Launch | ചുവപ്പും മഞ്ഞയും നിറത്തിലുള്ള പതാകയുമായി തമിഴക വെട്രി കഴകം; പതാക അവതരിപ്പിച്ച് വിജയ്

ചെന്നൈ: (KasargodVartha) തമിഴ് സിനിമ താരം വിജയ് തന്റെ പുതിയ രാഷ്ട്രീയ പാർട്ടിയായ തമിഴക വെട്രി കഴകത്തിന്റെ പതാക അവതരിപ്പിച്ചു. ചെന്നൈയിൽ നടന്ന ചടങ്ങിൽ വിജയ് പതാകയുടെ നിറങ്ങളും അതിലെ പ്രതീകങ്ങളും വിശദീകരിച്ചു. പാർട്ടിയുടെ ലക്ഷ്യങ്ങളും ആശയങ്ങളും അദ്ദേഹം വ്യക്തമാക്കി.

ചുവപ്പ്‌, മഞ്ഞ നിറങ്ങളും രണ്ട് ആനകളുടെ ചിത്രവുമാണ് പതാകയിൽ ഉള്ളത്. ജനാധിപത്യം, മതേതരത്വം, സാമൂഹ്യനീതി എന്നിവയിൽ ഉറച്ചുനിൽക്കുമെന്നും ഇന്ത്യൻ ഭരണഘടനയിൽ വിശ്വാസമുണ്ടെന്നും വിജയ് വ്യക്തമാക്കി. മതസൗഹാർദ്ദത്തിനും ഐക്യത്തിനും സമത്വത്തിനുമായി തമിഴക വെട്രി കഴകം നിലകൊള്ളുമെന്നും അദ്ദേഹം പറഞ്ഞു.

തമിഴ് ഭാഷയുടെയും തമിഴ്‌നാട്ടിലെ ജനങ്ങളുടെ അവകാശങ്ങളുടെയും സംരക്ഷണത്തിനായി പ്രവർത്തിക്കുമെന്നും വിജയ് അറിയിച്ചു. തമിഴ് ഭാഷയ്ക്കായി ജീവൻ ബലി നൽകിയ  പോരാട്ടം തുടരുമെന്നും അദ്ദേഹം വ്യക്തമാക്കി.

കഴിഞ്ഞ കുറച്ച് കാലമായി തന്റെ ആരാധക സംഘടനയായ വിജയ് മക്കള്‍ ഇയക്കത്തിലൂടെ നടത്തിയിരുന്ന സാമൂഹിക പ്രവർത്തനങ്ങൾ കാലക്രമേണ രാഷ്ട്രീയ പ്രവർത്തനങ്ങളിലേക്ക് വളർന്നുവെന്നും വിജയ് പറഞ്ഞു.

തമിഴ്നാട്ടിലെ മുഴുവൻ നിയോജക മണ്ഡലങ്ങളിലെയും വിജയ് മക്കള്‍ ഇയക്കം ഭാരവാഹികളുമായി കഴിഞ്ഞ വർഷം ചെന്നൈയിൽ വിജയ് കൂടിക്കാഴ്ച നടത്തിയിരുന്നു.