ആദൂർ മഞ്ഞംപാറ ഉറൂസും സഖാഫിയ്യ റാത്തിബ് വാർഷികവും ഫെബ്രുവരി 3 മുതൽ; വിപുലമായ പരിപാടികൾ
● മജ്ലിസ് മഞ്ഞംപാറയിലാണ് വിപുലമായ പരിപാടികൾ സംഘടിപ്പിക്കുന്നത്.
● യമനിൽ നിന്ന് ആദൂരിലെത്തിയ സയ്യിദ് ഹസനുസ്സഖാഫ് തങ്ങളുടെ സ്മരണാർത്ഥമാണ് ഉറൂസ്.
● ഫെബ്രുവരി 4-ന് കാൻപൂർ മെഡിക്കൽ കോളേജിന്റെ സഹകരണത്തോടെ സൗജന്യ മെഡിക്കൽ ക്യാമ്പ്.
● ക്യാമ്പിൽ കാൻസർ പരിശോധന ഉൾപ്പെടെയുള്ള വിദഗ്ധ ചികിത്സാ സൗകര്യങ്ങൾ ലഭ്യമാകും.
● ഫെബ്രുവരി 5-ന് നടക്കുന്ന സമാപന സമ്മേളനം പാണക്കാട് സയ്യിദ് ബഷീറലി ശിഹാബ് തങ്ങൾ ഉദ്ഘാടനം ചെയ്യും.
● സമദ് സഖാഫി മായനാട് മുഖ്യപ്രഭാഷണം നടത്തും; പ്രമുഖ പണ്ഡിതന്മാർ പങ്കെടുക്കും.
കാസർകോട്: (KasargodVartha) ആദൂരിന്റെ മണ്ണിൽ ആദ്യമായി എത്തിയ തിരുനബി പൗത്രപരമ്പരയിലെ കാരണവർ സയ്യിദ് ഹസനുസ്സഖാഫ് അൽ ഹള്റമി തങ്ങളുടെയും സന്തതികളുടെയും ഉറൂസും സഖാഫിയ്യ റാത്തിബ് 23-ാം വാർഷികവും ഫെബ്രുവരി മൂന്ന്, നാല്, അഞ്ച് തീയതികളിൽ നടക്കും. മജ്ലിസ് മഞ്ഞംപാറയിൽ വിപുലമായ പരിപാടികളോടെയാണ് ഉറൂസ് ആഘോഷിക്കുന്നതെന്ന് കമ്മിറ്റി ഭാരവാഹികൾ വാർത്താസമ്മേളനത്തിൽ അറിയിച്ചു. ആദൂരിന്റെ ഇസ്ലാമിക പൈതൃകം കാത്തുസൂക്ഷിക്കുന്നതിൽ സഖാഫ് തങ്ങന്മാരുടെ നേതൃത്വം നിർണായക പങ്കുവഹിച്ചിട്ടുണ്ടെന്ന് സംഘാടകർ വ്യക്തമാക്കി.
യമനിൽ നിന്ന് ആദൂരിലെത്തിയ സയ്യിദ് ഹസനുസ്സഖാഫ് തങ്ങൾ കാണിച്ചുതന്ന ആത്മീയ പാതയിൽ, മജ്ലിസ് ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ചെയർമാൻ ഷറഫു സാദാത്ത് സയ്യിദ് മുഹമ്മദ് അഷ്റഫ് അസ്സഖാഫ് മാണി തങ്ങളുടെ നേതൃത്വത്തിലാണ് കഴിഞ്ഞ 23 വർഷമായി മുടങ്ങാതെ സഖാഫിയ്യ റാത്തിബ് നടന്നുവരുന്നത്. ഫെബ്രുവരി മൂന്നിന് ചൊവ്വാഴ്ച വൈകുന്നേരം മഖാം സിയാറത്ത്, പതാക ഉയർത്തൽ എന്നിവയോടെ പരിപാടികൾക്ക് തുടക്കമാകും. തുടർന്ന് നടക്കുന്ന ഉദ്ഘാടന സമ്മേളനത്തിലും മൗലിദ് സദസ്സിലും സയ്യിദ് സാദാത്ത് തങ്ങൾ, സയ്യിദ് ഇസ്മാഈൽ മദനി തങ്ങൾ, സയ്യിദ് മിഅറാജ് തങ്ങൾ, ഇബ്രാഹിം സഖാഫി വെള്ളിയോട് തുടങ്ങി പ്രമുഖർ സംബന്ധിക്കും.
ഫെബ്രുവരി നാലിന് ബുധനാഴ്ച രാവിലെ ഒൻപത് മണി മുതൽ വൈകിട്ട് നാല് വരെ സൗജന്യ മെഡിക്കൽ ക്യാമ്പ് നടക്കും. കാണിച്ചൂർ മെഡിക്കൽ കോളേജിന്റെ സഹകരണത്തോടെ ജനറൽ, കുട്ടികൾ, സ്ത്രീകൾ, ത്വക്ക്, ഇഎൻടി, കണ്ണ്, എല്ല് വിഭാഗങ്ങൾ ഉൾപ്പെടെ വിവിധ ചികിത്സകളും കാൻസർ പരിശോധനയും ക്യാമ്പിലുണ്ടാകും. രാത്രി ഏഴിന് കളരിപ്പയറ്റും അബ്ദുറഹ്മാൻ സഅദി പള്ളപ്പാടിയുടെ നേതൃത്വത്തിൽ റിഫാഈ ദഫ് റാത്തിബും നടക്കും.
സമാപന ദിവസമായ ഫെബ്രുവരി അഞ്ചിന് രാവിലെ 10ന് അബ്ദുൽ ഹക്കീം സഖാഫി ആയാഞ്ച്വറി നയിക്കുന്ന ബോധവൽക്കരണ സെമിനാർ നടക്കും. വൈകിട്ട് നടക്കുന്ന സമാപന സമ്മേളനവും സഖാഫിയ്യ റാത്തിബ് വാർഷികവും പാണക്കാട് സയ്യിദ് ബഷീറലി ശിഹാബ് തങ്ങൾ ഉദ്ഘാടനം ചെയ്യും. സമദ് സഖാഫി മായനാട് മുഖ്യപ്രഭാഷണം നടത്തും. കുമ്പോൽ തങ്ങൾ, സയ്യിദ് സൈനുൽ ആബിദീൻ മുത്തുകോയ തങ്ങൾ, സയ്യിദ് അബ്ദുല്ലാഹ് ഇമ്പിച്ചി തങ്ങൾ ഉൾപ്പെടെയുള്ള പ്രമുഖർ ചടങ്ങിൽ പങ്കെടുക്കും.
വാർത്താസമ്മേളനത്തിൽ സയ്യിദ് മുഹമ്മദ് അഷ്റഫ് തങ്ങൾ ആദൂർ, അബ്ദുൽ ഖാദർ സഅദി കൊല്ലമ്പാടി, സയ്യിദ് മിഅറാജ് തങ്ങൾ, അനസ് സഖാഫി, തൗസീഫ് എന്നിവർ പങ്കെടുത്തു.
പുതിയ വാർത്തകൾക്കും വിവരങ്ങൾക്കുമായി ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ. ഈ വാർത്ത മറ്റുള്ളവർക്കും ഉപകാരപ്പെടും — മറക്കാതെ ഷെയർ ചെയ്യൂ.
Article Summary: The Adur Manjampara Uroos and the 23rd anniversary of Sakhafiyya Rathib will be held from February 3 to 5 with various spiritual and social programs.
#Kasaragod #AdurUroos #Manjampara #SpiritualEvent #MedicalCamp #IslamicHeritage #KeralaEvents #Uroos2026
