മുളിയാർ ഗ്രാമ പഞ്ചായത്തിന് കീഴിലെ അബ്ദുൽ കലാം ആസാദ് മൈതാനം ആർഎസ്എസ് പരിപാടിക്ക് നൽകിയതിൽ പ്രതിഷേധം; പരാതി നൽകി യൂത്ത് ലീഗ്

കാസർകോട്: (KasargodVartha) മുസ്ലിം ലീഗ് ഭരണത്തിലുള്ള മുളിയാർ ഗ്രാമ പഞ്ചായത്തിന് കീഴിലെ അബ്ദുൽ കലാം ആസാദ് ഗ്രൗണ്ട് ആർഎസ്എസ് റൂട്ട് മാർച്ചിൻ്റെ സമാപന പൊതുയോഗത്തിന് വിട്ടുനൽകിയ തീരുമാനത്തിനെതിരെ മുസ്ലിം യൂത്ത് ലീഗ് രംഗത്ത്. തീരുമാനം പുനഃപരിശോധിക്കണമെന്നാവശ്യപ്പെട്ട് മുളിയാർ പഞ്ചായത്ത് യൂത്ത് ലീഗ് കമ്മിറ്റി പഞ്ചായത്ത് സെക്രട്ടറിക്കും മുസ്ലിം ലീഗ് നേതൃത്വത്തിനും പരാതി നൽകി. 

വിജയദശമി റൂട്ട് മാർച്ചും അനുമതിയും

വിജയദശമി ദിനത്തോടനുബന്ധിച്ച് ആർഎസ്എസ് സംഘടിപ്പിക്കുന്ന റൂട്ട് മാർച്ചിൻ്റെ സമാപന പൊതുയോഗത്തിനാണ് മുളിയാർ പഞ്ചായത്തിൻ്റെ അധീനതയിലുള്ള മൈതാനം അനുവദിച്ചതെന്നാണ് യൂത്ത് ലീഗിൻ്റെ പരാതി. പരിപാടിക്ക് പഞ്ചായത്ത് സെക്രട്ടറി അനുമതി നൽകിയതാണ് നിലവിൽ വലിയ വിവാദമായിരിക്കുന്നത്. എല്ലാ വർഷവും വിജയദശമി ദിനത്തോടനുബന്ധിച്ച് ആർഎസ്എസ് രാജ്യവ്യാപകമായി ഇത്തരം പഥസഞ്ചലനങ്ങളും (റൂട്ട് മാർച്ച്) പൊതുയോഗങ്ങളും സംഘടിപ്പിക്കാറുണ്ട്. ഇതിൻ്റെ ഭാഗമായാണ് പ്രാദേശിക തലത്തിലും മൈതാനത്തിനായി അപേക്ഷ നൽകിയത്.

യൂത്ത് ലീഗിൻ്റെ എതിർപ്പും ആരോപണങ്ങളും

മതന്യൂനപക്ഷങ്ങൾക്കെതിരെ നിലപാട് സ്വീകരിക്കുന്നുവെന്ന് ആരോപിക്കുന്ന ആർഎസ്എസിന് മുസ്ലിം ലീഗ് നേതൃത്വം നൽകുന്ന പഞ്ചായത്ത് പൊതുപരിപാടിക്കായി മൈതാനം വിട്ടുനൽകിയത് പാർട്ടി പ്രവർത്തകരിലും ജനാധിപത്യ വിശ്വാസികളിലും വലിയ പ്രതിഷേധത്തിന് ഇടയാക്കിയതായി പരാതിയിൽ പറയുന്നു. ബിജെ പിയെയും സംഘപരിവാർ സംഘടനകളെയും സഹായിക്കുന്ന നടപടികളാണ് പഞ്ചായത്ത് സെക്രട്ടി സ്വീകരിച്ചുവരുന്നതെന്നും പ്രത്യക്ഷ സമരത്തിന് യൂത്ത് ലീഗ് മുന്നിട്ടിറങ്ങുമെന്നും യൂത്ത് പ്രവർത്തകർ അറിയിച്ചു. നേരത്തെ കാറടുക്കയിലും ഇവർ ബിജെപിയെ പഞ്ചായത്ത് ഭരണത്തിലെത്തിക്കാൻ കൂട്ടുനിന്നതായി യൂത്ത് ലീഗ് കേന്ദ്രങ്ങൾ ആരോപിച്ചു.

പ്രത്യേക തീവ്ര വോട്ടർപട്ടിക പുതുക്കൽ നടപടിയായ എസ്ഐആറിലൂടെയും രാജ്യത്തെ വിവിധ ഭാഗങ്ങളിലെ ബുൾഡോസർ നടപടികളിലൂടെയും മതന്യൂനപക്ഷങ്ങൾക്കെതിരെ സമ്മർദം സൃഷ്ടിക്കുന്ന വിഭാഗത്തിന് പഞ്ചായത്ത് ഗ്രൗണ്ട് അനുവദിച്ചത് രാഷ്ട്രീയമായും സംഘടനാപരമായും തെറ്റായ സന്ദേശം നൽകുന്നതാണെന്നാണ് യൂത്ത് ലീഗിൻ്റെ നിലപാട്.

എന്താണ് മൈതാനം അനുവദിക്കുന്നതിലെ ചട്ടം?

അതേസമയം, ഫീസ് വാങ്ങി പരിപാടികൾക്ക് ഗ്രൗണ്ട് വിട്ടുകൊടുക്കാമെന്നാണ് മുൻപേയുള്ള തീരുമാനമെന്നും, ആർക്കൊക്കെ നൽകാമെന്നും ആർക്കൊക്കെ നൽകരുതെന്നും വ്യക്തമാക്കിയിരുന്നില്ലെന്നുമാണ് പഞ്ചായത്ത് സെക്രട്ടറി വി കെ പ്രേമലത കാസർകോട് വാർത്തയോട് പ്രതികരിച്ചത്. താൻ അവധിയിലാണെന്നും ഇതുമായി ബന്ധപ്പെട്ട വിശദാംശങ്ങൾ പിന്നീട് പരിശോധിക്കുമെന്നും അവർ വ്യക്തമാക്കി.
തദ്ദേശ സ്വയംഭരണ സ്ഥാപനങ്ങളുടെ കീഴിലുള്ള മൈതാനങ്ങൾ നിശ്ചിത ഫീസ് ഈടാക്കി പൊതുപരിപാടികൾക്കും കായിക ആവശ്യങ്ങൾക്കും വാടകയ്ക്ക് നൽകുന്നതാണ് നിലവിലെ ചട്ടം. അപേക്ഷിക്കുന്ന സംഘടനകളുടെ രാഷ്ട്രീയമോ മതപരമോ ആയ പശ്ചാത്തലം നോക്കിമാത്രം അനുമതി നിഷേധിക്കുന്നത് നിയമക്കുരുക്കുകൾക്കും വിവേചന ആരോപണങ്ങൾക്കും കാരണമാകുമെന്നും ഭരണരംഗത്തുള്ള ഉദ്യോഗസ്ഥർ ചൂണ്ടിക്കാട്ടുന്നു.

തുടർനടപടികൾ കാത്ത് നേതൃത്വം

മുസ്ലിം ലീഗ് പ്രവർത്തകരുടെ വികാരവും ജനാധിപത്യ വിശ്വാസികളുടെ പ്രതിഷേധവും പരിഗണിച്ച് ഗ്രൗണ്ട് അനുവദിച്ച തീരുമാനം അടിയന്തരമായി പുനഃപരിശോധിക്കണമെന്ന് യൂത്ത് ലീഗ് ആവശ്യപ്പെട്ടു. വിഷയത്തിൽ ഉചിതമായ തീരുമാനം കൈക്കൊള്ളണമെന്നും അവർ നേതൃത്വത്തിന് നൽകിയ പരാതിയിൽ ചൂണ്ടിക്കാട്ടിയിട്ടുണ്ട്. ഗ്രൗണ്ട് അനുവദിച്ചതുമായി ബന്ധപ്പെട്ട് പഞ്ചായത്ത് ഭരണസമിതിക്കുള്ളിലും പാർട്ടി നേതൃത്വത്തിലും വരും ദിവസങ്ങളിൽ വിശദമായ ചർച്ചകൾക്ക് സാധ്യതയുണ്ട്. തീരുമാനം പുനഃപരിശോധിക്കുമോ എന്നതും പഞ്ചായത്ത് നേതൃത്വം വിഷയത്തിൽ എന്ത് നിലപാട് സ്വീകരിക്കുമെന്നതും ശ്രദ്ധേയമാണ്.

പ്രാദേശിക ഭരണസമിതികളുമായി ബന്ധപ്പെട്ട ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ വിശേഷങ്ങൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Youth League protests renting panchayat ground for RSS route march.

#Muliyar #KasaragodNews #MuslimYouthLeague #RSSRouteMarch #KasargodVartha #MalayalamNews #RenuNews