൂപ്പർഫാസ്‌റ്റ് എക്‌സ്പ്രസിന്‌ കഴക്കൂട്ടം, ചിറയിൻകീഴ് സ്‌റ്റേഷനുകളിലും അധിക സ്‌റ്റോപ് അനുവദിച്ചിട്ടുണ്ട്.

ട്രെയിനുകളുടെ സമയമാറ്റം

ചൊവ്വാഴ്ച ഉച്ചയ്ക്ക് 2.15 ന് പുറപ്പെടേണ്ട തിരുവനന്തപുരം സെൻട്രൽ - ഹസ്രത്ത് നിസാമുദ്ദീൻ എക്സ‌്പ്രസ് 15 മിനിറ്റ് വൈകി 2.30 നായിരിക്കും പുറപ്പെടുക. തിരുവനന്തപുരം സെൻട്രലിൽ നിന്ന് 1.40 ന് പുറപ്പെടേണ്ട തിരുവനന്തപുരം നോർത്ത് (കൊച്ചുവേളി) - നാഗർകോവിൽ പാസഞ്ചർ ഒരു മണിക്കൂർ വൈകി സർവീസ് തുടങ്ങും.

കൊല്ലത്ത് നിന്ന് 11.35 ന് പുറപ്പെടേണ്ട കൊല്ലം - കന്യാകുമാരി മെമു ഒന്നേകാൽ മണിക്കൂർ വൈകി 12.50 ന് കൊല്ലത്തു നിന്ന് പുറപ്പെടും. തിരുവനന്തപുരം സെൻട്രലിൽനിന്ന് 1.09 ന് പുറപ്പെടേണ്ട ഈ ട്രെയിൻ 2 മണിക്കൂർ 11 മിനിറ്റ് വൈകി 3.20 ന് മാത്രമേ പുറപ്പെടൂ. തിരുവനന്തപുരം സെൻട്രലിൽ നിന്ന് 2.35 ന് പുറപ്പെടേണ്ട നാഗർകോവിൽ - കോട്ടയം എക്സ്സ്പ്രസ് ട്രെയിനും ഒരു മണിക്കൂർ വൈകി 3.20 ന് പുറപ്പെടും.

കെ എസ് ആർ ടി സി ക്രമീകരണങ്ങൾ

പൊങ്കാല നിവേദ്യത്തിനു ശേഷം ദീർഘദൂര സർവീസുകൾ തമ്പാനൂരിലെ ബസ് ടെർമിനലിൽ നിന്നു തന്നെ തുടങ്ങുമെന്ന് കെ.എസ്.ആർ.ടി.സി അറിയിച്ചു. ഹ്രസ്വദൂര ഫാസ്‌റ്റ് പാസഞ്ചർ ബസുകൾ പാളയം മുതൽ പനവിള വരെ ലൈൻ അപ് ചെയ്‌ത ശേഷം തിരക്കനുസരിച്ച് ടെർമിനലിൽ പ്രവേശിക്കും.

നെയ്യാറ്റിൻകര, നേമം ഭാഗത്തേക്കുള്ള ബസുകൾ കിള്ളിപ്പാലത്തു നിന്നാണ് സർവീസ് ആരംഭിക്കുക. മലയിൻകീഴ്, കാട്ടാക്കട ഭാഗത്തേക്കുള്ള ബസുകൾ ബേക്കറി ജംക്‌ഷനിൽ നിന്നും തിരുവല്ലം, വിഴിഞ്ഞം ഭാഗത്തേക്കുള്ള ബസുകൾ കമലേശ്വരം സ്‌കൂളിനു മുൻവശത്തുനിന്നുമാണ് സർവീസ് ആരംഭിക്കുന്നത്.

ആറ്റുകാൽ പൊങ്കാലയ്ക്ക് എത്തുന്ന ഭക്തർക്ക് ഏറെ ഉപകാരപ്രദമാകുന്ന ഈ യാത്രാവിവരങ്ങൾ സുഹൃത്തുകൾക്കും കുടുംബാംഗങ്ങൾക്കും ഷെയർ ചെയ്യൂ. ഇതിനെക്കുറിച്ചുള്ള നിങ്ങളുടെ അഭിപ്രായങ്ങൾ കമന്റായി പങ്കുവെക്കാൻ മറക്കരുത്. പുതിയ വാർത്തകളും പ്രധാന വിവരങ്ങളും സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ.

Article Summary: Extensive travel facilities, including extra train stops and KSRTC special buses, have been arranged for Attukal Pongala devotees in Thiruvananthapuram.

#AttukalPongala #Trivandrum #KSRTC #IndianRailways #KeralaNews #TravelUpdates