വിജയ് തമിഴ്നാട് മുഖ്യമന്ത്രി; ബേക്കലിൽ പടക്കം പൊട്ടിച്ചും മധുരം വിതരണം ചെയ്തും ആരാധകൻ്റെ ആഘോഷം; ‘പണമല്ല, ജനപിന്തുണയാണ് കരുത്ത്’

ബേക്കൽ: (KasargodVartha) തമിഴ് രാഷ്ട്രീയത്തിൽ വൻ മുന്നേറ്റം നടത്തി നടൻ വിജയ് മുഖ്യമന്ത്രിയായ വിവരം പുറത്തുവന്നതോടെ ബേക്കലിൽ ആഹ്ളാദം പങ്കിട്ട് കടുത്ത ആരാധകൻ കെ കെ അബ്ദുൽ നാസർ. ബേക്കൽ കുന്നിൽ ഖിളിരിയ്യ നഗറിലെ നാസർ വർഷങ്ങളായി വിജയ്യുടെ സിനിമകളും രണ്ട് വർഷമായി അദ്ദേഹത്തിൻ്റെ രാഷ്ട്രീയ പ്രവർത്തനങ്ങളും ആവേശത്തോടെ പിന്തുടരുന്ന വ്യക്തിയാണ്. തമിഴക വെട്രി കഴകം (ടിവികെ) ആദ്യ തെരഞ്ഞെടുപ്പിൽ തന്നെ 108 സീറ്റുകൾ നേടിയെങ്കിലും കോൺഗ്രസ് അടക്കമുള്ള മറ്റു പാർട്ടികളുടെ പിന്തുണയോടെ 120 എംഎൽഎമാരുടെ പിന്തുണ ഉറപ്പാക്കി വിജയ് മുഖ്യമന്ത്രിയായതിൻ്റെ സന്തോഷത്തിലാണ് അബ്ദുൽ നാസർ.

സിനിമയിൽ നിന്ന് ഭരണസിംഹാസനത്തിലേക്ക്

'ഇളയദളപതി വിജയ് ഒരുനാൾ തമിഴ്നാടിൻ്റെ മുഖ്യമന്ത്രിയാകുമെന്ന വിശ്വാസം എനിക്ക് തുടക്കത്തിലേ ഉണ്ടായിരുന്നു. സിനിമയിലും ജനപ്രീതിയിലും അദ്ദേഹം മുന്നിലായതുപോലെ രാഷ്ട്രീയത്തിലും ജനങ്ങൾ അദ്ദേഹത്തെ ഏറ്റെടുത്തു. അത് യാഥാർത്ഥ്യമായതിൽ വലിയ സന്തോഷമുണ്ട്' എന്ന് നാസർ പറഞ്ഞു. വിജയ്യുടെ രാഷ്ട്രീയ പ്രവേശന പ്രഖ്യാപനത്തിനു പിന്നാലെ തന്നെ സാമൂഹ്യ മാധ്യമങ്ങളിലാക്കം ടിവികെയുടെ വിജയത്തിനായി പ്രചാരണ പ്രവർത്തനങ്ങളിൽ നാസർ സജീവമായിരുന്നു.

സ്വന്തം ചെലവിൽ പ്രചാരണം

വിജയ്യോടുള്ള ആരാധന മൂലം സ്വന്തം ചെലവിൽ ഫ്ലക്സുകളും ബാനറുകളും തയ്യാറാക്കി കാഞ്ഞങ്ങാടിനും കാസർകോടിനുമിടയിൽ ഏതാനും സ്ഥലങ്ങളിൽ സ്ഥാപിക്കാനും നാസർ സമയം കണ്ടെത്തി. വിജയ്യുടെ ചിത്രങ്ങളും പാർട്ടി സന്ദേശങ്ങളും ജനങ്ങളിലേക്കെത്തിക്കാനാണ് അദ്ദേഹം ഇതിലൂടെ ശ്രമിച്ചത്. വിജയവാർത്ത പുറത്തുവന്നതിന് പിന്നാലെ ബേക്കലിൽ സുഹൃത്തുക്കളെയും നാട്ടുകാരെയും കൂട്ടി പടക്കം പൊട്ടിച്ചും മധുരപലഹാരം വിതരണം ചെയ്തുമാണ് നാസർ ആഘോഷം സംഘടിപ്പിച്ചത്. നിരവധി യുവാക്കളും ആരാധകരും അദ്ദേഹത്തോടൊപ്പം ഈ ആഹ്ലാദത്തിൽ പങ്കുചേർന്നു.

'മധുരെ' കാണാൻ കോയമ്പത്തൂരിലേക്ക്

വിജയ്യുടെ സിനിമകളോടുള്ള നാസറിൻ്റെ ആരാധന നാട്ടുകാർക്കിടയിൽ നേരത്തെ തന്നെ ശ്രദ്ധേയമാണ്. ഇതുവരെ പുറത്തിറങ്ങിയ വിജയ്യുടെ എല്ലാ സിനിമകളും കണ്ടിട്ടുണ്ടെന്ന് നാസർ പറയുന്നു. കേരളത്തിൽ റിലീസ് ചെയ്യാതിരുന്ന 'മധുരെ' എന്ന സിനിമ കാണാനായി തമിഴ്നാട്ടിലെ കോയമ്പത്തൂരിലേക്ക് വരെ യാത്ര ചെയ്ത അനുഭവവും അദ്ദേഹം പങ്കുവെച്ചു. 'വിജയ് ഒരു നടൻ മാത്രമല്ല, സാധാരണ ജനങ്ങളുടെ വികാരങ്ങൾ മനസ്സിലാക്കുന്ന വ്യക്തിയാണ്. അതുകൊണ്ടാണ് അദ്ദേഹത്തിന് ഇത്രയും വലിയ ജനപിന്തുണ ലഭിച്ചത്' എന്ന് നാസർ വിശ്വസിക്കുന്നു. വിജയ്യുടെ അടുത്ത ചിത്രമായ 'ജനനായകൻ' റിലീസിനായുള്ള കാത്തിരിപ്പിലാണ് ഈ ആരാധകൻ.

തമിഴ്നാട് മുഖ്യമന്ത്രിയായി ചുമതലയേറ്റ വിജയ്യ്ക്ക് ആശംസകൾ നിങ്ങൾക്കും നേരാം. സിനിമയിൽ നിന്ന് രാഷ്ട്രീയത്തിലേക്ക് എത്തിയ വിജയ്യുടെ ഈ മാറ്റത്തെക്കുറിച്ച് നിങ്ങളുടെ അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക. പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: Abdul Nasar, a devoted fan in Bekal, Kasaragod, celebrated actor Vijay becoming the CM of Tamil Nadu by bursting crackers and distributing sweets, having campaigned for TVK at his own expense.

#VijayCM #TVK #TamilNaduPolitics #Bekal #Kasaragod #VijayFans #KeralaCelebration #Jananayakan #KasargodVartha #TamilNaduElectionResult