ഇടതുപക്ഷ സർക്കാരിനെതിരെ യുഡിഎഫിന്റെ പടപ്പുറപ്പാട്; 'പുതുയുഗ യാത്ര'യ്ക്ക് കുമ്പളയിൽ വൻ ഒരുക്കങ്ങൾ

കുമ്പള: (KasargodVartha) നിയമസഭാ തിരഞ്ഞെടുപ്പിന്റെ വിജ്ഞാപനം പടിവാതിക്കലെത്തി നിൽക്കെ ജനങ്ങളിലേക്കിറങ്ങി സംവദിക്കാൻ, 'കേരളത്തെ വീണ്ടെടുക്കാൻ' എന്ന മുദ്രാവാക്യവുമായി പ്രതിപക്ഷ നേതാവ് വി.ഡി സതീശൻ നയിക്കുന്ന 'പുതുയുഗ യാത്ര'യ്ക്ക് കുമ്പളയിൽ തുടക്കമാവും. യു.ഡി.എഫ് നേതൃത്വത്തിലെ പ്രമുഖ നേതാക്കൾ കുമ്പളയിലെത്തി. ജാഥയുടെ വിജയത്തിനായി പ്രവർത്തകരും ആവേശത്തിലാണ്.

സർക്കാരിനെതിരെ കുറ്റപത്രം 

ഇടതു സർക്കാരിനെതിരെയുള്ള നിരവധി അഴിമതി ആരോപണങ്ങളും ജനകീയ പ്രശ്നങ്ങളുമാണ് യു.ഡി.എഫിന്റെ പ്രധാന ആയുധം. ശബരിമല സ്വർണ്ണക്കൊള്ള, പയ്യന്നൂരിലെ സി.പി.എം മുൻ ഏരിയാ സെക്രട്ടറി വി. കുഞ്ഞികൃഷ്ണൻ ഉയർത്തിയ ധനരാജ് രക്തസാക്ഷിത്വ ഫണ്ട്‌ കൊള്ള തുടങ്ങിയ വിഷയങ്ങളാണ് യു.ഡി.എഫ് രാഷ്ട്രീയമായി ഉയർത്തിക്കാട്ടുന്നത്.

ഇതോടൊപ്പം കാസർകോട് ജില്ലയിലെ ആരോഗ്യമേഖലയിലെ രൂക്ഷമായ പ്രതിസന്ധിയും ജാഥയിൽ ചർച്ചയാകും. പണിതീരാത്ത കാസർകോട് മെഡിക്കൽ കോളേജ്, എയിംസ് (AIIMS) കാസർകോടിന് തരില്ലെന്ന മുഖ്യമന്ത്രിയുടെ നിലപാട് തുടങ്ങിയവ ജനമധ്യത്തിൽ ഉയർത്തിക്കാട്ടിയായിരിക്കും കാസർകോട് ജില്ലയിലെ പുതുയുഗ യാത്ര പര്യടനം നടത്തുക.

കെ.സി വേണുഗോപാൽ ഉദ്ഘാടനം ചെയ്യും 

യാത്രയുമായി ബന്ധപ്പെട്ട് കുമ്പളയിൽ വൻ ഒരുക്കങ്ങളാണ് നടക്കുന്നത്. ജില്ലാ കോൺഗ്രസ് നേതൃത്വം നേരിട്ട് ഇടപെട്ടാണ് പ്രവർത്തനങ്ങൾക്ക് മേൽനോട്ടം വഹിക്കുന്നത്. വെള്ളിയാഴ്ച (06.02.2026) വൈകിട്ട് 4.30-ന് എ.ഐ.സി.സി ജനറൽ സെക്രട്ടറി കെ.സി വേണുഗോപാൽ എം.പി യാത്ര ഉദ്ഘാടനം ചെയ്യും. തുടർന്ന് രാത്രി ഏഴുമണിക്ക് കാസർകോട് ടൗണിൽ ജാഥാ ക്യാപ്റ്റന് സ്വീകരണം നൽകും.

ശനിയാഴ്ച രാവിലെ 10 മണിക്ക് ഉദുമ, 11 മണിക്ക് കാഞ്ഞങ്ങാട്, 12-ന് തൃക്കരിപ്പൂർ എന്നിവിടങ്ങളിലെ സ്വീകരണത്തോടെ ജില്ലയിലെ സ്വീകരണ പരിപാടികൾക്ക് സമാപനമാകും. ജാഥ മാർച്ച് ഏഴിന് തിരുവനന്തപുരത്ത് സമാപിക്കും.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Opposition leader V.D. Satheesan begins the 'Puthuyuga Yatra' from Kumbla, Kasaragod, on Friday to campaign for the 2026 Kerala Assembly elections.

#PuthuyugaYatra #VDSatheesan #UDFKerala #KeralaElections2026 #KCVenugopal #CongressRally